# ‘ اليوم كملت 25 عام. بلحاق بالنسبة ليلي عاد كملت عامين. كانت بداية جديدة نهار بدلت عقليتي وخديت مسار مختلف فحياتي. البداية كانت نهار وليت كنقرا 5 ديال الكتوبا على الاقل فالشهر، نهار وليت كنعس فقط 4 ولا 5 ديال الساعات، نهار وليت كنغلس من 12 حتى ن 16 ساعة حدا البيسي بلا منرتاح. نهار ضربت على شي حاجة سميتا الافلام ولا الالعاب ولا ولا، نهار وليت كندور من كورس نكورس ونتعلم اي حاجة جات نيدي، اي دومين، اي اي ... عمري سولت شي حد ولا قلتلو علمني هادي ولا فيدني ولا عاوني. عاونت راسي بيدي ووقفت بيدي. شحال هادي كان اقصى احلامي نولي موظف مزيان ونشد خلصة مستقرة تعيشني مزيان. بلحاق ملي كضرب الشحط وتفشل المرة اللولة والثانية والثالثة وحتى للرابعة عاد كتصدق، كتولي عندك طاقة جديدة. غير هو خاصك تكون مستعد للتضحية بشي حاجات. ملي كيشوفك شي حد مسافر مساري عايش والبيسي فيدك مقابل البيزنيس ديالك كتعجبوو وكيقول سعداتو صدقاتليه. عندو الزهر. تانا بغيت نخدم غير فالدار فالبيسي وندخل دراهم. لكن كن حضر عليك فالايام القاسحة مليكان كيدخلك الشك فراسك ورغم ذلك كتقاتل باش توصل لوحد الهدف، كن متاكد راه ماغاديش يقول هاداك عندو الزهر. فخبارك ؟ قسمابالله اول نهار بديت فهاد العالم كان فراس مالي 1500 درهم جامعها من الخدمة ليخدمت فالصيف. بديت بيها فأدسنس وفايسبوك أدس من بعد مدة وانا كنتعلم.النتيجة؟ بوق خسرتا كلها والربح لي صورت تقريبا 20 درهم. بقا فيا الحال ومشاو الفلوس والامل. 0 درهم. تقبلت الفشل ونوضت من جديد. باقي كنتعلم. يوتيوب فيديوهات دروس كتوبا لي جا فالطريق بسم الله. نفس جديد خصني نبدا وراس المال والو. شغانعمل!! عندي كاميرا ساوية 1500درهم. نيشان بعتا، فيرسيت الفلوس فالكونط بونكير لي خاوي. من جديد فظرف سيمانة مشات كلها وطلع القالب مرة ثانية. هادشي ماسلكشي هاد امين رغيب وسيمولايف وبلال الضيفي ديلكم غير كيبعو الوهم. ماكاينش شي حاجة سميتها الفلوس فالانترنت. سكات والدنيا كدور بك. عشت ففترة احباط لمدة شهر. لا دخول لا خروج. شويا جا وحد الوسواس كقولك نوض زيد تعلم. كتنوض وكتبدا من جديد حيت باك على قدو وخصك تعاونو. المرة الثالثة الفشل مجددا. زيييييد المرة الرابعة. 500 درهم مسلفها. من بعد سيمانة ديال التوجاد جا النهار لي غادي نلونسي فيه داكشي. نعست مع 4 وفيقت مع 8 نطلل على البيسي، اش هادشي!! بروداكت شاريه ب 5 دولار تباع ب 28 دولار ! يا ربي نكون غا كنحلم. تقريبا 200 درهم رباح فمنتوج واحد! سيير على الله حتى كتولى تلقى 2 مبيعات ، 5، 10 ... نهار كتقيل خدام 16 ساعة وكتلقا 100 مبيعة كتجيك عادي. تعلمتي تبيع، تقلب على منتوج عامل بووم وطحن. الشهر الاول الثاني الثالث، عام عامين وباقي العاطي يعطي. كل نهار كتعلم حاجة جديدة حتى كتكبر احلامك ونهار كيقولك الاستاذ فلافاك قرا مزيااان باش واحد النهار تكون فبلاصتي هنا كتخبع راسك و كضححك ملي كتفكر بلي داكشي لي كيتخلص فشهر نتا كدخلو فسيمانة ولا فيوماين كاع. كتحبس الضحكة وكتنوض تكمل قرايتك عادي. كتعيش حياة عادية فهاد المجتمع المتصنع. سكاات حتى حد ماعارف اش تحت راسك. فينوا فلان مالو فلان فشكل فلان. نتا ماعلا بالك. واحد النهاار كتعمل بوووم وكتبدل الجلدة. كاع لي كانو كيضحكو ولا كيحكرو عليك ونتا صغير وهما عندوم الفلوس ونتا مازم، كتشوف فيهم بشفقة وكتكمل الطريق. وكل نهار كتعرف بلي دك الطريق باقي طويييل. غير زيد ومدورشي موراك .. كنتيق فيك. راك قادر ! سير على الله 👊
#Brahim_logia