بِسْمِ ٱللَّهِ ٱلرَّحْمَٰنِ ٱلرَّحِيمِ

ማሳሰቢያ

• የሐጅ ምዝገባ ክፍያዎን በተጠቀሱት ባንኮች ብቻ ይፈጽሙ።

የኢትዮጵያ እስልምና ጉዳዮች ጠቅላይ ምክር ቤት ለ1445 ዓ.ሒ (የ2016 ዓ.ል) የሐጅ ጉዞ፣ "የዘመነ መስተንግዶ ለአል-ረህማን እንግዶች" በሚል መሪ ቃል፣ በ27 የምዝገባ ጣቢያዎች ከጥር 25፣ 2016 ዓ.ል ጀምሮ ምዝገባ እያካሄደ መኾኑ ይታወቃል።

ጠቅላይ ምክር ቤቱ በዚህ ዓመት የሐጅ መስተንግዶ ክፍያ እንዲሰበስቡ ለባንኮች ባወጣው የማወዳደሪያ መስፈርት መሠረት ከ12 ባንኮች ጋር ስምምነት በማድረግ በመሥራት ላይ ይገኛል።

በዚህም መሠረት፣ የሐጅ መስተንግዶ ክፍያ እንዲሰበስቡ ከጠቅላይ ምክር ቤቱ ጋር ስምምነት ያደረጉት ባንኮች የሚከተሉት ናቸው:-

1. የኢትዮጵያ ንግድ ባንክ
2. አዋሽ ባንክ
3. የኦሮሚያ ኅብረት ሥራ ባንክ
4. ዘምዘም ባንክ
5. ወጋገን ባንክ
6. ኦሮሚያ ባንክ
7. ዳሸን ባንክ
8. ሒጅራ ባንክ
9. አቢሲኒያ ባንክ
10. ራሚስ ባንክ
11. ሲንቄ ባንክ
12. ቡና ባንክ።

ከላይ ከተራ ቁጥር 1 እስከ 12 ከተጠቀሱት ባንኮች ውጪ፣ ጠቅላይ ምክር ቤቱ የሐጅ መስተንግዶ ክፍያን እንዲሰበስብ ውል የሰጠው ባንክ የለም። በመኾኑም ሕብረተሰቡ ይህን አውቆ ፣ አስፈላጊውን ጥንቃቄ እንዲያደርግና የሐጅ መስተንግዶ ክፍያውን በተጠቀሱት ባንኮች ብቻ እንዲፈጽም ጠቅላይ ምክር ቤቱ ያሳስባል።

መጋቢት 6፣ 2016 ዓ.ል
(ረመዷን 5፣ 1445 ዓ.ሒ)
**
ይከታተሉን | Follow us፡
ፌስቡክ | Ethiopian Islamic Affairs Supreme Council
ቴሌግራም | t.me/eiasc1
ትዊተር | https://x.com/eiasc1

بِسْمِ ٱللَّهِ ٱلرَّحْمَٰنِ ٱلرَّحِيمِ

እስላማዊ ወንድማማችነትን በማጠናከር ልዩነቶችን ማጥበብ እንደሚገባ ፕሬዚደንቱ አሳሰቡ።

መጋቢት 9፣ 2016 (አዲስ አበባ) - የኢትዮጵያ እስልምና ጉዳዮች ጠቅላይ ምክር ቤት ፕሬዚደንት የክብር ዶክተር ሼይኽ ሐጂ ኢብራሂም ቱፋ የዓለም ሙስሊሞች ሊግ ባዘጋጀው ዓለም አቀፍ ጉባዔ ላይ ንግግር አደረጉ።

ሼይኽ ሐጂ ኢብራሂም በንግግራቸው እስልምና አንድነትን ጠብቀን ተባብረን በሰላም እንድንኖር ማስተማሩን ቅዱስ ቁርኣንና የነቢዩ ሙሐመድ (ሶ.ዐ.ወ) ሐዲስን በማጣቀስ ተናግረዋል።

ልዩነቶች ተፈጥሯዊ መሆናቸውን የጠቀሱት ፕሬዚደንቱ፣ ልዩነቶች ሲከሰቱ ወደ ቁርኣን እና ሐዲስ በመዉሰድ መፍታት እንደሚገባ ተናግረዋል።

በመካ እየተካሄደ የሚገኘው ዓለም አቀፍ
ጉባዔ "በእስልምና መዝሐቦች መካከል ድልድይ መገንባት" በሚል መሪ ቃል በሙስሊሙ የእርስ በርስ አንድነት፣ ሰላምና መተባበር ላይ ያተኮረ እንደኾነ ለማወቅ ተችሏል።

ሸይኽ ሐጂ የዓለም ሙስሊሞች ቂብላ በሆነችው በቅድስቲቱ መካ ከተማ፣ በታላቁ የረመዷን ወር በዚህ የዓሊሞች ጉባዔ ላይ ንግግር የማድረግ ዕድል በማግኘታቸው የተሰማቸውን ደስታ በኢትዮጵያ እስልምና ጉዳዮች ጠቅላይ ምክር ቤትና በራሳቸው ስም ገልፀዋል።

የእስልምና አስተምህሮዎች ያላቸውን ልዩነት በውይይት ማጥበብን ዓላማ ባደረገው በዚህ ዓለም አቀፍ ጉባዔ "መዝሐቦች በእስልምና እንዴት ይደጋገፋሉ?" እና "መዝሐቦች በዩኒቨርሲቲዎችና በትምህርት ተቋማት ተባብረው እስልምናን እንዴት ይገነባሉ?" በሚሉ መነሻ ሐሳቦች ዙርያ ጽሑፎች ቀርበው በተሳታፊዎች ውይይት ተደርጎባቸዋል።

በመካ እየተካሄደ በሚገኘው ዓለም አቀፍ ጉባዔ ላይ የጠቅላይ ምክር ቤቱ ተቀዳሚ ምክትል ፕሬዚደንት ሼይኽ አብዱልከሪም ሼይኽ በድረዲንን ጨምሮ፣ ከመላው ዓለም የመጡ ሙፍቲዎችና ዓሊሞች ተሳታፊ እንደሆኑ የጠቅላይ ምክር ቤቱ ቃል አቀባይ ከላከው መረጃ ለማወቅ ተችሏል።

**
(ረመዷን 8፣ 1445 ዓ.ሒ)
**
ይከታተሉን | Follow us፡
ፌስቡክ | Ethiopian Islamic Affairs Supreme Council
ቴሌግራም | t.me/eiasc1
ትዊተር | https://x.com/eiasc1

بِسْمِ ٱللَّهِ ٱلرَّحْمَٰنِ ٱلرَّحِيمِ

የኢትዮጵያ እስልምና ጉዳዮች ጠቅላይ ምክር ቤት አመራሮችና ከተለያዩ የሀገሪቱ አካባቢዎች የተዉጣጡ አባቶች ከጠቅላይ ሚኒስቴር ዶክተር ዐብይ አህመድ ጋር ተወያዪ።

መጋቢት 10፥2016 ( አዲስ አበባ)የኢትዮጵያ እስልምና ጉዳዮች ጠቅላይ ምክር ቤት አመራሮችና ከተለያዩ የሀገሪቱ አካባቢዎች የተውጣጡ አባቶች ከኢፌዴሪ ጠቅላይ ሚኒስቴር ዶክተር ዐብይ አህመድ ጋር ዛሬ ከሰዐት በኋላ ጠቃሚ በሆኑ ጉዳዮች ላይ ውይይት አደረጉ።

የጠቅላይ ምክርቤቱ አመራሮችና ከክልል የተዉጣጡ አባቶች በጧቱ ክፍለ ጊዜ በመዲናችን አዲስ አበባ ከተማ የተገነቡ ፕሮጀክቶችን ተዘዋውሮ ጉብኝት አድርጓል።

ረመዷን 9፣ 1445 ዓ.ሒ)
**
ይከታተሉን | Follow us፡
ፌስቡክ | Ethiopian Islamic Affairs Supreme Council
ቴሌግራም | t.me/eiasc1
ትዊተር | https://x.com/eiasc1

بِسْمِ ٱللَّهِ ٱلرَّحْمَٰنِ ٱلرَّحِيمِ

ጠቅላይ ሚኒስትር ዶክተር ዐቢይ አህመድ የኢትዮጵያ እስልምና ጉዳዮች ጠቅላይ ም/ቤት አመራሮችና ከተለያዩ ክልሎች የተወጣጡ አባቶችን አስፈጠሩ።

መጋቢት 10፣ 2016 (አዲስ አበባ ) የኢፌዴሪ ጠቅላይ ሚኒስትር ዶክተር ዐቢይ አሕመድ የ1445ዓ.ሒ(2016 ዓ.ል) የታላቁን የረመዷን ፆምን ምክንያት በማድረግ ዛሬ የኢትዮጵያ እስልምና ጉዳዮች ጠቅላይ ምክር ቤት አመራሮች እና ከተለያዩ ክልሎች የተወጣጡ አባቶችን አስፈጠሩ።

ጠቅላይ ሚኒስትሩ ዛሬ ከሰዓት በኋላ ከኢትዮጵያ እስልምና ጉዳዮች ጠቅላይ ምክር ቤት አመራሮች እና ከተለያዩ ክልሎች ከተወጣጡ አባቶች ጋር ጠቃሚ በሆኑ ጉዳዮች ላይ ውይይት ማድረጋቸው ይታወቃል፡፡

ረመዷን 9፣ 1445 ዓ.ሒ)
**
ይከታተሉን | Follow us፡
ፌስቡክ | Ethiopian Islamic Affairs Supreme Council
ቴሌግራም | t.me/eiasc1
ትዊተር | https://x.com/eiasc1

بِسْمِ ٱللَّهِ ٱلرَّحْمَٰنِ ٱلرَّحِيمِ
የአማራ እስልምና ጉዳዮች ከተለያዩ የሐገራችን አካባቢዎች ተፈናቅለው በክልሉ ለተጠለሉ ወገኖች የዕርዳታ ጥሪ አቀረበ።

መጋቢት 12፣ 2016 (አዲስአበባ) የአማራ ክልል እስልምና ጉዳዮች ከፍተኛ ምክር ቤት "ፆማችንን ለተፈናቀሉ ወገኖቻችን" በሚል መሪ ቃል ከተለያዩ የሐገራችን አካባቢዎች ተፈናቅለው በክልሉ በጊዚያዊ መጠለያ ጣቢያና በ ተለያዩ ቦታዎች ለተጠለሉ ወገኖቻችን የእርዳታ ማሰባሰቢያ መርኃ ግብርን በተመለከተ ጋዜጣዊ መግለጫ ሰጠ።

በኢትዮጵያ እስልምና ጉዳዮች ጠቅላይ ምክር ቤት መሰብሰቢያ አዳራሽ በተሰጠው በዚህ መግለጫ የአማራ ክልል እስልምና ጉዳዮች ከፍተኛ ምክር ቤት ምክትል ፕረዚዳንት ሼይኽ ሙሐመድ አንዋር እንደተናገሩት ፤ ነብያችን ሙሐመድ (ሶ.ዐ.ወ) ሁሌም ቸር ሲሆኑ በታላቁ የረመዷን ወቅት የሚያደርጉት ቸርነት ግን ከሌላው የተለየ እንደ ነበሩ ነብያዊ ሐዲስን አስታዉሰዋል።

በአሁኑ ወቅት ከተለያዩ የሐገራችን አካባቢዎች ተፈናቅለው በክልሉ በጊዚያዊ መጠለያ ጣቢያዎችና በተለያዩ ቦታዎች ለተጠለሉ ወገኖቻችንን ለመርዳት መላው ደጉ ሕዝባችን እጁን ሊዘረጋ እንደሚገባ ጥሪያቸው አስተላልፈዋል።

የክልሉ እስልምና ጉዳዮች ከፍተኛ ምክር ቤት አደረጃጀት የልማት ዘርፍ ኅላፊ ሐጂ አመዴ ይማም የተፈናቀሉ ወገኖቻችን ከመቼውም በተለየ የሁላችንም ድጋፍና ዕርዳታ የሚያስፈልጋቸው ወቅት በመሆኑ በሐገር ውስጥ እና በውጪ ሀገር የሚገኙ ወ ገኖቻችን የዕርዳታ እጁን ሊዘረጋ እንደሚገባ ተናግረዋል።

የክልሉ እስልምና ዋና ፀሐፊ ሼይኽ አብዱራህማን ሱልጣን የክልሉ እስልምና ጉዳዮች ከፍተኛ ምክር ቤት "ፆማችንን ለተፈናቀሉ ወገኖቻችን " በሚል መሪ ቃል የዕርዳታ ማሰባሰቢያ መርሐግብር በገንዘብ፣ በደረቅ ምግብ እና በአልባሳት ሕብረተሰቡ መርዳት እንዲችል አማራጮችን ማቅረቡን ተናግረዋል።

ለዕርዳታ አሰባሰቡ በክልሉ እስልምና ጉዳዮች አማካኝነት ስድስት ባንኮች መከፈታቸውን ገልፀዋል።
እነርሱም 1. የኢትዮጵያ ንግድ ባንክ 1000 6219 77777
2. አማራ ባንክ 8800000992254
3.ሒጅራ ባንክ100 529 7390 001
4. ዳሸን ባንክ 790 207 0047 911
5. ዘምዘም ባንክ 0038848 410301
6. ፀሐይ ባንክ 1004462781 መሆናቸውን ፀሐፊው ገልፀዋል።

ለደረቅ ምግብና አልባሳት ድጋፍ ማሰባሰቢያ ተውፊቅ (ፍል ውሐ)፣ ኢማሙ አህመድ ( ቤተል አለም ባንክ) እና የታላቁ የንጉስ ነጃሺ መሳጂድ ቅጥር ጊቢ ውስጥ የመቀበያ ቦታዎች መዘጋጀታቸውን ሼይኽ አብዱራህማን ሱልጣን ተናግረዋል።

ረመዷን 11፣ 1445 ዓ.ሒ)
**
ይከታተሉን | Follow us፡
ፌስቡክ | Ethiopian Islamic Affairs Supreme Council
ቴሌግራም | t.me/eiasc1
ትዊተር | https://x.com/eiasc1

بِسْمِ ٱللَّهِ ٱلرَّحْمَٰنِ ٱلرَّحِيمِ
ማሳሰቢያ

የኢትዮጵያ እስልምና ጉዳዮች ጠቅላይ ም/ቤት የሐጅ ምዝገባ ማጠናቀቂያ ቀነ ገደብ ይፋ አደረገ።

በ2016/1445 ሂጅሪያ ሐጅ ለማድረግ ላሰባችሁ ኢትዮጲያዉያን የሙስሊም ማህበረስብ በሙሉ፤ እንድሚታወቀዉ የዘንድሮዉ ሐጅ አሰራር ከዚህ ቀደም ከነበረዉ በማዘመን የተሻለ አገልግሎት ለማቅረብ "የዘመነ አገልግሎት ለአር-ረሕማን እንግዶች" በሚል መሪ ቃል ምዝገባዉን በፊት ከተለመደዉ አሰራርና ጊዜ ቀደም ብሎ ከጥር 25/2016 ጀምሮ በይፋ አዉጆ ሲያከናዉን ቆይቷል።

በዚሁ መሰረት ላለፉት ተከታታይ 2 ወራት ገደማ ምዝገባው በጥሩ ሁኔታ ሲካሄድ የነበረ ሲሆን፥ የተሰጠንን ኮታ ለመሙላት የቀረዉ ከ1400 ሰዎች ኮታ በታች የሆነ ከመሆኑ ጋርና የምዝገባ ሂደቱም ተቋጭቶ ወደሚቀጥለው ሂደት መተላለፍ አስፈላጊ በመሆኑ የምዝገባዉ የመጨረሻ ቀን ረመዳን 25 (መጋቢት 26) እና የክፊያ ማጠናቀቂያ የመጨረሻ ቀን ደግሞ ረመዳን 29 (መጋቢት 30) እንዲሆን ተወስኗል፡፡

በመሆኑም ሐጅ ለማድረግ ኒያ ኖሯችሁ የምዝገባውን ሂደት ላላጠናቀቃችሁ በሙሉ በቀሩት የምዝገባ ቀናት ዉስጥ በአቅራብያችሁ በሚገኙት የምዝገባ ጣቢያዎች በመቅረብ እንድትመዘገቡና ክፊያችሁንም እንድታጠናቅቁ ጠቅላይ ምክር ቤቱ ጥሪ እያስተላለፈ፣ በተጨማሪም ኮታዉ ከተባለዉ ቀን በፊት የሚሞላ ከሆነ የተቀመጠዉን ቀነ ገደብ ሳይደርስ ምዝገባውን እንደሚያጠናቅቅ መልዕቱን ያስተላልፋል፡፡

የኢትዮጵያ እስልምና ጉዳዮች ጠቅላይ ም/ቤት

መጋቢት 18/2016 ዓ.ል
ረመዳን 17/1445 ዓ.ሒ

بِسْمِ ٱللَّهِ ٱلرَّحْمَٰنِ ٱلرَّحِيمِ

"አላህ ለሀገራችን ዘላቂ ሰላምን እንዲያመጣልን ተማፀኑ" ሲሉ ፕሬዚደንቱ ጾመኞችን አሳሰቡ።

መጋቢት 18፣ 2016 (አዲስ አበባ) - "በሰው ሠራሽ አደጋዎች በችግር ውስጥ ለወደቁ ወገኖቻችን ዱዓ አድርጉ፣ ለሀገራችን ዘላቂ ሰላምን እንዲያመጣልን አላህን ተማፀኑ" ሲሉ የኢትዮጵያ እስልምና ጉዳዮች ጠቅላይ ምክር ቤት ፕሬዚደንት ሸይኽ ሐጂ ኢብራሂም ቱፋ ለሀገሪቱ ሙስሊሞች ጥሪ አቀረቡ።

ፕሬዚደንቱ ሸይኽ ሐጂ ኢብራሂም ቱፋ ይህን ጥሪ ያደረጉት፣ አራተኛው ታላቁ የጎዳና ላይ ኢፍጣር መርኃ ግብር ዛሬ በአዲስ አበባ በአደባባይ በድምቀት በተከናወነበት ጊዜ ነው።

"በነቢዩ (ሶ.ዐ.ወ.) "'ጾመኛ ከሚደሰትባቸው ሁለት ቅጽበቶች አንዱ' ተብሎ የተወሳውን ኢፍጣር እንዲህ በአንድ ስፍራ ተሰባስበን በጋራ ለማፍጠር መብቃታችን የሚያስደስት በመኾኑ፣ ሁላችሁንም እንኳን ደስ አላችሁ" ብለዋል ሸይኽ ሐጂ ኢብራሂም።

አክለውም፣ "እንዲህ ተሰባስበን በጎዳና ላዬ ስናፈጥር የምንደሰተውን ያህል፣ በተለያዩ ተፈጥሯዊና ሰው ሰራሽ አደጋዎች ከቤት ንብረታቸው ተፈናቅለው በጎዳና ላይ ዝናብና ፀሐይ እየተፈራረቀባቸው የሚገኙ ወገኖቻችንን ስናስብ ከፍተኛ ሐዘን ይሰማናል" ብለዋል።

በተጨማሪም ሸይኽ ሐጂ፣ "ጾመኞች በሚያፈጥሩበት ጊዜ የሚያደርጉት ዱዓ አላህ ዘንድ ተቀባይነት ያለው በመኾኑ፣ ሁላችሁም በዚህ ቅጽበት በጦርነት ሳቢያ በችግር ውስጥ ለሚገኙት ወገኖቻችን ዱዓ እንድታደርጉና ለሀገራችን ዘላቂ ሰላምን እንዲያመጣልን አላህን እንድትማፀኑ" ሲሉ ምዕመናኑን ጠይቀዋል።

"ሁላችንም በዱንያ ያየነውን ደስታ፣ አላህ በጀነትም የምናይ ያድርገን" ሲሉ ዱዓ አድርገዋል።

በመርኃ ግብሩ ላይ የተገኙት የአዲስ አበባ እስልምና ጉዳዮች ከፍተኛ ምክር ቤት ፕሬዚደንት ሸይኽ ሡልጣን አማን ኤባ በበኩላቸው፣ ለታላቁ የጎዳና ላይ ኢፍጣር ስኬት አስተዋጽኦ ያበረከቱ አካላትን አመስግነዋል።

"በዛሬው ዕለት በታላቅ ድምቀት የተከናወነው የጎዳና ኢፍጣር ባማረ ሁኔታ እንዲጠናቀቅና አዳቡን በጠበቀ መንገድ እንዲከናወን ሕዝበ ሙስሊሙና የአዲስ አበበ ከተማ መስተዳድር ያበረከቱት አስተዋጽዖ ጉልህ በመኾኑ፣ ምስጋና ይገባቸዋል" ብለዋል ሸይኽ ሡልጣን አማን።

በዝግጅቱ ላይ ከ11ዱም ክፍለ ከተሞች በተውጣጡ ሐፊዞች መካከል በተካሄደ የቁርኣን ሂፍዝ ውድድር አንደኛ የወጣው ሐፊዝ የሐጅ ጉዞ ሽልማት እንደተመቻቸለት የተነገረ ሲኾን፣ ሁለተኛ የወጣው ተወዳዳሪ የ250 ሺህ ብር፣ ሦስተኛ የወጣው ተወዳዳሪ ደግሞ የ100 ሺህ ብር ተሸላሚ መሆናቸው ተነግሯል።

በመርኃ ግብሩ ላይ የኢትዮጵያ እስልምና ጉዳዮች ጠቅላይ ምክር ቤት ምክትል ፕሬዚደንት ሸይኽ አብዱልከሪም ሸይኽ በድረዲን፣ የፕሬዚደንቱ አማካሪ እና የመርኃ ግብሩ የበላይ አሥተባባሪ ኡስታዝ አቡበክር አሕመድ፣ ከተለያዩ ሀገራት የተወከሉ ሙፍቲዎች፣ ምሁራን እና ታዋቂ ግለሰቦች ተገኝተዋል።

**
ረመዳን 17፣ 1445 ዓ.ሒ)
**
ይከታተሉን | Follow us፡
ፌስቡክ | Ethiopian Islamic Affairs Supreme Council
ቴሌግራም | t.me/eiasc1
ትዊተር | https://x.com/eiasc1

بِسْمِ ٱللَّهِ ٱلرَّحْمَٰنِ ٱلرَّحِيمِ

የጠቅላይ ምክር ቤቱ የበላይ መሪዎች፣ አል ኢምራን የቁርኣን ሂፍዝና እስላማዊ ማዕከልን ጎበኙ።

መጋቢት 19፣ 2016 (አዲስ አበባ) - በኢትዮጵያ እስልምና ጉዳዮች ጠቅላይ ምክር ቤት ፕሬዚደንት የክብር ዶክተር ሸይኽ ሐጂ ኢብራሂም ቱፋ የተመራ የመጅሊሱ የበላይ አመራሮች ሲኤምሲ የሚገኘውን የአል ኢምራን የቁርኣን ሂፍዝ እና እስላማዊ ማዕከል ጎበኙ።

የመጅሊሱ የበላይ መሪዎች ከስፍራው ሲደርሱ፣ የማዕከሉ የበላይ ጠባቂና አሚሮች ደማቅ አቀባበል አድርገውላቸዋል።

በአቀባበሉ ላይ፣ የአል ኢምራን የቁርኣን ሂፍዝ እና እስላማዊ ማዕከል የበላይ ጠባቂና አሚሮች ዑስታዝ ሙሐመድ ጀማል ጎናፍር፣ ዑስታዝ አቡበክር አብደላ፣ ሐጂ ዩኑስ ፈቂህ፣ ዑስታዝ ሰዒድ ዓሊ በያን፣ ዑስታዝ አብደልፈታህ፣ ሸይኽ ሸሪፍ፣ ዑስታዝ ሙሐመድ አብዱሰላም፣ ዑስታዝ አዲል አሕመድ ሸሪፍ እና ዑስታዝ ሙሐመድ ዚያድ ተገኝተዋል።

የማዕከሉ ዳይሬክተር ዑስታዝ አስለም ዩሱፍ የኢትዮጵያ እስልምና ጉዳዮች ጠቅላይ ምክር ቤት የበላይ አመራሮች የማዕከሉን የጉብኝት ግብዣ አክብረው በስፍራው በመገኘታቸው የተሰማቸውን ደስታ በመግለጽ ምሥጋና አቅርበዋል።

በተጨማሪም የማዕከሉ ዳይሬክተር ለጠቅላይ ምክር ቤቱ ፕሬዚደንት እና ተቀዳሚ ምክትል ፕሬዚደንት፣ እንዲሁም የሥራ አስፈጻሚ ኮሚቴ አባላት ስለ ማዕከሉ መንፈሣዊ አገልግሎት ሰፊ ገለጻ አድርገዋል።

የጠቅላይ ምክር ቤቱ ፕሬዚደንት ሸይኽ ሐጂ ኢብራሂም ቱፋ በዚሁ ጊዜ፣ በማዕከሉ የበላይ ጠባቂና አሚሮች ስለተደረገላቸው አቀባበል አመሥግነው፣ የዲን ተቋማት ከመንፈሣዊ አገልግሎታቸው በተጓዳኝ፣ የጋራ ተቋማቸውን የኢትዮጵያ እስልምና ጉዳዮች ጠቅላይ ምክር ቤትን ለማጠናከር በጋራ መሥራት እንደሚጠበቅባቸው ተናግረዋል።

ሸይኽ ሐጂ ኢብራሂም አክለውም፣ እስላማዊ ተቋማት ከዲን ጋር የተያያዙ ማናቸውንም ችግሮች በምክክር እየፈቱ፣ ወንድማማችነትን በማስቀጠል ላይ ትኩረት ሊያደርጉ እንደሚገባ አሳስበዋል።

ይህ ማዕከል በርካታ ወንድሞችና እህቶቻችን፣ ወጣቶቻችንና ልጆቻችን ያለባቸውን የዲን ዕውቀት ክፍተት የሚሞላና፣ መንፈሣዊነትን የሚያጎለብት መኾኑን የጠቀሱት ሸይኽ ሐጂ ኢብራሂም፣ አክለውም፣ "ጠቅላይ ምክር ቤታችን ይህን ማዕከል እንደ አንድ አጋዥ ተቋም ትልቅ እውቅና ይሰጠዋል" ብለዋል።

የጠቅላይ ምክር ቤቱ ተቀዳሚ ምክትል ፕሬዚደንት ሸይኽ አብዱልከሪም ሸይኽ በድረዲን በበኩላቸው፣ "በመግባባት ላይ የተመሠረተ ሕብረትና አንድነት ላይ የቆመ ዲን የጠንካራ አለት ያህል በመኾኑ፣ ከሁሉም በላይ ወንድማማችነትን ማስቀደም ይገባል፤ በትብብራችን ብዙ እንጓዛለን" ብለዋል።

የፕሬዚደንቱ ልዩ አማካሪ ዑስታዝ አቡበክር አሕመድ በበኩላቸው፣ አል ኢምራን የቁርኣን ሂፍዝ እና እስላማዊ ማዕከል የብዙ አባቶችና አዒማዎች አሻራ ያረፈበት መሆኑን ጠቅሰው፣ ማንኛውም ችግር በሹራ እየተፈታ፣ በማዕከሉ አሚሮች በሚታቀዱ በማናቸውም ተግባራት ላይ የአቅማቸውን ለማገዝ ዝግጁ መሆናቸውን ተናግረዋል።

በጉብኝቱ መጨረሻ፣ ሸይኽ ሐጂ ኢብራሂም ቱፋ እና ሸይኽ አብዱልከሪም ሸይኽ በድረዲን ለጎብኚዎች በተዘጋጀው የክብር መዝገብ ላይ የእስላማዊ ተቋማትን መልካም ግንኙነት እና ትስስር በማጠናከር ዙሪያ ሐሳቦቻቸውን አስፍረዋል።

**
ረመዳን 18፣ 1445 ዓ.ሒ
**
የኢ.እ.ጉ.ጠ. ም/ቤት ሕዝብ ግንኙነት
ይከታተሉን | Follow us፡
ፌስቡክ | Ethiopian Islamic Affairs Supreme Council
ቴሌግራም | t.me/eiasc1
ትዊተር | https://x.com/eiasc1

بِسْمِ ٱللَّهِ ٱلرَّحْمَٰنِ ٱلرَّحِيمِ

የአዲስ አበባ ከተማ ከንቲባ በአድዋ ሙዝየም ረመዳን እና ዐቢይ ፆምን በማስመልከት ልዩ "የፍቅር እና የአብሮነት ማዕድ" አስተናገዱ።

መጋቢት 19፣ 2016 (አዲስ አበባ) - የአዲስ አበባ ከተማ ከንቲባ ወ/ሮ አዳነች አቤቤ በዛሬዉ ዕለት ረመዳንና ዐቢይ ጾምን ምክንያት በማድረግ ልዩ የጋራ ማዕድ መርኃ ግብር አካሄዱ።

በኢፍጣር ሰዓት በተካሄደው በዚህ ልዩ የጋራ ማዕድ መርኃ ግብር ላይ የፌደራሉ ጠቅላይ ምክር ቤትና የአዲስ አበባ እስልምና ጉዳዮች ከፍተኛ ምክር ቤት የበላይ አመራሮች፣ የኢ.ኦ.ተዋህዶ ቤተ ክርስቲያን፣ የኢትዮጵያ ካቶሊካዊት ቤተ ክርስቲያን እና የወንጌላውያን አብያተ ክርስቲያን አባቶች፣ እንዲሁም ጥሪ የተደረገላቸዉ ሌሎች እንግዶች ተገኝተዋል።

በአድዋ ድል መታሰቢያ ሙዚየም የተሰናዳውን ይህን ልዩ መርኃ ግብር አስመልክተው የአዲስ አበባ ከተማ ከንቲባ ወ/ሮ አዳነች አቤቤ በማኅበራዊ ትስስር ገፃቸዉ ባስተላለፉት መልዕክት፣ ክንዋኔውን፣ "የፍቅር እና የአብሮነት ማዕድ" ሲሉ ገልፀውታል።

“በብዝኃነት ተዉባ፣ ሁሉም ተዋዶ በአብሮነት የሚኖርባት አዲስ አበባ ዛሬ ምሽት የረመዳንና የዐቢይ ጾምን ምክንያት በማድረግ ክርስቲያን እና ሙስሊም የእምነት አባቶች፣ ወንድምና እህቶች፣ እንዲሁም የሁሉም እምነት ተከታዮች የተሳተፉበት የፍቅርና የአብሮነት መዓድ በመቋደስ፣ እንኳን አደረሳችሁ በመባባል የጋራ ጸሎት አድርገናል” ብለዋል ከንቲባ አዳነች።

**
ረመዳን 18፣ 1445 ዓ.ሒ
**
የኢ.እ.ጉ.ጠ. ም/ቤት ሕዝብ ግንኙነት
ይከታተሉን | Follow us፡
ፌስቡክ | Ethiopian Islamic Affairs Supreme Council
ቴሌግራም | t.me/eiasc1
ትዊተር | https://x.com/eiasc1

بِسْمِ ٱللَّهِ ٱلرَّحْمَٰنِ ٱلرَّحِيمِ                           
የአፋርና የሶማሊ ክልሎች በጠቅላይ ምክር ቤቱ አደራዳሪነት ደም መፋሰስን ለማቆም፣ የተኩስ አቁም ስምምነት ላይ ደረሱ።

ሚያዚያ 11፣ 2016 (አዲስ አበባ) -
በኢትዮጵያ እስልምና ጉዳዮች ጠቅላይ ምክር ቤት ፕሬዚደንት የክብር ዶክተር ሸይኽ ሐጂ ኢብራሂም ቱፋ አደራዳሪነት ሲካሄድ በቆየው የአፋርና የሶማሊ ክልሎች የእርቀ ሰላም ውይይት ሁለቱ ክልሎች ተኩስ ለማቆም ከስምምነት ደረሱ።

ይህ የተነገረው በኢትዮጵያ እስልምና ጉዳዮች ጠቅላይ ምክር ቤት ተነሳሽነት በአል-ነሀሪ ሆቴል በአፋር እና በኢሳ በኩል ያሉ ታላላቅ ኡጋዞች እና መሪዎች የተሳተፉበት የአንድ ቀን ከግማሽ ሰፊ ውይይት ዛሬ በተጠናቀቀበት ጊዜ ነው።

የሶማሊና የአፋር ክልል ወንድማማች ሕዝቦች በመካከላቸው በተፈጠረው ያለመግባባት ሳቢያ የነበረውን አላስፈላጊ ደም መፋሰስ ለማቆምና ችግሩን በንግግር ለመፍታት እንደ መጀመሪያ እርምጃ፣ ሁለቱም ወገኖች ቃታ ከመሳብ ለመታቀብ ተስማምተዋል።

የሶማሊ ክልል ተደራዳሪ ኡጋዝ ሙስጦፋ ሙሐመድ እና የአፋር አቻቸው ሐጂ አበቶ ሙካ ሙሐመድ በሃይማኖት ተቋማችን አማካይነት ይህን መሰል እርቀ ሰላም መጀመሩ የሚያበረታታ መሆኑን ተናግረው፣ ጉዳዩ ረጅም  ዕድሜ ያለው ቢሆንም፣ የተጀመረው የሰላም ሂደት ትልቅ ተስፋ ሰጪ ነው ብለዋል።

የጠቅላይ ምክር ቤቱ ፕሬዚደንት ሸይኽ ሐጂ ኢብራሂም በዚሁ ጊዜ፣ ይህን የሰላም ጥረት ስኬት መነሻ በማድረግ፣ በሌሎች የኢትዮጵያ ክፍሎች የሚካሄዱ ግጭቶችን በንግግርና በድርድር የመፍታት ጥረት እንዲጀመር የሰላም ጥሪ አቅርበዋል።

በሀገራችን ኢትዮጵያ ውስጥ በመካሄድ ላይ ያሉ የወገን ለወገን የእርስ በርስ ግጭቶች እና አላስፈላጊ ደም መፋሰሶችን ለማቆም የንግግር፣ የውይይት እና የድርድር በሮች ሊከፈቱ ይገባል ሲሉ ጥሪ አቅርበዋል።

ሸይኽ ሐጂ ኢብራሂም፣ "የግጭት መንስኤዎችን መርምረን፣ የሐሳብ ልዩነቶችን እና ችግሮችን በውይይት በመፍታት በሰላም ጥላ ስር ተሰባስበን ሀገራችንን እናልማ" ብለዋል።

የሃይማኖት ተቋም መሪነት ትልቅ ሥራ በመኾኑ፣ ጠቅላይ ምክር ቤቱ ይህን ተነሳሽነት መውሰዱ በጣም ያበረታታል ብለዋል የሁለቱ ወገን ተደራዳሪዎች።

አያይዘውም በሁለቱ ወንድማማች ማኅበረሰቦች መካከል አላስፈላጊ ደም መፋሰስን ለማቆምና አንድነታቸውን ለማጠናከር በሁለቱም በኩል በየክልላቸው በርካታ ሥራዎችን መሥራት እንደሚኖርባቸው ተናግረዋል።

የጠቅላይ ምክር ቤቱ ፕሬዚደንት ሸይኽ ሐጂ ኢብራሂም ቱፋ የሶማሊና የአፋር ወንድሞቻችን
ቀደም ሲል ለተፈፀሙ ስህተቶች ለአላህ ብለው አውፍ በመባባል፣ወደፊት የወገኖቻችን የእርስ በርስ ደም መፋሰስን በማቆም፣ዘላቂ የተኩስ አቁም ለማድረግ ከስምምነት መድረሳቸው ይህን ቀን ታሪካዊ ያደርገዋል ብለዋል።

የሁለቱ ክልሎች የማኅበረሰብ መሪዎች የስምምነቱን ሂደት አሳክተው በቀጣዩ ሳምንት በጠቅላይ ምክር ቤቱ ሰብሳቢነት እንደሚገናኙ ለማወቅ ተችሏል።

ለአንድ ቀን ተኩል በተካሄደው የእርቀ ሰላም ውይይት ላይ የሁለቱም ሕዝቦች ከፍተኛ የጎሳ መሪዎች፣ ኡጋዞች፣ የጠቅላይ ምክር ቤቱ ተቀዳሚ ምክትል ፕሬዚደንት ሸይኽ አብዱልከሪም ሸይኽ በድረዲን፣ የጠቅላይ ምክር ቤቱ ምክትል ፕሬዚደንትና የሐጅና ዑምራ ዘርፍ ተጠሪ ሸይኽ አብዱልአዚዝ ሸይኽ አብዱልዋሊ፣ እንዲሁም የፕሬዚደንቱ ልዩ አማካሪ ኡስታዝ አቡበክር አሕመድ የተገኙ ሲኾን፣ ከመንግሥት በኩል የሰላም ሚኒስቴር  በታዛቢነት ተገኝተዋል።

****
ሸዋል 10፣ 1445 ዓ.ሂ
****
ይከታተሉን | Follow us፡
ፌስቡክ | Ethiopian Islamic Affairs Supreme Council
ቴሌግራም | t.me/eiasc1
ትዊተር | https://x.com/eiasc1

بِسْمِ ٱللَّهِ ٱلرَّحْمَٰنِ ٱلرَّحِيمِ

ጠቅላይ ምክር ቤቱ ከነገ ጀምሮ ለተወሰኑ ቀናት የሐጅ ምዝገባ ያካሂዳል።

ሚያዝያ 11፣ 2016 (አዲስ አበባ) - የኢትዮጵያ እስልምና ጉዳዮች ጠቅላይ ምክር ቤት የሐጅና ዑምራ ዘርፍ፣ ተቋርጦ የነበረውን የሐጅ ጉዞ ምዝገባ ከነገ ሚያዝያ 12፣ 2016 ጀምሮ ለተወሰኑ ቀናት እያካሄደ እንደሚቀጥል አስታወቀ።

የምክር ቤቱ የሐጅና ዑምራ ዘርፍ፣ ለሐጅ ነይተው ሳለ በተለያዩ ምክንያቶች እስካሁን ላልተመዘገቡ ዜጎች ተጨማሪ ዕድል ለመስጠት፣ አቁሞ የነበረውን የሐጅ ጉዞ ምዝገባ፣ ከቅዳሜ ሚያዝያ 12 ጀምሮ ለተወሰኑ ቀናት ማራዘሙን አስታውቋል።

አዲስ ተመዝጋቢ ሑጃጆች ለምዝገባ ሲመጡ የታደሰ ፓስፖርት፣ መታወቂያ እና ጉርድ ፎቶ ግራፍ ይዘው እንዲመጡ የሐጅና ዑምራ ዘርፍ አሳስቧል።

ፓስፖርት የሌላቸውና እድሜያቸው ከ50 ዓመት በታች የሆኑ ተመዝጋቢዎች፣ የልደት ሰርተፊኬት ማቅረብ እንደሚኖርባቸው ያሳሰበው ዘርፉ፣ ዕድሜያቸው ከ50 ዓመት በላይ የኾናቸው አዲስ ተመዝጋቢዎች መታወቂያ እና ጉርድ ፎቶ ግራፍ ብቻ ይዘው መቅረብ አለባቸው ብሏል።

ምዝገባው የተራዘመው ለጥቂት ጊዜያት እና አነስተኛ ቁጥር ላላቸው ተመዝጋቢዎች ዕድል ለመስጠት እንደኾነ የጠቀሰው የሐጅና ዑምራ ዘርፍ፣ ዘንድሮ ሐጅ ለማድረግ ነይተው እስካሁን ያልተመዘገቡ ምዕመናን በዚህ ዕድል እንዲጠቀሙ አሳስቧል።

*****
ሸዋል 10፣ 1445 ዓ.ሂ.
*****​
የኢት/እ/ጉ/ጠ ምክር ቤት ሕዝብ ግንኙነት።
ይከታተሉን | Follow us፡
ፌስቡክ | Ethiopian Islamic Affairs Supreme Council
ቴሌግራም | t.me/eiasc1
ትዊተር | https://x.com/eiasc1

بِسْمِ ٱللَّهِ ٱلرَّحْمَٰنِ ٱلرَّحِيمِ

ሚያዝያ 12፣ 1966 ዓ.ል. በአዲስ አበባ ከተማ የተካሄደውን ታላቁ የሙስሊም ኢትዮጵያውያን ሰላማዊ ሰልፍ 50ኛ ዓመት ለመዘከር፣ የኢትዮጵያ እስልምና ጉዳዮች ጠቅላይ ምክር ቤት በዛሬው ዕለት ጋዜጣዊ መግለጫ ሰጥቷል።

መግለጫውን በንባብ ያሰሙት የጠቅላይ ምክር ቤቱ ሥራ አስፈጻሚ አባል እና የሕዝብ ግንኙነት ተጠሪ የሆኑት ሸይኽ ሑሴን ሐሰን ሲኾኑ፣ የመግለጫው ሙሉ ቃል ከዚህ በታች ቀርቧል።
* * *

ሚያዝያ 12፣ 1966 በአዲስ አበባ የተካሄደውን ታላቁ የሙስሊሞች ሰላማዊ ሰልፍ 50ኛ ዓመት ለመዘከር፣ ከኢትዮጵያ እስልምና ጉዳዮች ጠቅላይ ምክር ቤት የተሰጠ ጋዜጣዊ መግለጫ፡፡

በሀገራችን የቅርብ ዘመን ታሪክ 50 ዓመታት ወደኋላ ስንሄድ፣ የኢትዮጵያ ሕዝብ አብዮት የፈነዳበትን የካቲት 1966 እናገኛለን፡፡ ይህ ወቅት፣ በኢኮኖሚ፣ በፖለቲካም ኾነ በማኅበራዊ መስኮች ሀገራችን ውስጥ የነበሩ የተለያዩ ችግሮችን የሕዝቡ ጫንቃ ሊቋቋም እማይችልበት ደረጃ ላይ የደረሰበት ጊዜ ነበር፡፡ የዘውድ አገዛዝ ሥርዓቱ ቢያንስ ከ1950ዎቹ መጨረሻ አንስቶ በዩኒቨርሲቲ ተማሪዎች ይስተጋባ ለነበረው የ“መሬት ለአራሹ!” ጥያቄ እንኳ፣ ተገቢ ምላሽ ለመስጠት አልቻለም ነበር፡፡ እናም ሕዝቡ ከጫፍ እስከ ጫፍ፣ ፊውዳላዊው የዘውድ አገዛዝ ሥርዓት በቃኝ ብሎ በአመጽ ተነሳ፡፡ ሕዝባዊ አብዮት ተቀጣጠለ፡፡

ከየካቲት ወር 1966 ጀምሮ በነበሩት የአብዮቱ ጊዜያት ከተካሄዱ ሕዝባዊ ንቅናቄዎች እጅግ ጎልቶ በታሪክ የሚጠቀሰው ሚያዝያ 12፣ 1966 የተካሄደው የሙስሊሞች ደማቅ ሰላማዊ ሰልፍ ነው፡፡ የዛሬ 50 ዓመት በዛሬዋ ዕለት የተካሄደው ይህ ሰልፍ፣ በኢትዮጵያ ሙስሊሞች የቅርብ ዘመናት ታሪክ ውስጥ ልዩ ስፍራ ያለው ሕዝባዊ ክንዋኔ ነው፡፡ ይህ ሕዝባዊ ክንዋኔ፣ የኢትዮጵያ ሙስሊሞች በረጅሙ የንጉሣዊ አገዛዝ ዘመን ሲፈፀሙባቸው የነበሩ የተለያዩ መድልዎዎች እንዲያከትሙ፣ የዜግነት መብቶቻቸው እንዲከበሩ፣ የሃይማኖት እኩልነት እንዲሰፍን በይፋ ለመጠየቅ፣ በሀገሪቱ ታሪክ ታይቶ የማይታወቅ ደማቅና ታሪካዊ ሰልፍ ያካሄዱበት ዕለት ነው፡፡

“ንጉሥ አይከሰስ፣ ሰማይ አይታረስ” ይባልባት በነበረችው የዚያን ጊዜዋ ኢትዮጵያ፣ አያሌ የሀገሪቱ ማኅበረሰቦች፣ ዘውዳዊው የአገዛዝ ሥርዓት ያደርስባቸው የነበረው በደል የፈጠረባቸውን ምሬትና ብሶት አምቀው፣ ለዘመናት ከበደል፣ ከጭቆና እና ከመድልዎ ጋር ኖረዋል፡፡ በዚያ ዘመን ሥርዓታዊ፣ ተቋማዊ እና ስልታዊ በኾነ መልኩ ይካሄድ የነበረው ጭቆናና መድልዎ ተጎጂ ኾነው ከኖሩት የሀገሪቱ ሕዝቦች ውስጥ የኢትዮጵያ ሙስሊሞች ዋነኛ ተጠቃሽ ናቸው፡፡

ከአንድ ሺህ ዓመታት በላይ በሀገሪቱ ማኅበራዊ፣ ኢኮኖሚያዊ እና ፖለቲካዊ ዕድገት ላይ የራሳቸውን አሻራ ያሳረፉት የሀገራችን ሙስሊሞች፣ በሃይማኖታቸው ሳቢያ የተለያዩ ማኅበራዊ፣ ኢኮኖሚያዊ፣ ፖለቲካዊ እና የዜግነት መብቶቻቸውን ተነፍገው ይኖሩ ነበር፡፡

በተለይ ከ20ኛው መቶ ክፍለ ዘመን የመጀመሪያው ሩብ መጨረሻ ጀምሮ፣ ሙስሊም ኢትዮጵያዊያን ሀገራችን ብለው በሚኖሩባት ሀገራቸው በማንነታቸው ተገፍተው፣ የዜግነት ክብር ተነፍገው፣ እንደ ሁለተኛ ዜጋ እየታዩ ይኖሩ ነበር፡፡ የታሪክ ምሁራን ሰሎሞናዊ በማለት የሚጠሩት ሥርወ መንግሥት ዘመን፣ ለኢትዮጵያውያን ሙስሊሞች በገዛ ሀገራቸው እንደ ባይተዋር ይታዩ የነበረበት የጨለማ ዘመን ነበር፡፡

ቀደምት ሙስሊም አባቶቻችን ከ1920ዎቹ አጋማሽ ጀምሮ ባሉት ረጅም ዓመታት፣ እንደ አንድ የሃይማኖት ማኅበረሰብ ተሰባስቦ ለመደራጀት፣ ሃይማኖታዊ ጉዳዮቻቸውን በተመለከተ ኃላፊነት ወስዶ የሚሠራ የጋራ ተቋም ለመመሥረት እልህ አስጨራሽ ትግሎችን አካሂደዋል፡፡ በገዛ ሀገራቸው እንደ ባዕድ እና ከዚያም አልፎ እንደ ጠላት እየታዩ፣ ከባድ የስነ ልቦና ጫናዎችን ተቋቁመው አሳልፈዋል፡፡ በተለይ ከ1966 ጥቂት ቀደም ብሎ፣ በ1964 አንዋር መስጂድን ማዕከል አድርጎ በተመሠረተው የሙስሊም ወጣቶች ክበብ አሥተባባሪነት፣ በአዲስ አበባ ሙስሊሙ ስለ ሃይማኖቱ እና ስለ ዜግነት መብቶቹ እንዲያውቅ ለማድረግ የተደረገው መጠነ ሰፊ ንቅናቄ፣ በአብዮቱ ፍንዳታ ማግሥት፣ አጠቃላይ የሕዝበ ሙስሊሙ ጥያቄዎች በይፋ ለመንግሥት እንዲቀርቡ መንገድ የጠረገ ነበር፡፡

በሚያዝያ 1 ቀን 1966 በአዲስ አበባ ነዋሪ የኾኑ የኢትዮጵያውያን ሙስሊሞች ተወካዮች ለወቅቱ ጠቅላይ ሚኒስትር እንዳልካቸው መኮንን በቁጥር 13 ጥያቄዎችን አቀረቡ፡፡ እነዚህም ጥያቄዎች የሚከተሉት ነበሩ፡

1ኛ. “መንግሥት ለእስልምና ሃይማኖት ድጋፍ የሚሰጥ መኾኑን በሕገ መንግሥት እንዲያሰፍርና፣ በተግባርም እንዲያውል፡፡”
[ይህ ጥያቄ ዛሬ ላይ ኾነው ሲሰሙት ግር ሊል ይችላል፡፡ ነገር ግን፣ በዚያ ዘመን የኢትዮጵያ ኦርቶዶክስ ተዋህዶ ቤተ ክርስቲያን በሲሦ መንግሥትነት የሀገሪቱ ሀብት ባለ ድርሻ የነበረች ሲኾን፣ ሙስሊም ኢትዮጵያውያን ግን ከሀገሪቱ ሀብት ምንም ድርሻ ያልነበራቸው ከመኾኑ የመነጨ ጥያቄ ነበር፡፡]

2ኛ. "ኢትዮጵያውያን ሙስሊሞች የሃይማኖት አሥተዳደር ማኅበር፣ ወይም ተቋም እንድንመሠርት በመንግሥት ይፈቀድልን፡፡››
[ይህ ጥያቄ፣ ንጉሣዊው አገዛዝ ከወደቀና በደርግ ከተተካ ከሁለት ዓመታት በኋላ በ1968 ነው ምላሽ ያገኘው፡፡]

3. ‹‹የሸሪኣ ፍርድ ቤቶች ያለ ምንም ተጽዕኖ ነፃ ኾነው እንዲቋቋሙና ከመንግሥት በጀት እንዲመደብላቸው፣ ይህም በሚሻሻለው ሕገ መንግሥት እንዲካተት፣ የሚል ነበር፡፡
[ይህ ጥያቄ የአቶ እንዳልካቸው መኮንን ካቢኔ አዲስ ሕገ መንግሥት የሚያረቅቅ ኮሚሽን አቋቁመው የነበረ መኾኑን ታሳቢ በማድረግ የቀረበ ነበር፡፡]

4. "የሙስሊም ሃይማኖታዊ በዓላት መንግሥታዊ እውቅና አግኝተው በብሔራዊ ደረጃ ይከበሩ" የሚል ነበር፡፡
[ይህ ጥያቄ ምላሽ ያገኘው፣ ንጉሣዊው አገዛዝ ተወግዶ፣ ደርግ ሥልጣን ላይ ከወጣ በኋላ፣ በታሕሣሥ ወር 1967 ለመጀመሪያ ጊዜ ዒድ አል አድኃ አረፋ ብሔራዊ በዓል ኾኖ እንደሚውል በበዓሉ ዋዜማ ታሕሣሥ 14 ቀን 1967 በይፋ ከተነገረ በኋላ ነው፡፡ ኋላ በዓላትን የሚመለከት አዋጅ ሲወጣ፣ ሁለቱ ዒዶች እና የነቢዩ ሙሐመድ (ሶ.ዐ.ወ) ልደት (መውሊድ) ብሔራዊ በዓላት ኾነው ታወጁ፡፡]

5. "የሙስሊም ወጣት ወንዶች እና የሙስሊም ወጣት ሴቶች ማኅበራት በአዋጅ እውቅና ተሰጥቷቸው ይቋቋሙ፤"
[ይህም የኢትዮጵያ ሙስሊሞች የዘመናት ጥያቄ አካል ኾኖ ነው የቀረበው፡፡ ንጉሣዊው አገዛዝ በአጠቃላይ ሙስሊሞችንና በሙስሊሞች የሚቋቋሙ ማኅበራትን ሁልጊዜም በጥርጣሬ ይመለከት ስለነበር፣ ወጣት ወንዶችና ወጣት ሴቶች ምንም ዓይነት ማኅበር የማቋቋም የዜግነት መብት አልነበራቸውም፡፡]

6. "ኢትዮጵያውያን ሙስሊሞች የመሬት ባለቤት የመኾን መብታቸው ይከበር።"

7. ‹‹'አገር የጋራ ነው፣ ሃይማኖት የግል ነው› የሚለው አባባል በተግባር ይተርጎም›› የሚል ነበር፡፡
[በዘመኑ ይህ አባባል አልፎ አልፎ በንጉሡም ጭምር ይባል የነበረ ቢኾንም፣ በተግባር ግን ኢትዮጵያውያን ሙስሊሞች የርስት መሬት ባለቤት እንዳይኾኑ መከልከላቸው፣ ሀገር የጋራ ነው የሚለው አባባል የይስሙላ እንደነበር የሚያረጋግጥ ነበር፡፡]

8. ኢትዮጵያውያን ሙስሊሞች በመንግሥት አሥተዳደር በፍትኅ፣ በዲፕሎማቲክ፣ በውትድርና እና በሲቪል አገልግሎት ውስጥ ያለምንም ገደብ እንዲሳተፉ እንዲፈቀድ፣
[በዘመኑ ሙስሊሞች ለላንቲካ ካልኾነ በስተቀር፣ በመንግሥት አሥተዳደር ውስጥ የነበራቸው ውክልና በእጅጉ የተገደበ ነበር፡፡ በፖሊስ እና በሕዝብ ደኅንነት፣ እንዲሁም በጦር ሠራዊት ውስጥ ሙሉ በሙሉ ከሚባል ገደብ አንስቶ፣ እስከተወሰነ እርከን ብቻ የሚሳተፉበት ሁኔታ ነው የነበረው፡፡]

9. መንግሥት ሙስሊም ሚስዮናውያን /የሃይማኖት ምሁራን/ ወደ ኢትዮጵያ እንዲገቡ ይፍቀድ፡፡
[በንጉሡ ዘመን፣ ሙስሊም ኢትዮጵያውያን የሃይማኖት እውቀት እንዳያገኙ ጥብቅ ገደብ ይደረግ ነበር፡፡ እንኳንስ የውጭ ሀገር ሃይማኖት ሰባኪ ሚስዮናውያን ይቅርና እስላማዊ የሃይማኖት መጻሕፍት እንኳ ከሙስሊሙ ዓለም ወደ ኢትዮጵያ እንዳይገቡ ጥብቅ ቁጥጥር ይደረግ ነበር፡፡]

10. የእስልምና ትምህርት በብሔራዊ የመገናኛ ተቋማት በሬዲዮና በቴሌቪዥን ይሰጥ፡፡
[በጊዜው የኢትዮጵያ ኦርቶዶክስ ሃይማኖት በብሔራዊ ሬዲዮና ቴሌቪዥን ይጠቀም የነበረ ሲኾን፣ ሌሎች ሃይማኖቶችም፣ ለምሳሌ ወንጌላውያን ብሥራተ ወንጌል የሚባል የራሳቸው የራዲዮ ማሰራጫ ጣቢያ ነበራቸው፡፡ ይህ ግን ለሙስሊሞች የተፈቀደ አልነበረም፡፡]

11. ‹በኢትዮጵያ የሚኖሩ ሙስሊሞች› የሚለው መጠሪያ፣ "ኢትዮጵያውያን ሙስሊሞች" በሚል ይታረም፡፡

12. በሁሉም ትምህርት ቤቶች የእስልምና ትምህርት እንዲሰጥ፣

13. መንግሥት የመስጊዶችን ግንባታ እንዲፈቅድና ለግንባታው የሚያስፈልጉ ቁሳቁሶችም ከቀረጥ ነጻ ወደ ሀገር ውስጥ እንዲገቡ እንዲፈቅድ፤›› …… የሚሉ ነበሩ፡፡
እነዚህን ጥያቄዎች ሚያዝያ 1 ቀን 1966 ለእንዳልካቸው መኮንን ያቀረቡት ሙስሊሞች፣ አዎንታዊ ምላሽ ስላላገኙ ነበር ታላቁ ሰላማዊ ሰልፍ ለሚያዝያ 12 እንዲካሄድ የተጠራው፡፡ እነዚህ አሥራ ሦስት የሕዝበ ሙስሊሙ ጥያቄዎች፣ ንጉሡ ከዙፋናቸው እስከሚወርዱ ድረስ ምላሽ ሳያገኙ ነበር የቆዩት፡፡ ንጉሣዊው አገዛዝ በይፋ ከሥልጣን ከተወገደበት ከመስከረም 2 ቀን 1966 ጀምሮ ያለፉት 50 ዓመታት፣ የኢትዮጵያውያን ሙስሊሞች የዜግነት መብቶች፣ በተለያዩ የጊዜ እርከኖች ደረጃ በደረጃ ምላሽ እያገኙ ዛሬ የምንገኝበት ደረጃ ላይ ለመድረስ ችለናል፡፡

በአዲስ አበባ ሚያዝያ 12፣ 1966 የተካሄደውን ታላቁን የሙስሊሞች ደማቅና ታሪካዊ ሰልፍ 50ኛ ዓመት ስንዘክር፣ የኢትዮጵያውያን ሙስሊሞችን የእኩልነት እና የፍትኅ ጥያቄዎች ለማስከበር፣ እንዲሁም የዜግነት ክብራቸውን ለማረጋገጥ በጽናት የታገሉ በሕይወት ያሉ እና በሕይወት የሌሉ ቀደምት አባቶቻችንን እጅግ በታላቅ ክብር እናስባቸዋለን፤ በእጅጉም እናመሠግናቸዋለን፡፡

ዛሬ ዘመናትን ባስቆጠረ ከፍተኛ ትግልና መስዋዕትነት የተገኙ የዜግነት መብቶቻችንን ስናጣጥም፣ ከሌሎች ሃይማኖቶት ተከታይ ወገኖቻችን ጋር በመከባበርና በመተሳሰብ ለጋራ ሀገር ግንባታ በጽናት የመቆም ኃላፊነታችንን ፈጽሞ አንዘነጋም፡፡ መብቶቻችን በጽኑ ትግልና በመስዋዕትነት የተገኙ እንደመኾናቸው፣ በታላቅ የኃላፊነት ስሜት እንንከባከባቸዋለን እንጂ፣ ከቶውንም የቀደምት አባቶቻችንን ውለታ በሚያበላሽ ኃላፊነት የጎደለው ተግባር ላይ ስንዳክር አንገኝም፡፡ የሃይማኖታችንን እሴቶች ባከበረ መልኩ፣ ለሀገራችን ዕድገት እና ለመላው ሕዝባችን ሰላም የሚጠበቅብንን ሁሉ ኃላፊነት ለመወጣት ዝግጁ መኾናችንን በዚሁ አጋጣሚ ለማረጋገጥ እንወድዳለን፡፡

አላህ ሀገራችንን ሰላም ያድርግልን፡፡
የኢትዮጵያ እስልምና ጉዳዮች ጠቅላይ ምክር ቤት
ሚያዝያ 12፣ 2016 ዓ.ል
አዲስ አበባ፡፡

*****
ሸዋል 11፣ 1445 ዓ.ሂ.
*****​
የኢት/እ/ጉ/ጠ ምክር ቤት ሕዝብ ግንኙነት።
ይከታተሉን | Follow us፡
ፌስቡክ | Ethiopian Islamic Affairs Supreme Council
ቴሌግራም | t.me/eiasc1
ትዊተር | https://x.com/eiasc1

بِسْمِ ٱللَّهِ ٱلرَّحْمَٰنِ ٱلرَّحِيمِ

የአፋር እና የሶማሊ ክልላዊ መንግሥታት ለሰላም ስምምነቱ ዘላቂነት ኃላፊነታቸውን እንዲወጡ ጥሪ ቀረበ።

ሚያዝያ 12፣ 2016 (አዲስ አበባ) - በኢትዮጵያ እስልምና ጉዳዮች ጠቅላይ ምክር ቤት ፕሬዚደንት ክቡር ሸይኽ ሐጂ ኢብራሂም አደራዳሪነት፣ በአፋርና በሶማሊ ወንድማማች ሕዝቦች መካከል የተደረሰው የተኩስ አቁም ስምምነት ዘላቂ እንዲኾን የሁለቱም ክልሎች መንግሥታት ኃላፊነታቸውን እንዲወጡ ጥሪ ቀረበ።

ይህ ጥሪ የቀረበው በትናንትናው ዕለት በአፋርና በሶማሊ ክልል ሕዝቦች መካከል የተደረሰውን ስምምነት አስመልክቶ ዛሬ በጠቅላይ ምክር ቤቱ አዳራሽ በተሰጠ መግለጫ ላይ ነው።

በአፋርና በሶማሊ ክልል ወንድማማች ሕዝቦች መካከል ለበርካታ አሠርት ዓመታት አረብቦ የነበረውን የሰላም እጦት ለመፍታት የኢትዮጵያ እስልምና ጉዳዮች ጠቅላይ ምክር ቤት በክቡር ፕሬዚደንቱ ብልኅ አመራር ሰጪነት ውጤታማ ሥራ መሠራቱ በመግለጫው ላይ ተነግሯል።

የጠቅላይ ምክር ቤቱ ተቀዳሚ ምክትል ፕሬዚደንት ሼይኽ አብዱልከሪም ሼይኽ በድረዲን በሁለቱ ወንድማማች ሕዝቦች መካከል የነበረውን የሰላም እጦት ችግር ለመፍታት ከሁለቱም ክልሎች የተውጣጡ የሀገር ሽማግሌዎችን ለበርካታ ወራት ሲያወያዩ መቆየታቸውን አስታውሰዋል።

ትላንት ሚያዚያ 11፣ 2016 በአል-ነሀሪ ሆቴል በአፋርና በኢሳ ማኅበረሰቦች መካከል የነበረውን የወንድማማቾች ደም መፋሰስ ለማስቆም ሲደረግ የነበረው የሁለትዮሽ ስምምነት በውጤት መጠናቀቁን ተቀዳሚ ፕሬዚደንቱ ጠቅሰው፣ ይህ የተኩስ አቁም ስምምነት ውጤታማ እንዲሆን የሁለቱ ክልል መንግሥታት ኃላፊነት ከፍተኛ መሆኑን ተናግረዋል።

የኢትዮጵያ እስልምና ጉዳዮች ጠቅላይ ምክር ቤት የፕሬዚደንቱ ልዩ አማካሪ ዑስታዝ አቡበከር አሕመድ በበኩላቸው፣ በሁለቱ ወንድማማች ሕዝቦች መካከል የነበረው ደም መፋሰስ በምሥራቅ አፍሪካ ረጅም ዘመን ያስቆጠረ መሆኑን አስታውሰዋል።

ይህን አላስፈላጊ ደም መፋሰስ ለማስቆም በተደረገው ተከታታይ ጥረት ውስጥ የሁለቱ ክልሎች ታዋቂ የማኅበረሰብ መሪዎች፣ የእስልምና ጉዳይ ከፍተኛ ምክር ቤቶች፣ የክልሎቹ መንግሥታት የሥራ ኃላፊዎችና ዓሊሞች ሰፊ ተሳትፎ እንደነበራቸው ዑስታዝ አቡበከር ተናግረዋል።

በእስልምና አስተምህሮ የአንድን ሰው ሕይወት ማዳን ዓለምን ማዳን መሆኑን የተናገሩት ዑስታዝ አቡበከር፣ በመነጋገር ችግሮችን የመፍታት አካሄድ የሰላም ችግር ባሉባቸው በሌሎችም የሀገራችን ክልሎች ሁሉ ሊተገበር ይገባል ብለዋል።

በአፋርና በኢሳ ሕዝቦች መካከል የተደረሰው የሰላም ስምምነት ቀጣይ ሥራን በሚመለከት በሚቀጥለው ሳምንት ጠቅላይ ምክር ቤቱ አቅጣጫ እንደሚያስቀምጥ ዑስታዝ አቡበከር ተናግረዋል።

ሰላምን ማስከበር የመንግሥት ኃላፊነት በመኾኑ፣ የፌደራልና የክልል መንግሥታት ለተደረሰው የሰላም ስምምነት ፍሬያማነት የበኩላቸውን ኃላፊነት እንዲወጡ ዑስታዝ አቡበከር ጥሪያቸውን አቅርበዋል።

​*****
ሸዋል 11፣ 1445 ዓ.ሂ.
*****​
የኢት/እ/ጉ/ጠ ምክር ቤት ሕዝብ ግንኙነት።
ይከታተሉን | Follow us፡
ፌስቡክ | Ethiopian Islamic Affairs Supreme Council
ቴሌግራም | t.me/eiasc1
ትዊተር | https://x.com/eiasc1

بِسْمِ ٱللَّهِ ٱلرَّحْمَٰنِ ٱلرَّحِيمِ
•••••••••••••••••••••••••••••••••••••••••••••
የሐጅ ቪዛ ሳይይዙ ሐጅ ማድረግ እንደማይቻል የሳዑዲ የሐጅ ሚኒስቴር አስጠነቀቀ።
•••••••••••••••••••••••••••••••••••••••••••••

ሚያዝያ 21፣ 2016 (አዲስ አበባ) - የሳዑዲ አረቢያ የሐጅ እና ዑምራ ሚኒስቴር፣ የሐጅ ቪዛ ሳይይዙ ሐጅ ማድረግ እንደማይቻል በመግለጽ ዘንድሮ ሐጅ የማድረግ ኒያ ያላቸው ምዕመናን "ሐጅ እናስደርጋለን" በሚሉ የግል ኩባንያዎች እንዳይታለሉ በጥብቅ አስጠነቀቀ።

ሚኒስቴሩ ይህን ማስጠንቀቂያ ይፋ ያደረገው፣ በተለያዩ ሀገራት በማኅበራዊ ትስስር አውታሮች የሐጅ ቪዛ እንሰጣለን የሚሉ ሐሰተኛ ኩባንያዎች በስፋት የሚያሰራጩት ማስታወቂያ መበራከቱን ከተመለከተ በኋላ መኾኑን በመግለጫው ጠቅሷል።

ሐጅ ለማድረግ ሳዑዲ አረቢያ ከመገባቱ በፊት የሐጅ ቪዛ ማግኘት የግድ አስፈላጊ መኾኑን የጠቀሰው ሚኒስቴሩ፣ በጉብኝት ቪዛ፣ በሥራ ቪዛ፣ በቱሪስት ቪዛ፣ በትራንዚት እና በመሳሰሉት ቪዛዎች ሳዑዲ አረቢያ በመግባት ሐጅ ማድረግ እንደማይቻል አሳስቧል።

ሚኒስቴሩ አክሎም፣ ሐጅ ማድረግ የሚቻለው ጉዳዩ የሚመለከተው የሳዑዲ አረቢያ ሚኒስቴር በየሀገራቱ የሐጅና ዑምራ ጉዳይ ከሚመለከታቸው ተቋማት ጋር በመተባበር በሚሰጠው የሐጅ ቪዛ እና፣ እነዚህ ተቋማት በሌሉባቸው ሀገራት ደግሞ "ኑሱክ ሐጅ" በሚሰኘው ፕላትፎርም አማካይነት ብቻ መኾኑን መረዳት ያስፈልጋል ብሏል።

ሐጅ ለማድረግ፣ ሳዑዲ አረቢያ ከመገባቱ በፊት ራሱን የቻለ የሐጅ ቪዛ ማግኘት የግድ አስፈላጊ እንደኾነ የጠቀሰው የሚኒስቴሩ መግለጫ፣ ከሳዑዲ የሐጅና ዑምራ ሚኒስቴር ጋር ግንኙነት ካላቸው የየሀገራቱ የሐጅና ዑምራ ተቋማት ውጪ የሐጅ ቪዛን ማግኘት እንደማይቻል በመግለጽ ምዕመናን ከመታለል እንዲጠነቀቁ አሳስቧል።

"ሐጅ እናስደርጋለን" በሚሉ አጭበርባሪ ኩባንያዎች መታለል ከሚያስከትለው የገንዘብ ኪሳራ በተጨማሪ፣ የጓጉለትን ሐጅ ለማድረግ አለመቻልን በማስከተል ከባድ ሐዘን ላይ ሊጥል እንደሚችል ሚኒስቴሩ አሳስቧል።

*
ሸዋል 20፣ 1445 ዓ.ሂ.
*​
የኢት/እ/ጉ/ጠ ምክር ቤት ሕዝብ ግንኙነት።
ይከታተሉን | Follow us፡
ፌስቡክ | Ethiopian Islamic Affairs Supreme Council
ቴሌግራም | t.me/eiasc1
ትዊተር | https://x.com/eiasc1

بِسْمِ ٱللَّهِ ٱلرَّحْمَٰنِ ٱلرَّحِيمِ

የጠቅላይ ምክር ቤቱ ፕሬዚደንት የ"ጽዱ ጎዳና - ኑሮ በጤና" ንቅናቄን ተቀላቀሉ።

ሚያዚያ 22፣ 2016 (አዲስ አበባ) - የኢትዮጵያ እስልምና ጉዳዮች ጠቅላይ ምክር ቤት ፕሬዚደንት የክብር ዶክተር ሼይኽ ሐጂ ኢብራሂም ቱፋ የ"ጽዱ ጎዳና - ኑሮ በጤና" ንቅናቄን ተቀላቀሉ።

ፕሬዚደንቱ ሼይኽ ሐጂ ኢብራሂም በግላቸው ለንቅናቄው የሚውል ብር 10,000.00 (አሥር ሺህ ብር) ለንቅናቄው በተከፈተ የሂሳብ ቁጥር ገቢ አድርገዋል።

****
ሸዋል 21፣ 1445 ዓ.ሂ.
*​***
የኢት/እ/ጉ/ጠ ምክር ቤት ሕዝብ ግንኙነት።
ይከታተሉን | Follow us፡
ፌስቡክ | Ethiopian Islamic Affairs Supreme Council
ቴሌግራም | t.me/eiasc1
ትዊተር | https://x.com/eiasc1

بِسْمِ ٱللَّهِ ٱلرَّحْمَٰنِ ٱلرَّحِيمِ

ለ1445 የአሏህ እንግዶች የአሠልጣኞች ሥልጠና ተሰጠ።

ሚያዚያ 27፣ 2016 (አዲስ አ በባ) - የኢትዮጵያ እስልምና ጉዳዮች ጠቅላይ ምክር ቤት "የዘመነ መስተንግዶ ለአርረሕማን እንግዶች" በሚል መሪ ቃል ለ1445 ዓ.ሒ (2016 ዓ.ል) የሐጅ ተጓዦች በጠቅላይ ምክር ቤቱ አዳራሽ የአሠልጣኞች ሥልጠና መስጠት ጀመረ።

ሥልጠናውን በንግግር የከፈቱት የጠቅላይ ምክር ቤቱ የሐጅና ዑምራ ዘርፍ ኃላፊ አብዱልፈታህ መሐመድ ናስር በዘንድሮ የሐጅ ጉዞ የሑጃጁን ክብር የጠበቀና ከወትሮ የተለየ ለማድረግ ምክር ቤቱ የቅድመ ዝግጅት ተግባራት ሲያከናውን መቆየቱን ተናግረዋል።

የ1445 ዓ.ሒ. የሐጅ ጉዞ ከሁለት ሳምንት በኋላ እንደሚጀምር የተናገሩት ኃላፊው የአላህ እንግዶች በጉዞ ወቅት በሐገር ዉስጥና በሳዑዲ እርስ በርሳቸው እንዲረዳዱ እና እንዲደጋገፉ አሳስበዋል።

ሑጃጁ የበረራ ጊዜውን እንዲያውቅ ምክር ቤቱ የመረጃ መስጪያ ቁጥር 9933 የከፈተ ሲኾን፣ ከምክር ቤቱ ለሑጃጁ ወቅታዊ መረጃ በEtho Hajj አጭር መልዕክት ማስተላለፊያ እየላከ በመኾኑ ሑጃጁ እንዲከታተል ጥሪ አቅርበዋል።

የሐጅ ጉዞ ቀጥታ ወደ መዲና መኾኑን የተናገሩት ኃላፊዉ ሑጃጁ የሚጓዝበትን የበረራ ቀን እና በመዲና የሚያርፍበትን ሆቴል ከወዲሁ እንዲያውቅ ጠቅላይ ምክር ቤቱ በተለያዩ የመልዕክት ማስተላለፊያ ዘዴዎች እንደሚያሳውቅ ተናግረዋል።

አብዛኛው የሐገራችን ሑጃጅ ከገጠሪቱ የሀገራችን ክፍሎች የሚመጡ በመሆኑ ለሐጅ ሲመዘገቡ በሰጡት የስልክ ቁጥር ሳዑዲ ሆነው ከቤተሰቦቻቸው ጋር መገናኘት እንዲችሉ ጠቅላይ ምክር ቤቱ የቅድመ ዝግጅት ሥራ ማጠናቀቁን ኃላፊው ተናግረዋል።

በዛሬው የአሠልጣኞች ሥልጠና ላይ የተሳተፉት ከመቀሌ፣ ከወራቤ፣ ከአዲስ አበባ፣ ከአዳማ እና ከፉሪ የምዝገባ ጣቢያዎች የተመረጡ ሠልጣኞች ናቸው።
****
ሸዋል 26፣ 1445 ዓ.ሂ.
*​**
የኢት/እ/ጉ/ጠ ምክር ቤት ሕዝብ ግንኙነት።
ይከታተሉን | Follow us፡
ፌስቡክ | Ethiopian Islamic Affairs Supreme Council
ቴሌግራም | t.me/eiasc1
ትዊተር | https://x.com/eiasc1

بِسْمِ ٱللَّهِ ٱلرَّحْمَٰنِ ٱلرَّحِيمِ

ጠቅላይ ምክር ቤቱ በ2016 ግማሽ ዓመት ስላከናወናቸው ተግባራት ለባለድርሻዎች ገለፃ አደረገ። ተቋሙንም አስጎበኘ።

ሚያዝያ 26፣ 2016 (አዲስ አበባ) - የኢትዮጵያ እስልምና ጉዳዮች ጠቅላይ ምክር ቤት በ2016 ባከናወናቸው ተግባራት ዙርያ በዛሬው ዕለት ለተለያዩ ባለድርሻ አካላት ገለጻ አደረገ።

ምክር ቤቱ በተጨማሪም፣ ተቋሙን ለማጠናከር የተሠሩና በመሠራት ላይ የሚገኙ ተግባራዊ ሥራዎችንም አስጎብኝቷል።

የዓሊሞች ጉባዔ ሥራ አስፈጻሚ አባላት፣ ዳዒዎች፣ የጠቅላይ ምክር ቤቱ ሥራ አስፈጻሚዎች እና ዳይሬክተሮች፣ የተለያዩ ሚዲያ ኃላፊዎች፣ የሴቶችና ወጣቶች ተወካዮች፣ የማኅበረሰብ አንቂዎች እና ሌሎች ጥሪ የተደረገላቸው ባለድርሻዎች የምክር ቤቱን ገለጻ ታድመዋል።

በገለጻው ላይ የተገኙት የጠቅላይ ምክር ቤቱ ተቀዳሚ ምክትል ፕሬዚደንት ሸይኽ አብዱልከሪም ሸይኽ በድረዲን፣ ምክትል ፕሬዚደንቱ ሸይኽ አብዱልአዚዝ አብዱል ወሊ የለውጡ አመራር የሰራቸውን ስራ ለባለድረሻ አካለት ማብራራቱና ማሳየቱ ግልፅነትና አብሮነትን የሚያሳይ አካሄድ መሆኑን ገልጸዋል።

የጠቅላይ ምክር ቤቱ ዋና ሥራ አስኪያጅ ሐጂ ከማል ሐሩን በአዲሱ የጠቅላይ ምክር ቤቱ አመራር በግማሽ ዓመት ውስጥ ስላከናወናቸው ተግባራት ና ስለ ገጠማቸው ተግዳሮት ለታዳሚው ሰፋ ያለ ገለጻ አደርገዋል።

የሐጅና ኡምራ ዘርፍ ኃላፊውም ሐጅ አብዱልፈታህ ሙሐመድ በበኩላቸው በሐጅና ዑምራ ዘርፍ ያለውን ችግር ለመቅረፍ ቀልጣፋና ምቹ ሁኔታ ለመፍጠር ጠቅላይ ምክር ቤቱ የተጓዘበትን እርቀት አብራርተዋል።

በምክር ቤቱ የመሰብሰቢያ አዳራሽ ከኃላፊዎቹ ለባለድርሻዎች የተደረገው ገለጻ በአመዛኙ ጠቅላይ ምክር ቤቱ በ2016 የመጀመሪያዎቹ ስድስት ወራት በሠራቸው ዐበይት ሥራዎች ላይ ያተኮረ ነው።

በገለጻው ላይ፣ በምክር ቤቱ ባለፉት ስድስት ወራት ከተሠሩ ዐበይት ሥራዎች መካከል፣ ሕገ መጅሊሱ እንዲፀድቅ መደረጉ እና በተለያዩ ክልሎች የሕዝበ ሙስሊሙን አንድነት ለመጠበቅ የተሠሩ ሥራዎች ተጠቅሰዋል።

በአደረጃጀት ረገድ የክልል መጅሊሶች መዋቅር ከክልል እስከ መስጂድ እንዲወርድ መደረጉ የተገለፀ ሲኾን፣ በመጅሊሱ የአምስት ዓመት ስትራቴጂያዊ ዕቅድ ዙርያ ከተለያዩ ባለሙያዎች ጋር ውይይት መካሄዱ ተነግሯል።

የመጅሊስ ምርጫን አስመልክቶ የምርጫ ሕግ ተረቅቆ ለሥራ አስፈፃሚው አካል መቅረቡ የተነገረ ሲኾን፣ የሸሪዓ ፍርድ ቤት አዋጅ እንዲሻሻል የተለያዩ ሥራዎች መሠራታቸውም ተጠቅሷል።

የሐጅ መስተንግዶን ለማዘመን በርካታ ሥራዎች መሠራታቸው የተጠቀሰ ሲኾን፣ ከእነዚህም መካከል፣

- ካለፈው ዓመት ልምድ በመውሰድ፣ 18 ብቻ የነበሩትን የሐጅ ምዝገባ ጣቢያዎች ወደ 30 ማሳደግ መቻሉን፣ 116 ያህል ሠራተኞች በመቅጠር ሰፊ የሐጅ መስተንግዶ ሥራዎች መሰራታቸው ተገልጿል።

በዚህም መሠረት በዘንድሮው ሐጅ ከ12 ሺህ በላይ ሑጃጆች ተመዝግበ የሐጅ ቪዛቸውን እየጠበቁ እንደሚገኙ ተነግሯል።

የተለያዩ የሐጅ ንዑሳን ኮሚቴዎችን በማቋቋም ሰፋፊ ሥራዎች መሠራተቸውም ተጠቅሷል።

ሑጃጆች ከጉዞ እስከሚመለሱ ድረስ አስፈላጊውን አገልግሎት እንዲያገኙ የሚያስችል ሥርዓት መዘርጋቱና ዶላርን በተመለከተም ከተለያዩ ባንኮች ጋር ስምምነት መደረጉ ተነግሯል።

የምክር ቤቱን የፋይናንስ አጠቃቀም በተመለከተ፣ ጠቅላይ ምክር ቤቱ ለመጀመሪያ ጊዜ በውጭ ኦዲተር የሒሳብ ምርመራ (ኦዲት) ማስደረጉ ተጠቅሷል።

በጠቅላይ ምክር ቤቱ ስር የሚገኘው የኢትዮጵያ ሙስሊሞች የልማት ኤጀንሲን በአዲስ መልክ ለማንቀሳቀስ፣ ምክር ቤቱ በኤጀንሲው ለሚካሄዱ የልማት ተግባራት የስድስት ሚሊየን ብር በጀት መመደቡ ተነግሯል።

የምክር ቤቱን የተሽከርካሪ ፍላጎት ለማሟላት ለ9 ነባር ተሽከርካሪዎችን ጥገና በማስደረግ ወደሥራ ማስገባት እንደታቻለና በተጨማሪም የአምስት አዳዲስ ተሽከርካሪዎች ግዢ እንደተፈፀመ ተነግሯል።

የኡለማ ጉባዔ አደረጃጀትን ከማጠናከር አኳያ፣ እስካሁን ከትግራይ በስተቀር በሁሉም ክልሎች የኡለማ ጉባኤ እንዲደራጅ የተደረገ ሲኾን፣ የትግራይ የኡለማ ምክር ቤት ምሥረታ በሂደት ላይ መሆኑ ተጠቅሷል።

በዚሁ የስድስት ወር ጊዜ ከተካሄዱ ተግባራት አንዱ የኡለማዎች ጉባኤ መካሄዱ ተጠቅሷል። በግዮን ሆቴል በተካሄደው የኡለማ ጉባዔ ላይ ከ15 ያላነሱ ጥናታዊ ጽሑፎች መቅረባቸውና፣ በተለያዩ ጥያቄዎች ላይ ፈትዋዎች መሰጠታቸው ተወስቷል።

በተጨማሪም፣ ለየክልሉ እስልምና ጉዳዮች አመራሮች በጠቅላይ ምክር ቤቱ አማካይነት የተለያዩ የአቅም ግንባታ ሥልጠናዎች መሰጠታቸው ተነግሯል።

ባለፉት አንድ ዓመት ከስድስት ወራት ውስጥ ለክልል የእስልምና ጉዳይ ምክር ቤቶች ከ60 ሚሊየን ብር በላይ ድጋፍ መደረጉም ተነግሯል።

የጠቅላይ ምክር ቤቱን የውጭ ግንኙነት በተመለከተ፣ በርካታ ሥራዎች መሠራታቸውን እና የጠቅላይ ምክር ቤቱ ፕሬዚደንት ክቡር ሸይኽ ሐጂ ኢብራሂም ቱፋ በተለያዩ ዓለም አቀፍ መድረኮች ላይ ተጋብዘው በንቃት መሳተፋቸው ተወስቷል።

ገለጻው ላይ የታደሙ ጋዜጠኞች በሙስሊሙ ላይ የሚደርሱ የተለያዩ በደሎችን የተመለከቱ ጥያቄዎች የተነሱ ሲኾን፣ የጠቅላይ ምክር ቤቱ ሥራ አስኪያጅ ለቀረቡት ጥያቄዎች ምላሽ እና ማብራሪያ ሰጥተዋል።

በሙስሊሙ ማኅበረሰብ የሚነሱ የተለያዩ ማኅበረሰብ ተኮር ጥያቄዎችን ምክር ቤቱ አግባብ ላላቸው የመንግሥት አካላት ማቅረቡን ተናግረዋል።

ከገለጻው በኋላም፣ ባለድርሻዎች የምክር ቤቱን ተቋማዊ ቁመና ለማሳደግ በተለያዩ ዘርፎች የተሠሩ እና በመሠራት ላይ የሚገኙ ሥራዎችን እየተዘዋወሩ ጎብኝተዋል።

****
ሸዋል 20፣ 1445 ዓ.ሂ.
****
የኢ.እ.ጉ.ጠ. ም/ቤት ሕዝብ ግንኙነት
ይከታተሉን | Follow us፡
ፌስቡክ | Ethiopian Islamic Affairs Supreme Council
ቴሌግራም | t.me/eiasc1
ትዊተር | https://x.com/eias

የሃጅ ቪዛ የተሰራላችሁ ሃጃጆች በዚህ ሊንክ የፓስፖርት ቁጥር እና ስም በማስገባት የቪዛ ኮፒ ማውረድ ትችላላችሁ።
https://visa.mofa.gov.sa/visaservices/searchvisa