*قصيدة للمسير الى كربلاء*
*القصيدة من ديوان عبرات وأنين جزء ٢*
❥━──➸➽❥❂❥━──➸➽❥❂
*يا حادي گلي وين ماشي بهاي الضعون*
*زينب حزينه ونشدتك وتهل العيون*
❥━──➸➽❥❂❥━──➸➽❥❂
يا حادي گلي وين ماخذنه ولينه
تنادي يبو السجاد خويه ماشي بينه
ماشين خويه لكربله وبيها سبينه
تبچي وتون ام الخدر وياها يبچون
❥━──➸➽❥❂❥━──➸➽❥❂
صاحت الحره بصوتها وتجذب العبره
گلبي نخمش من هالدرب والدمع يجره
ياخوي گلبي من الهظم شنهو اليصبره
زينب تون ونشدته وتهل العيون
❥━──➸➽❥❂❥━──➸➽❥❂
ماخذنه اخوي اليوم لأرض الغاضريه
وتدري يخويه هناك أظل وحدي سبيه
بعدك يبو السجاد من ينغر عليه
تبگه اعيالك بالفله خويه ويضيعون
❥━──➸➽❥❂❥━──➸➽❥❂
يا خويه گلي وين ماشين بحرمكم
فدوة تروح الكم يخال ابني اختكم
ولو بيدي  وسط الروح يخواني اضمكم
خافن تتيهوني وعلى الغبره تنامون
❥━──➸➽❥❂❥━──➸➽❥❂
لأجلك أرخص الروح فدوة يا ابن امي
عگبك يبو السجاد يثگل علي همي
اندب واصيح بصوت وين الوالده امي
وين اهلي اهل المرجله خلهم يحظرون
❥━──➸➽❥❂❥━──➸➽❥❂
*بقلم ✍🏻خادمة اهل البيت ع*
*الشاعرة العلوية مريم النور نسألكم الدعاء الفاتحه الى روح اختي ولأمواتكم

قناة دمع زینب حقيبتك بالمجلس
کل ما تحتاجه تجده هنا قصائد
نعي ابوذيات حديث فقط ابحث عن طلبك
https://t.me/joinchat/AAAAAETnrgEL48UNnwdxcQ

*من ديوان📚 مسير الفواطم لارض المظالم الجزء الاول*
*قصيدة للمسير الى كربلاء(آه يالاولاد)*
❥━──➸➽❥❂❥━──➸➽❥❂
لسان حال مولاتنا ام البنين عندما ودعوها اولادها وسارو الى ارض كربلاء تگول:

ودعوني وسافروا ... وللمنيه حملوا
آه يالاولاد                 آه يالاولاد
❥━──➸➽❥❂❥━──➸➽❥❂
ودعوني وسافروا للغاضريه
وبگت دمعاتي عله خدي جريه
رحتو كلكم واضن متردون اليه
توادعت وياكم اوداع المنيه
هذا اضن آخر وداع ... صرت احسن بالضياع
آه يالاولاد                   آه يالاولاد
❥━──➸➽❥❂❥━──➸➽❥❂
روحي صارت ضايعه من ودعتكم
ريت بوداع المنيه ما شفتكم
وريت لارض الغاضريه رافگتكم
من الزغر يولادي انه ما فارگتكم
ريت رافگت الضعن ... گلبي بآلاه امتحن
آه يالاولاد                   آه يالاولاد
❥━──➸➽❥❂❥━──➸➽❥❂
گلبي محزون النوايب تعبنه
البيت ضلمه وخالي من اهل المحنه
انه والطفله العليله نجر ونه
عله العتبه ننتظر تلفون النه
بعتبة الباب انتظر ... الگلب يتلاهب جمر
آه يالاولاد                    آه يالاولاد
❥━──➸➽❥❂❥━──➸➽❥❂
الگلب يتلاهب جمر ويريد الاحباب
راحو وخلو عيوني تربي عالباب
مر ابد ما ينحمل يفراگ الاطياب
آه يا عظم الرزيه وعظم المصاب
آه يا عظم البله ... منين اجتني كربله
آه يالاولاد                آه يالاولاد
❥━──➸➽❥❂❥━──➸➽❥❂
منين اجتني كربله واخذتلي الاحنان
وخذت مني حسين ويه گمر عدنان
نعصر گلبي وخايفه انه على النسوان
من مشه وحمل ضعنهم حيلي ركدان
راح حيلي والگلب ... عليه فرگاهم صعب
آه يالاولاد                 آه يالاولاد
❥━──➸➽❥❂❥━──➸➽❥❂
*بقلم ✍ شاعرة اهل البيت ع*
*العلوية مريم النور نسألكم الدعاء الفاتحه الى روح اختي ولأمواتكم:

قناة دمع زینب حقيبتك بالمجلس
کل ما تحتاجه تجده هنا قصائد
نعي ابوذيات حديث فقط ابحث عن طلبك
https://t.me/joinchat/AAAAAETnrgEL48UNnwdxcQ

*قصيدة للمسير من ديوان📚 عبرات وأنين الجزء الثاني*
❥━──➸➽❥❂❥━──➸➽❥❂
*عماني حسين يوم الحمل ضعونه*
*ماشي الكربله ويدري يذبحونه*
❥━──➸➽❥❂❥━──➸➽❥❂
ماشي الكربله والعين هماله
أبو السجاد ظل خايف على عياله
واخته بالضعن تمشي بيا حاله
اخافن هالعده باچر يهظمونه
❥━──➸➽❥❂❥━──➸➽❥❂
سدرنه الضعن ولكربله ماشين
لديار الكدر ماخذنه اخوي حسين
ودع گبر أمه وظل يهل العين
يا زهره  ييمه الگوم يسبونه
❥━──➸➽❥❂❥━──➸➽❥❂
يدري حسين موته بأرض الطفوف
ويگطعون من عباس  الچفوف
هذا البيه كفايه مخوف الخوف
تاليها بعمد رأسه يصيبونه
❥━──➸➽❥❂❥━──➸➽❥❂
من سار الضعن والروح خلصانه
وزينب خايفه اعله حسين وخوانه
تصيح دخيل يا عزنه ويملفانه
رجع هالضعن ياخويه ردونه
❥━──➸➽❥❂❥━──➸➽❥❂
رجع هالضعن يا خويه ما أريده
وماخذني يخويه دروب البعيده
ريض بالحمل لا تمشي بهيده
تصيح بصوت خويه لا اتتيهونه
❥━──➸➽❥❂❥━──➸➽❥❂
*بقلم ✍🏻خادمة اهل البيت*
*الشاعرة العلويه مريم النور الفاتحه الى روح اختي وﻷمواتكم:


قناة دمع زینب حقيبتك بالمجلس
کل ما تحتاجه تجده هنا قصائد
نعي ابوذيات حديث فقط ابحث عن طلبك
https://t.me/joinchat/AAAAAETnrgEL48UNnwdxcQ

لسان حال الشيعي عند هلال شهر محرم الحرام.
ــــــــــــــــــــــــــــــــــــــــــــــــ

هل اهلال عاشور ولبستــي اسود يدنياي
احس مكدره اليوم ويابس ريگي وشفاي
احس مخنوگه الانفاس
الوجع لگليبي جن جاس
ردت كربله هنا وحره بايد تومــــــــــ،ــاي
ـــــــــــــــــــــــــــــــــــــــــــــــ
بهلالك يعاشور شفت مذبــــــوح الحسين
وهاي اطفال يبجون واميره تنادي يحـنين
مجتوفين باحبال ويصيحون لاويــــــــــن
شفت روس اعله الرماح
وملك من السما صــــــاح
زينب واخت عباس شو من غير حداي
ـــــــــــــــــــــــــــــــــــــــــــــــــــــ
صــــورة كربلـــــه اليوم انعادت عليـــــنه
شـــباب بعــــمر الورود ومذبوحه سنينه
بدال الحــــــــــنه والياس بدمه مخضبينه
وامه تنادي جسام
جرحي شلون يلتام
وين الوعد وياي بس ارجع يـــــملفاي
ـــــــــــــــــــــــــــ

طفله تصرخ بصوت اخذوها الـتراجي
هدية والدي هاي ابو حلــــــو المحاجي
ينظر ليها من فوگ راس شكثر، باجي
هديتيلي حيلي
ذوبتي دليلي
بلكت يسمع الحيد يجي من النهر.عناي
ــــــــــــــــــــــــــــــــــ
شفت ازنود بالگاع بس محمله رايه
وبيها خيوط ياناس من حرگ العبايه
يمكن بالعتب صار من راحو ســــبايه
بينه وبين زينب
من وصلته تعتب
گوم ويـــــاي عباس ردلي خويه لهفاي
ــــــــــــــــــ
طفل وبحـظن قــــران مـــــــحزوزه رگبته
شبگ بيده اعله الحروف جني اليوم شفته
حاير يمه الحسين صعبه اعليه دفنتــــــه
ردتك ترد بامك
مو بالرگبه سهمك.
عفه گلبك على الصار منهو يحمله مولاي
ـــــــــــــ
هاي العفه ياناس طبت وسفه ديوان
مجتوفه بالاحبال بس وياها نســـوان
وعليل وجامعه وياه من المشي تعـــبان
بس شو جنها عباس
هيبه ورافعه الراس
يسموها بالحجاب لا ماذلها المــــــــاي
ــــــــــــــــــــــــــــ
تمت بعون الله تعالى بقلمي انا ام علي البابلي
لااجيز شرعا حذف اسمي او التلاعب بكلمات القصيده

قناة دمع زینب حقيبتك بالمجلس
کل ما تحتاجه تجده هنا قصائد
نعي ابوذيات حديث فقط ابحث عن طلبك
https://t.me/joinchat/AAAAAETnrgEL48UNnwdxcQ

قصيدة: يابويه
كلمات واداء : مرتضى حرب
▪️▪️▪️▪️▪️
يابويه .. يابويه .. لاوين محملين
يابويه .. يابويه .. گلـولي شتردين

لاوين محملين انه ابنيتكم
تانوني .. تانوني .. بداعة غـيرتكم
مو انتم تـدرون آنه ابعازتكم
تعوفوني .. تعوفوني .. ليش ارد انشدكم
لو رحت ويـاكم شيصير ارد اسأل
مشوني .. مشوني .. ماريدن محـمل
هالگد يابويه چا ليش اتوسل
تخلوني .. تخلوني .. مو چنت اتدلل

ماشفتو .. ماشفتو .. دمعي اعله الخدين
يابويه .. يابويه .. لاوين محملين


يهلي انتم تدرون البيه مكفيني
لو رحتو .. لو رحتو .. ياهو ايباريني
انه ابفرگتكم معدوده سنيني
لوموتن .. لوموتن .. ياهو يسد عيني
انتم عافيتي وراحت عافيتي
وياكم .. وياكم .. يا لذة ريتي
ترحين اوياهم اشگد اتمنيتي
ياروحي .. ياروحي .. ووحدچ ضليتي

مهضومه .. مهضومه .. ياروحي تضلين
يابويه .. يابويه .. لاوين محملين


رديت لدارك مكسورة خاطر
گوه امشي .. گوه امشي .. وبحالي شصاير
بويه لجيتكم احسب چم بـاچر
وصفناته .. صفناته .. تكبر ليناطر
يابويه اعليكم انشد ياصفنه
وياحيره .. ياحيره .. وياحسره اوونه
المثلك رايحله شيخلص حزنه
ومايلگه .. مايلگه .. اعيون ايشـوفنه

كل عمره .. كل عمره .. يخلص بس ونين
يابويه .. يابويه .. لاوين محملين


هاي اتحس بيها الرايح والدتها
اشگد صعبه .. شگد صعبه .. من اتضل وحدها
عن الرباها كلمن ينشدها
دمعتها .. دمعتها .. اتضل تحرگ خدها
وانه اليسألني عنكم تحـچيله
دمعاتي .. دمعاتي .. ويحس تشكيله
يحتار شيحچي ويخلص ليله
بحسراته .. بحسراته .. ويتـهدم حيله

هاي انه .. هاي انه .. بفراگ الغالين
يابويه .. يابويه .. لاوين محملين
▪️▪️▪️▪️▪️▪️
#اللهم_عجل_لوليك_الفرج_والنصر_والعافية
يا بويه مكتوبة

قناة دمع زینب حقيبتك بالمجلس
کل ما تحتاجه تجده هنا قصائد
نعي ابوذيات حديث فقط ابحث عن طلبك
https://t.me/joinchat/AAAAAETnrgEL48UNnwdxcQ

هوسات شجاعية لعلي الأكبر

من ديوان
#مواجع_الطف_جزء_رابع

شد عالكوم الأكبر من برز ليهم
شرد كل زلمهم سيفه لاويهم
ظل يحصد الروس ومايحاجيهم
فرو منه اعداه - بيوم الصال الأكبر

•───✧◐◐✧───•

يوم الصال بيهم مابقى واحد
چن المصطفى وبروسهم حاصد
شجاع ومايخاف بسيفه ويجاهد
شحده اليوصل يمه - يجوله برجل الخيل

•───✧◐◐✧───•

ماكدرو عليه وبروسهم يشمّر
يمين ايسار الاكبر بيهم يطشر
هيبه ومرجله وبشارته يسطر
يشور من بعيد يشور - چن عمه العباس

•───✧◐◐✧───•

بي شاره ورجوله وبي شجاعيه
هذا ابن الحسين اهله اسباعيه
مثل جده وعمام ارجال حربيه
الطف يشهدله - تراب مخليها

•───✧◐◐✧───•


🔥ختامية نهاية عزاء للشباب

للشبان - هاي اللطمه شديها
واسي الفاكده وهليوم عازيها
شال وليدها والدمعه تجريها
مكابل كون والصرخات عليها
عله الشايل ولدها الونه جريها
محله ونتچ بالعزه تونيها
وكلمن فاكده هليوم واسيها
لعبدالله وعلي الأكبر دخليها
وللقاسم الراح الهوسه عدليها
{ شبان الطف / الهم هيبه }

•───✧◐◐✧───•

بقلم المله والشاعره ام علي الأماره
غير مبري الذمه اليحذف اسم الشاعره وينسب الكلام له
العمل مهدات الى مولاي صاحب الزمان عج
🚫لايجوز حذف اشكال الذمه من القصيدة

قناة دمع زینب حقيبتك بالمجلس
کل ما تحتاجه تجده هنا قصائد
نعي ابوذيات حديث فقط ابحث عن طلبك
https://t.me/joinchat/AAAAAETnrgEL48UNnwdxcQ

#قصيدة_لنهاية_العزاء

المستهل لأحدى الاخوات ااخادمات

{ مستهل القصيدة }

تممنه العزة يالزهرة سجلينه
نريد امراد عاجل كلنه تنطينه

•───✧◐◐✧───•

كل هذا العزه منصوب يالزهرة
نلطم واللطم وياه الف حسرة
لمصاب العزيز الكطعو نحرة
{ يالطم حسين - تقبلينه }

•───✧◐◐✧───•

تقبيلن اللطم والنوح والونه
لوليدچ لطمنه الماكو اعزمنه
سجليها التجي وتحضر مجالسنه
{ ويه زينب نلطم - عوانه }

•───✧◐◐✧───•

تسجل اسمائنه تحضرنه بالمحشر
هاي ام الحسن كل العزه تحضر
نعزيها اعله ابنها الصدره متكسر
{ ماجوره كلمن - واستها }

•───✧◐◐✧───•

كلمن واست الزهره وجرت دمعه
علمظلوم ابنها الهشمو ضلعه
وسلبو عيلته وذبحوله كل ربعه
{ اخته اويه الكوم - ميسريها }

•───✧◐◐✧───•

نريد مراد عاجل منچ الليله
تشافين المريضه وجايه نحيله
موجوعه اجت والمدمع تسيله
{ واليطلب انتي - التنطينه }

•───✧◐◐✧───•

بقلم المله والشاعره ام علي الأماره
غير مبري الذمه اليحذف اسم الشاعره وينسب الكلام له

أهدي ثواب القصيده الى صاحب الزمان والى خادمات كروب انصار الحسين جميعآ والى صاحبة المستهل

قناة دمع زینب حقيبتك بالمجلس
کل ما تحتاجه تجده هنا قصائد
نعي ابوذيات حديث فقط ابحث عن طلبك
https://t.me/joinchat/AAAAAETnrgEL48UNnwdxcQ

قصيدة الى هلال شهر محرم


*هلالك ياشهر.   يصدع كلب زينب*
*من عاشو خافت.   والدمع صبصب*


هاي مصدعه وبالكلب ملجومه
خافت على اخوتها تنام بالحومه
من هلالك يشهر الحزن مالومه
مكدر بالسمه هلالك ويرهبهه


تعاين للهلال وجرت دمعتهه
تسعر بالكلب ماطفت جمرتهه
هاي ام الحزن كلفه مصيبتهه
وضلت نارهه وسط الكلب تلهب


ونت بت علي والكلب لجماهه
من هل الشهر بالضيم خلاهه
تعاين للضعن و اخوتهه وياهه
تنوح وحضرت للعاشر المعصب

صدت للسماء وتصيح ردوني
هلال المحرم ودر عيوني
المن ياهلي بالضعن جبتوني
دلالي نمرد ومن الحزن عطب


يغدرنه الشهر وتروح اهالينه
نضل بلا اهل والكوم تسبينه
ياعباس خويه أرجوك رد بينه
خلافك ياهو اليكضيلي المطلب


لخادمة الحسين ع العلويه ام اياد لا يجوز حذف الاسم

قناة دمع زینب حقيبتك بالمجلس
کل ما تحتاجه تجده هنا قصائد
نعي ابوذيات حديث فقط ابحث عن طلبك
https://t.me/joinchat/AAAAAETnrgEL48UNnwdxcQ

نعي الى هلال محرم


يهلال كلبي شيبيته
وثلثين من حيلي خذيته
بهلتك دمعي هل جريته


ياشهر وناتك ثجيلات
ومبين هلالك بي علامات
خوفي على البيهم امروات

عدي عتب يهلال وياك
مكدر و اشوف الحزن غطاك
كلي شضاملي بالله اترجاك


شعدك اوياي شجايب اخبار
كلبي لجمني والذهن طار
وحسين تشوفه اليوم محتار

بيك شكثر لوعات و هموم
وخليتني مركز للهموم
انه الغالية وبيك ارخص السوم


جنه الهلال يكلي ردي
وبمشاج يازينب تهدي
ضعنج للمنيه كام يحدي

خلصانه روحي من نضرته
والدمع من عيني هملته
الشهر هذا عيب ردته

عيني طفت والهم كتلني
ويعاشور هلالك هضمني
ياهو الذي الداري يردني


التفتيت والخوان وياي
ردو صحت يا بعد عيناي
خافن نضل بحسرت الماي

لخادمة الحسين ((ع))ام اياد لا يجوز حذف الاسم

قناة دمع زینب حقيبتك بالمجلس
کل ما تحتاجه تجده هنا قصائد
نعي ابوذيات حديث فقط ابحث عن طلبك
https://t.me/joinchat/AAAAAETnrgEL48UNnwdxcQ

1محرم 

يرتفع صوت النداء 
لووصل شهر العزاء 

واغريباً.   واسليباً.  واحسـيناه 
ـــــــــــــــــــــــــــــــــــــــــــــــــــــ
لوكرب شهر الدمع   
نلطم ونكسر ضـلع   
                     والشهر ياذينه 
نصرخ بدمعه ونصيح   
ويلي والـمنحر ذبيح  
                   والحزن غاطينه 

هلال شهرك لولفانه وبين هلال السـمه 
ألبس اثياب العزيه وصرخ انه فاطـمة 
ورفع الرايه ع بيتي عـيني بالدم  هامله 
يامصاب حسين اصرخ والحزن يرهم إله 

تنزف الجرحه السماء 
لـووصـل شـهـر العـزاء 
واغريباً.   واسليباً.  واحسيناه
ــــــــــــــــــــــــــــــــــــــــــــــــ
نلبس اثياب السواد.  
ونعلن بدمعه الحداد 
                  وبمصاب الغالي 
نذرف الدمعه بحزن    
نبجي وبحركه ونون 
             والجروح الوالي 

انصب المأتم ونادي ياحبيبي المنذبح
ويلي ياويلي انادي ع الترب ضل منطرح 
ماكو واحد غسلااه وراسـه فوك ع الرمح 
حسين ياسر الحياه حسين ياوجه الصبح 

تجري من عنده الدماء 
لـووصـل شـهـر العـزاء 
واغريباً.   واسليباً.  واحسيناه
ـــــــــــــــــــــــــــــــــــــــــــــــــــــ
تجري من عنده الدمه  
وتنزف الجرحه السمه 
                والغريب ع الترب 
جسمه يبقى بلاجفن   
صدره باالخيل نطحن 
         ويلي من حقد الغرب 

يبفى فوك ع التراب مرمي عاري بلاغسل 
ليش يحشود آل اميه شنهو ذنبه وينجتل 
منه مسلوبه العمامه وزينب تروح بحبل
حكـنه لو ننصب عزيـه ونلطم نحير الـعقل 

منـه مســـلوب الــرداء 
لـووصـل شـهـر العـزاء 
واغريباً.   واسليباً.  واحسيناه 
ـــــــــــــــــــــــــــــــــــــــــــــــــــــ
زينب بوسط الخيم    
تصرخ بحركه وألم 
                   الحره من تنعاله 
من يرد خالي المهر.    
تعلم بهـذه الأمـر 
                     طحنته الخياله 

تسمع ضلوعه اتكسر شابحه بدمعه النظر 
تحشم وماكو اليجيها والكفيل على النهر 
حتركت الخيمه وتنادي خويه وينك ياكمر 
حتارت بجمع اليتامه وباجر يجيها السـفر 

 تنسـبي بركب العداء 
لـووصل شـهـر العـزاء 
واغريباً.   واسليباً.  واحسيناه
ـــــــــــــــــــــــــــــــــــــــــــــــــــــ
نـذكر أيام اليـســر  
زينب يطكها الشمر 
                بلارحم سباها 
تحشم وماكو اليجي.   
تحشم وزاد البجي. 
                والدهـر أذاها 

نذكر وزينب غريبه على الهزل مسراها 
تمشي بدورب البعيده مادرت منواها 
الحادي مايرحم يويلي بكل وكت بجاها 
ياوسافه وياحسافه والسبي اذاها 


ويلي من شمر الخناء 
لـووصـل شـهـر العـزاء 
واغريباً.   واسليباً.  واحسيناه
ـــــــــــــــــــــــــــــــــــــــــــــــــــــ
كلمات خادمكم الشاعر 
مرتضى مكطوف الموالي

قناة دمع زینب حقيبتك بالمجلس
کل ما تحتاجه تجده هنا قصائد
نعي ابوذيات حديث فقط ابحث عن طلبك
https://t.me/joinchat/AAAAAETnrgEL48UNnwdxcQ

ستوديو 

كرب.  شهـر الفجيعه 
أجه.   طـف الشريعه 

أنا مجهز  وأنا مـحظر      ألك ثوب الـعـزيه 
 دمع عيني  ملة خدودي   ولطم ألطم بديه
 
         حسين.   حسين. 
ــــــــــــــــــــــــــــــــــــــــــــــــــــ
اااه 
من يجبل شهرك يبدي 
حزنـي ودمــعه بخـدي 
وبروحي الجـلك افدي.      

مولاي حسين 

بدمعي وثوبي الأسود ومتاني أيامك 
تقبلـني الخادم مولاي أخدم خدامك 
وتمناها بوسط الروح ذنيجه اسهامك
 
وصل.   .شهر المصايب 
 لـفه.      نعــي النوايـب 

وأنا بحزني. وكثر وني     
ألك أحيي القضيه 
دمع عيني     ملة خدودي    والطم ألطم بديه 
      حسين.   حسين حسين
ـــــــــــــــــــــــــــــــــــــــــــــــــــــ
ااااه 
ياكلــبــي كــثر الـونه.    
عل طــايح والداسـنه    
وضـلـوعه شـو رضـنه. 

          مولاي حسين 

داسـن صدره ياويلاه حافر يم حافر 
أصـرخ ويلي ياويلاه منك  ياالعاشر 
نلطـم حيل ب اه واه احنه ع الصاير 

بده.   نوحـي ونحـيبي 
عله   الـغـالي حبـيــبي   

كلب ينحب  لمن يكرب    تره شــهر المنيه 
دمع عيني    ملة خدودي   والطم ألطم بديه 
      حسين   حسين.      حسين
ـــــــــــــــــــــــــــــــــــــــــــــــــــــ
اااه 
ومحظر كـلشي محظر 
الايـامك كلبـي الينـطر
بالــقامه حــيل اشـطـر      

مولاي حسين 

ويشـتد عزمي ع التطبر علي ياحيدر 
والطم حيل واتمناه صدري اليتكسر
من عيني وعله الوجنات دمعي اليتحدر 

دمع.    عـيـني اسيـله 
عله.    حسيـني أهيله 

نعنه الناعي. بحزن ساعي. وأجر دمعي إليه 
دمع عيني ملة خدودي    والطم ألطم بديه 

      حسين.     حسين.   حسين ـــــــــــــــــــــــــــــــــــــــــــــــــــــ
ااااااه
بـحزاني أحيي العـاشر 
بمـصابه فكــري الـحاير.  
بحسيني مدري شصاير      

مولاي حسين 

ويوم العاشر وبعـاشور نـصـرخ ونـادي 
باجر زينب واويلاه تسـري وي الحـادي 
.فوك الهزله وي أجـناب تـطويه الـوادي

مشت  أرض وصــحـاري 
عله.     الغبره أنـته عاري 

مشت تنحب  أخو مسلب  يظل عاري ورميه 
دمع عيني  ملة خدودي.  والطم ألطم بديه 
      حسين.     حسين.  حسين ـــــــــــــــــــــــــــــــــــــــــــــــــــــ
كلمات 
مرتضى مكطوف الموالي

قناة دمع زینب حقيبتك بالمجلس
کل ما تحتاجه تجده هنا قصائد
نعي ابوذيات حديث فقط ابحث عن طلبك
https://t.me/joinchat/AAAAAETnrgEL48UNnwdxcQ

3
 محرم الحرام 


بويه طولته السفـر 
 ماوصــل منك خبر 
               وانه أريد اخبارك           
ــــــــــــــــــــــــــــــــــــــــــــــــــــ
يالمشيت بضعن يزهي بويه طالت غيبتك 
وانته تدري ع اليحبك والله تكتل فركتك 
تحيه روحي تحيه نفسي أنه والله بشوفتك 
لا تطول الـغيبه وينك بويه فدوه امروتك 

لاتطول الفركه وين بويه صحتك ياحسين 
لا تطول الغيبـه  الخبر منهو يجيبه 

والدمع يعمي النـظر
ماوصـل مـنـك خبـر 
            وانه أريد اخبارك       
ــــــــــــــــــــــــــــــــــــــــــــــــــ
دمعي يجري من النواظر بعد عينه الغالي
شلون اوصف حالي بويه والحزن يبرالي 
لوغبت عن داري ويلي بيتي يصبح خالي 
مانسيتـك الحظه بويه وانته شـاغل بالي 

ياضوه تتركني ليش  بغيبتك مابيه اعيش 
بويه حيره افراكك   ماأعيش غيابـك 

مارحـم بيـه الدهر 
ماوصل منـك خبر 
               وانه أريد اخبارك 
ــــــــــــــــــــــــــــــــــــــــــــــــ
والدهر عذبلي حالي والحزن مايـنجلي 
وأكعد بوكسر ثنيتي وذكر اسولف هلي 
حكي من انحب ونادي عيني بالدمع هملي 
وينك انته كمت اصيحاً بويه وينك يالولي 

بكوسر الدار أكعدت  وذكره بيكم سولفت 
والدمع جتالي.      بويه ورحم حالي 

مابقى بهجرك بصر 
ماوصل منـك خبر 
               وانه أريد اخبارك                 ـــــــــــــــــــــــــــــــــــــــــــــــــ
 يادمعتي لمامثلها لويحل وكت العصر 
شابحه عيوني الدربكم بالأمل أنه أنتظر 
هيج كون من الله وينه يرجع بضعن الخدر 
ويرجع الديره نبينه ويوصل بطرت الفجر 

ويوصل الديره هله وأركض انه أستقبله 
ونسه دمعي الجاري  وأحمد الله الباري 

ونسه لوعات القهر 
ماوصـل منـك خبر 
               وانه أريد اخبارك      
ــــــــــــــــــــــــــــــــــــــــــــــــــــ
حسـين بويه هايغالي بويه طولته البعد 
غيابك يعذب دليلي ويمرد بكلـبي مرد 
بالدمع ضـليت انادي وهـا ترد لو ماتـرد 
والله مشتاكه اشوفك أحسب الجيتك وعد 


هوايه مشتاكه وعلي  وانه يشبح ناظري 
ماتمر بطيوفي   دمعي عبه جفوفي 

دمعي عل وجنه نحدر 
مـــاوصـل مـنـك خــبر 
               وانه أريد اخبارك      
ـــــــــــــــــــــــــــــــــــــــــــــــــــــ
مرتضى مكطوف الموالي 

قناة دمع زینب حقيبتك بالمجلس
کل ما تحتاجه تجده هنا قصائد
نعي ابوذيات حديث فقط ابحث عن طلبك
https://t.me/joinchat/AAAAAETnrgEL48UNnwdxcQ

نعي لعلي الأكبر حال أمه ليلى

حسب الرواية المذكور ان ليلى موجودة بمعركة الطف نقرأ النعي عندنا روايا ثانية تنفي وجود ليلة بالطف

من ديوان
#مواجع_الطف_الجزء_رابع

أبوذيه …..

صحت ياموت لاتكرب علي هنا
اباب الخيمه واكفلي علي هنا
رد كتله الولد يبني علي هنا
{ عيني عليك يوليدي ربيه }

•───✧◐◐✧───•

أكعد يماي العين ليه
ياعلي ماأحمل أذيه
يايومك امأثر عليه

•───✧◐◐✧───•

ياونتي مابطلت اعليك
ياولد كلي وين اللاكيك
تراب الكبر غير معانيك

•───✧◐◐✧───•

انه الوالده وانت ظناها
نعمه ومن الله اجاها
لاتنسه الحبيبه ورباها

•───✧◐◐✧───•

تعبت عليك الوالده شهور
رادتك تظل سنين ودهور
وبيدك توديها للكبور

•───✧◐◐✧───•

يبني يماي العين درجع
غياب وهجر يبني مينفع
كلبي على فراكك تكطع

•───✧◐◐✧───•

بلياه انا ماريد عمري
من الولد حارمني دهري
لله القوي سلمت أمري

•───✧◐◐✧───•

بقلم المله والشاعره ام علي الأماره
غير مبري الذمه اليحذف اسم الشاعره وينسب الكلام له
العمل مهدات الى مولاي صاحب الزمان عج
🚫لايجوز حذف اشكال الذمه من القصيدة

قناة دمع زینب حقيبتك بالمجلس
کل ما تحتاجه تجده هنا قصائد
نعي ابوذيات حديث فقط ابحث عن طلبك
https://t.me/joinchat/AAAAAETnrgEL48UNnwdxcQ

تم تنزيل قصائد للعشرة الأولى من محرم على رابط القناة

قناتي الخاصة عالواتساب
اشتركوا لتجدون كل شيء حزين ومرتب

الشاعرة ام علي الاماره

👇🏻👇🏻👇🏻👇🏻👇🏻👇🏻

https://whatsapp.com/channel/0029Vb7n1MuHVvTjPMgfOb1o

على بركة الله وبتوفيق من الله تعالى واهل البيت ع سيتم اصدار دواووين محرم ان شاءالله قريبا
حاليآ ثلاثة اجزاء ثنين مكملة لسلسلة المواجع واحد مكمل لسلسلة المضايف

مواجع الطف جزء 13
مواجع الطف جزء 14

كذلك اصدار من سلسلة المضايف
مضيف الإمام الحسن ع خاص بالإمام الحسن والسيدة شريفة ع

اختكم الشاعرة ام علي الإماره

مواجع الطف جزء الرابع عشر

خاص للقصائد فقط من الهلال الى الوحشة

يشمل قصائد الثقيل والمربوعات والفزاعيات بأنواعها وقصائد متنوعة الأطوار الديوان راح يفيدكم هواي قصائد منقحة عقائديآ وتاريخيآ اكيد انتم تعرفون المواجع ميحتاج نفصل

اختكم الشاعرة ام علي الإماره

وتستمر سلسلة المضايف المباركة من مضيف الإمام علي الى مضيف الجوادين ومن ثم لكريم اهل البيت ع مضيف الحسن المجتبى ع

الديوان كامل بجميع القصائد ثقيلة ومربوعات وفزاعيات ونعي وهوسات ورباطات وملاكاة وهوسات واحاديث ابد متحتارون بمجالس الإمام الحسن والسيدة شريفة
قصائد السيدة شريفة كذالك متنوعه بالثقيل والفزاعي والمربوعات والنعي وهوسات ورباطات موفقين لكل خير ان شاءالله ليفوتكم الديوان 👌🏻👌🏻

اختكم الشاعرة ام علي الإماره

انتباه

ستكون لنا كتب جديدة مستمرين بكتابتهن كتاب للمحاضرات مكمل لمنهج الخطيبات سيصدر جزء الرابع محاضرات متنوعه 👌🏻
سيصدر كتاب خاص للمقتل اسمه مقتل بني هاشم ان شاء الله هذه الكتب شراكة مع الشيخ عقيل الحمداني

كونوا منتظرين حاليآ دنرتب بيهن

#ام_علي_الإماره