“Zakovat” intellektual olimpiadasi g‘oliblariga 4,5 mlrd so‘m Prezident sovg‘asi sifatida topshirildi

Oliy ta’lim muassasalari o‘rtasida o‘tkazilgan “Zakovat” intellektual olimpiadasi yakunlandi. Tadbir Milliy mass-mediani qo‘llab-quvvatlash va rivojlantirish jamoat fondi, “Zakovat” intellektual klubi, Yoshlar ishlari agentligi hamda Oliy ta’lim, fan va innovatsiyalar vazirligi hamkorligida o‘tkazildi.

Intellektual olimpiadada respublika bo‘yicha 132 ta OTMdan 1056 nafar talaba ishtirok etdi. Hududiy bosqichlar natijasiga ko‘ra, 50 ta OTM va 550 nafar talaba finalga yo‘l oldi.

15-18-dekabr kunlari talabalar “Zakovat”, “Breyin-ring”, “Erudit-kvartet”, shaxsiy o‘yin, shaxmat va shashka yo‘nalishlarida bellashdi.

Musobaqaning jami sovrin jamg‘armasi 5,4 mlrd so‘mni tashkil etdi. Shundan 4,5 mlrd so‘m musobaqada umumjamoa hisobida kuchli uchlikka kirgan OTMlarga Prezident sovg‘asi sifatida topshiriladi.

18-dekabr kuni bo‘lib o‘tgan yopilish marosimida musobaqaning barcha g‘olib va sovrindorlari taqdirlandi.

Shuningdek, umumjamoa hisobida yuqori o‘rinlarni egallagan quyidagi jamoalarga Prezident sovg‘asi topshirildi:

🥇1-o‘rin — O‘zbekiston Milliy universiteti (2 mlrd so‘m)
🥈2-o‘rin — Toshkent davlat tibbiyot universiteti (1,5 mlrd so‘m)
🥉3-o‘rin — Fan va texnologiyalar universiteti (1 mlrd so‘m)

Shuningdek, turli yo‘nalishlar bo‘yicha g‘olib bo‘lgan talabalarga 900 mln so‘m mukofot ajratildi.

Intellektual olimpiada doirasidagi “Zakovat” o‘yini g‘oliblari magistraturaga imtihonsiz qabul qilinadi, stipendiya bilan ta’minlanadi hamda xalqaro ta’lim va stajirovka dasturlarida ishtirok etish imkoniyatiga ega bo‘ladi.

Bizni kuzating

Facebook | Instagram | YouTube | Telegram