أفضل أيام السنة داخلة علينا .. ولازم ناخد بالنا عشان متضعش مننا .. فرصة حلوة للتوبة من الذنوب

"*توبة العين في ال ١٠ الأوائل من ذي الحجة*"
-------------------
إحنا داخلين -إن شاء اللَّه- على أيام جميلة جدًا ومُفْتَرَجة وهي "العشر الأوائل من ذي الحجة"..
طيب دلوقتي في سؤالين:
الأيام دي مهمة ليه؟
وأعمل فيها إيه؟

*أولاً: مُهمِّين ليه؟
-----------
العشر الأوائل من ذي الحجة تختلف عن باقي أيام السَّنة في إيه: (الكلام ده قوليه لولادك ولأحفادك ولجيرانك ولأصحابك)
- العمل الصالح فيها أحبُّ إلى اللَّه..
- ⁠فيهم "يوم عرفة"⬅️ أفضل يوم طلعت عليه الشَّمس..
- ⁠فيهم يوم النَّحر=يوم العيد=عيد الأضحى..
- ⁠هم عشر أيام لا يجتمع في غيرهم من أيام السَّنة الأركان الخمسة"مُجتمَعة".
( فيهم صلاة وصيام مسنون وصدقة وحج وإحنا كمسلمين الحمد للَّه نشهد أنَّ لا إله إلا اللَّه وأنَّ سيدنا محمدًا ﷺ رسول اللَّه)..

ثانيًا: أعمل فيهم إيه؟
--------------
قال رسُول اللَّه ﷺ:- "مَا مِن أيَّامٍ العَمَلُ الصَّالحُ فِيهنَّ أحَبُّ إلى اللَّهِ مِن هَذِه الأيَّامِ العَشرِ . قَالُوا : يَا رسُولَ اللَّهِ وَلَا الجِهَاد فِي سَبيلِ اللَّهِ ؟ فَقَالَ رَسُولُ اللَّهِ -صَلَّى اللَّهُ عَلَيهِ وَسَلَّمَ- : وَلَا الجِهَادُ فِي سَبِيلِ اللَّهِ إلَّا رَجُلٌ خَرَجَ بِنَفسِهِ وَمَالِه فَلَم يَرجِعْ مِن ذَلِكَ بِشَيءٍ" (يعني رجل خرج للجهاد بنفسه وماله واستشهد وفلوسه راحت في الجهاد ⬅️ ده الوحيد الأحسن من اللي بيعمل عملا صالحًا في تلك الأيام..

العمل الصالح ينقسم لأربع حاجات:
١. طاعات.
٢. ⁠فعل خير.
٣. ⁠إتقان العمل.
٤. ⁠التوبة.

تعالوا بقى نتكلِّم عن التَّوبة..
ونبدأ من إن عينينا تتوب عن المعاصي.. إزاي؟
بِغَض البصر.. يعني إيه؟
يعني أتجنَّب إنِّي أبص على حرام..
مش إن لمَّا واحد يكلِّم واحدة يفضلوا يبصوا في الأرض هما الاتنين.. لأ..

إحنا بنغض البصر عن "العورات"
والعورة هي: ما يجب سَتْرَه ويَحرُم النَّظر إليه..
- عورة الرجل للرجل وللمرأة⬅️ من السُرَّة إلى الرُكبة..
- ⁠عورة المرأة للرجل⬅️ كل الجسد ما عدا الوجه والكفين (عند الجمهور= يعني ٣ مذاهب من ال ٤) وكل الجسد والوجه والكفين (عند الحنابلة)..
- ⁠عورة المرأة للمرأة⬅️ من السُّرَّة للركبة..
مافيش حاجة اسمها إحنا بنات مع بعضنا..
مافيش حاجة اسمها ماما عادي تبص.. لأ.. عوِّدوا ولادكم وبناتكم على كده..

مافيش حاجة اسمها واحدة بترقص وأقعد أبص على الجزء من السُّرَّة للركبة سواء بساتر أو من غير ساتر..

إحنا داخلين على مصيف، والناس رايحة البيسين والبحر.. ربنا مديلك بحر وسماء ورمل وطبيعة جميلة تبصي عليها؛ ماتسيبيش كل ده وتقعدي تبصي على واحدة لابسة بيكيني..
الموضوع بييجي بالتدريب، لمَّا تشوفي حاجة زي كده أو مشهد خارج في التليفزيون⬅️ بصي النَّاحية التَّانية..

النَّظرة الأولى لك والثانية عليك..
يعني أنا مثلاً قاعدة وبنشف ابني وهو طالع من البحر بالفوطة وشوفت واحدة لابسة مايوه بيكيني⬅️ غُضِّي بصرك على طول ماتقعديش مركزة معاها، وكده مش هيبقى عليكِ ذنب.. وجاهدي نفسك وما ترجعيش تبصي عليها تاني وإلَّا تأثمي بهذا..

#غض_البصر.
#العشر_الأوائل_من_ذي_الحجة.
#دكتورة_سوزان_علمتني

٦- الحائض في الحج (١)
-----------------
" الحائض و النُّفسَاء في الحج و العُمرة "

- في العُمرة :-
- أركان العُمرة ( إحرام - طواف - سعي و تحلل).

# علاقة الحيض بالإحرام :-
- إذا جاء الحيض قبل الإحرام ⬅️
- تُحرم الحائض من ميقاتها و تَبقى على إحرامها في مكة فتلتزم بما يُمنع على المُحرم فعله حتى ينتهي الحيض.
- بعد انتهاء الحيض تغتسل وتُؤدي مناسك العُمرة من طواف و سعي و تحلل( و ليس عليها الإحرام مرة أخرى لأنَّها مُحرمة)..
- مثلاً :-
- أحرمتي من مصر و أنتِ حائض ..لمَّا توصلي مكة تُبقي على إحرامك و تُكثري من التَّلبية و ما يجوز للحائض فعله.
- و لمَّا ينتهي الحيض تغتسلين و تُؤدين عمرتك ..( من غير ما تُحرمي مرة تانية من التَّنعيم زي أهل مكة ..لإنِّك مُحرمة فعلًا).

# إذا جاءها الحيض بعد الإحرام و "كانت ستمكث فى مكة حتى تطهُر" ⬅️
- ستَبقي على إحرامها و تفعل ما يجوز للحائض :-
- ( تلبية.. الصَّلاة على رسُول اللَّهﷺ..خدمة الحجيج) إلى أن تَطهُر فتؤدي عمرتها..

# إذا كانت ستغادر مكة قبل الطُّهر من الحيض..⬅️
- هناك آراء فقهيةمختلفة..
"" و عايزين نوسع مُخنا علشان نفهم الاختلاف لأن ديننا واسع و احنا اللى مُخنا ضيق و مش متعلمين ""..

- رأي(١) :-
- بما أنَّه لا يجوز الطَّواف للحائض فعليها أن" تعود لبلدها "حتى تَطهُر ثمَّ تعود لتنهي عمرتها 😶🤌
- مثلاً...لو هى ساكنة فى الطَّائف مثلًا فهي تقدر تُبقي على إحرامها و ترجع بعد أن تتطهُر..يبقى ينفع لأن المسافة قصيرة و مُمكنة..😊

- رأي(٢) :-
- "لابن تيمية"⬅️
- تتخيَّر " أيام الطُّهر المُتخَلِّل الحيض قبل مُغادرتها مكة (تنتظر لآخر وقت قبل السَّفر) "
- تغتسل و تتحفظ جيدًا( تستعمل حفاضتين مثلًا )..و تُنهي عمرتها ( طواف و سعي )
- "و لا شيء عليها."

- رأي (٣):-
- " لأبي حَنيفة" ⬅️
- إذا اضطُرَتْ للطَّواف قبل المُغادرة" فعليها بُدْنة (جمل)"..

# علاقة الحيض بالطَّواف⬅️
١- إذا جاء الحيض قبل الطَّواف⬅️ لا يجوز الطَّواف للحائض.
- ﴿الطَّوَاف صَلَاةٌ إلَّا أَنَّ اللَّه أحلَّ فِيهِ الكَلَام﴾.. فبذلك يُشترط للطَّواف الطُّهر من الحدثين الأكبر و الأصغر..
- فعليها أن تنتظر حتى تطهُر و تَغتسل..

٢- إذا أتاها الحيض أثناء الطَّواف ⬅️
- فهو يُفسد الطَّواف و عليها الانتظار حتى تطهُر وتغتسل..

٣- إذا جاء الحيض بعد الطَّواف ⬅️
- عليها استكمال عمرتها من سعي و تحلُّل لأنَّه لا يُشترط فيهما الطَّهارة..

#دكتورة_سوزان_علمتني

★ ٧- الحائض في الحج (٢)
------------------
١- في حج التَّمتع ⬅️
( بنحرم ونُؤدى العمرة و ننتظر ليوم التَّروية نحرم تاني للحج..)

- إذا جاء الحيض قبل أو بعد الإحرام و لكن قبل بداية العمرة ⬅️ ( أحرم و لكن أنتظر و لا أُؤدي العمرة..)

★ و هنا عندنا حالتان:-
---------------
١- إذا طهرت قبل يوم التَّروية⬅️
- تغتسل و تُؤدي العمرة من طواف و سعي و تقصير .
- تنتظر ليوم التَّروية (٨ من ذي الحجة ) لتُحرم مرة أخرى و تُؤدي مناسك الحج..

٢- إذا لم تطهر قبل يوم التَّروية ⬅️

- هتقلب التَّمتع لقران (تدخل الحج على عمرتها) ..فتصبح
- " قارنًا " ..
- ⚠️مع الأخذ في الاعتبار أنَّها أصلًا مُحرمة لعمرة التَّمتع..
- ازاي تعمل ده ؟؟🤔⬅️ "بالنِّية "..
- هتقول:- " لبيك اللهمَّ بحج مع عمرتي "..فتصبح قارنًا"..
- و تفعل كل ما يفعله الحاج ما عدا :-
- " الطَّواف و السَّعي للحج "..
- ⚠️مع الأخذ في الاعتبار أنَّها لم يسبق لها الطَّواف و السَّعي كما يفعل "الحاج القارن" لأنَّها كانت "مُتمتعة"...

** فإذا طهرت تغتسل و تُكمل الطَّواف و السَّعي..

** و اذا لم تطهر قبل مُغادرتها مكة فعليها بالأخذ بأحد الآراء :-
- تتخير الطُّهر المُتخلل الحيض و تتحفظ جيدًا و تُكمل الطَّواف و السَّعي و تُنهي حجتها و لا شيء عليها عند (ابن تيمية )
- و عليها بدنة عند( أبي حنيفة)

★ إذا جاء الحيض بعد العمرة و قبل الحج ⬅️
- تُحرم و تفعل ما يفعله الحاج أيضًا ما عدا السَّعي و الطَّواف كما سبق..

#دكتورة_سوزان_علمتني

"توبة اللسان في العشر الأوائل من ذي الحجة"
----------------------
إزاي لساني يتوب؟
قال رسُول اللَّه ﷺ :- "وَهَل يُكِبُّ النَّاسَ فِي النَّارِ عَلَى وُجُوهِهِم إِلَا حَصَائِدُ ألسِنَتِهِم"

فعايزين نعمل الكلام اللي جاي ده مش بس في العشر الأوائل من ذي الحجة، ولا بس في رمضان.. لأ ده طول السَّنة..

*أولًا:-
بإنِّي أقلل كلامي..

عن ابن عمر -رضي اللَّه عنه- عن النَّبي ﷺ قال :- "مَن كَثُر كَلَامُه كَثُر سَقَطُه ، وَمَن كَثُر سَقَطُه كَثُرَتْ ذُنُوبُه ، وَمَن كَثُرَتْ ذُنُوبُه كَانَتْ النَّارُ أَولَى ِبِه"..

مافيش مؤمن/مؤمنة رغَّاي..

طيب أقلل كلامي إزاي؟

١. عدم الكلام فيما لا يعنيكِ..
إزاي أعرف الكلام ده لا يعنيني؟
أي سؤال الإجابة عليه ب:- وأنتِ مالك ⬅️يبقى لا يعنيكِ..
مثل:
*أحمد نجح الحمد للَّه في الثَّانوية العامة..
ماشاء اللَّه، ألف مبروك، جاب كام؟⬅️ وأنتِ مالك؟
*ما أنا عايزة أطَّمن عليه..
-ما يمكن مامته خايفة عليه من الحسد.. أو يمكن جاب مجموع مش حلو وكده تبقي أحرجتيها..

بصوا في كلامنا⬅️ هتلاقي %90 منه حاجات لاتعنينا..

ومافيش عندنا في الدِّين حاجة اسمها:- "من باب العلم بالشَّيء"؟!..



٢. مش هتكلِّم غير لمَّا حد يسألني..
حتى لو عارفة إجابة السُّؤال.
مثال:
واحد بيقول لصاحبه-وأنتِ معَدِّية من جنبهم- :-" ده بيقولوا في حادثة كبيرة في شارع السُّودان" فتقولي إنتِ:-
" أنا لسه جاية من شارع السُّودان ومافيش حادثة ولا حاجة"⬅️ حد سألك؟ حد وجِّهلك كلام؟

٣. اتعوِّدي قولي الحلو بس..
قال رسُول اللَّه -ﷺ -:- "مَن كَانَ يُؤْمِنُ باللَّهِ والْيَومِ الآخِرِ فَلْيَقُلْ خَيْرًا، أوْ لِيصْمُتْ….."
مثال:-
واحدة بتسألك عن رأيك في لبسها، وأنتِ عاجبك الچاكيت بس مش عاجبك الإيشارب ⬅️ ليه تقوليلها :- "الإيشارب مش لايق"؟؟!!!
ما تقوليها:- "ما شاء اللَّه الچاكيت حلو أوي"..
كل إناءٍ ينضَحُ بما فيه؛ لو أنتِ كويسة من جوة، هتقولي الحلو بس؛ ولو أنتِ مش كويسة من جوة، مش هتشوفي غير الوحش..
*هو ده مش نفاق؟
-لأ مش نفاق.. ده اسمه "جبر الخواطر"

٤. إذا تساوى الكلام والإمساك عنه، فالسُّنة الإمساك عنه :
كلام أقوله زي ما أقولهوش⬅️ يبقى ماقولهوش..
مثال : النتيجة طلعت، وابنك جاب مجموع وحش؛ فأنتِ تقوليله: -"ما أنت لو كنت ذاكرت، ما أنت لو كنت عملت، يا خسارة فلوسنا"⬅️ إيه لازمة الكلام ده؟!!
هيغيَّر حاجة؟!!
قوليله:- "قدَّر اللَّه وما شاء فعل.. نشوف إيه اللي عملناه غلط في المذاكرة ونحاول نتفاداه إن شاء اللَّه"..

*ثانيًا:-
خلِّي كلامك كله ذِكر..
مثال:-
-أشوفك بكرة ⬅️ بدل ما تقولي "ماشي"⬅️ قولي "إن شاء اللَّه"

فُلانة دخلت الإنعاش⬅️ بدل ما تقولي:- "يا لهوي!" ⬅️ قولي: "لا حول ولا قوة إلا باللَّه"..
خلِّي تعليقك على كل اللي بيتقال قدامك كله ذِكر⬅️ كده تضمني إنك لا يمكن تغلطي..

الكلام ده مهم أوي، لإن ذنوب اللسان بتقفل على صلاة، تقفل على صيام، تقفل على قيام ليل، تقفل على أي عمل خير بتعمليه..

*توبة اليدين:-
----------
إيدي تتوب عن المعاصي بإنِّي أتجنب أضرب ولادي.. بإنِّي ماجبش على الموبايل أو على التليفزيون حاجة أشوفها وآخد ذنوب..

*توبة الرِجْلَيْن:-
------------
إزاي رجلي تتوب عن المعاصي؟
بإنِّي مارُحش الأماكن اللي ممكن آخد فيها ذنوب..
كل واحدة فينا بتبقى عارفة كويس أوي الأماكن اللي بتروحها وبتعمل فيها ذنوب..
مثال: -
أنا بخرج مع أصحابي في النَّادي كل شهر ونقعد نحيب في سيرة النَّاس، فلانة اتطلقت وفلانة حصل لها كذا….
أرجوكِ ابعدي عن الكلام ده والخروجات دي خصوصًا في العشر أيام دول..
طيب في الشُّغل أعمل إيه لو قعدوا يغتابوا المدير ولا حد من الزملاء؟
ما تشتركيش في الكلام وحاولي تقومي وتسيبيهم بلباقة...
مثلاً بعد إذنكم هدخل الحمام..

*ضبط النَّفس في العشر الأوائل:
-------------------
إزاي: بكظم الغيظ:-

كظم الغيظ بأربع حاجات:
١. الصَّمت: لمَّا تكوني متنرفزة إوعي ترُدِّي.. "دي بتقول كلام ماحصلش، مادافعش عن نفسي؟" ⬅️ لأ، لإن لو رّدِّتي وأنتِ متنرفزة ١٠٠٪؜ هتغلطي..

٢. ⁠الاستعاذة باللَّه من الشَّيطان الرجيم (سِرًا).

٣. تغيير الحال: لو كنتِ قاعدة قومي اقفي، قومي لمي الغسيل، غيري حالك بأي طريقة مناسبة لك في وقت النَّرفزة..

٤. الوضوء.

-طيب وحقي مش هاخده؟
-حقك مش هيضيع.. حقك هتاخديه في الوقت اللي أنتِ عايزاه بالطَّريقة اللي أنتِ عايزاها بأقل خسائر ممكنة..

#العشر_الأوائل_من_ذي_الحجة.
#دكتورة_سوزان_علمتني

مش عشان ربنا مكتبلناش الحج السنة دي يضيع مننا يوم عرفة .. فيه حاجات كتيرة تتعمل يوم عرفة غير الحج

★ أعمال يوم عَرَفة ★
------------------
# من أعمال يوم عَرَفة :-
------------
-صيام ال ٩ أيام من ذي الحجة ومن ضمنهم صيام يوم عرفة (من الصِّيام المسنون)
" صِيَامُ يَومِ عَرَفة يُكَفِّرُ سَنَةً قَبلَهَا وَ سَنَةً بَعدَهَا"..

- يُكره صيام يوم عَرَفة للحاج "مكروه"..
- ( لم يصم رسُول اللَّهﷺ يوم عَرَفة..حيث كان رسُول اللَّهﷺ على جبل الرَّحمة و رفعت له أمُّ الفَضل الحليب فشرب..فعرف الجميع أنَّه لم يَصُم) "حادثة أُمِّ الفَضل".

- نحاول في الأيام المُفترجة دي إنِّنا نطلع بعبادتنا خطوة لفوق.

#الصلاة:-
--------
- يعني اللي غير مُنتظمة في الصَّلاة تحاول تنتظم..
- بتصلِّي قضاء حاولي تحافظي على وقت الصَّلاة.
- بتصلِّي فى آخر الوقت حاولي تصلِّي في أول الوقت.
- مش متعود تختم الصَّلاة(سُبحان اللَّه والحمدللَّه واللَّه أكبر)..حاول تعوِّد نفسك على ختم الصَّلاة.
- بتختم الصَّلاة ..حاول تزود الاستغفار و الصَّلاة على رسُول اللَّهﷺ على السِّبحة مع الذِّكر .

# قراءة القرآن:-
----------
- لو بتخفظي حاولي تزودي مُعدل الحفظ.
- ممكن تعملي خاتمة داخل الصَّلاة وخاتمة خارج الصَّلاة.
- يعني تقري مثلًا صفحتين في كل ركعة ..هتلاقي نفسك عملتي خاتمة داخل الصَّلاة بسرعة..

# الذِّكر:-
------
- " لا إله إلَّا اللَّه وحده لا شريك له له الملك وله الحمد وهو على كل شيء قدير"
- الذِّكر ده عايزاه على لسانك دايمًا طول العشر أيام عاوزاكِ مَكَن شَغَّال( وإنتِ بتغسلي المواعين..و انتِ مستنية الباص ..و إنتِ راكبة المترو.....) و لو قلقتِ بالليل..

- و علموا أولادكم يقولوه قوليله:- "يا حبيبى و إنت رايح النَّادى أو وإنت نازل على السِّلم دايمًا قول الذِّكر ده.."

- و عن دُعاء عَرَفة قال رسُول اللَّهﷺ : -
﴿ إِنَّ خَيْرَ مَا قُلْتهُ أَنَا وَ الأَنبِيَاءُ مِن قَبلِي..لَا إِلَه إِلَّا اللَّه وَحْدهُ لَا شَرِيكَ لَهُ لَهُ المُلكُ وَلَهُ الحَمدُ وَهُوَ عَلَى كُلِ شَيٍء قَدِير ﴾

# التَّكبير :-
-------
﴿ اللَّه أكبر اللَّه أكبر اللَّه أكبر لا إله إلَّا اللَّه.. اللَّه أكبر اللَّه أكبر اللَّه أكبر وللَّه الحمد ﴾

- التَّكبير المُطلق ⬅️
- من دخول ليلة العيد يعني من بعد مغرب اليوم اللي قبله( الوقفة) و حتى إقامة صلاة العيد ( فى العيدين).

- التَّكبير المُقيد ( مقيد بالفرائض ) ⬅️
- يبدأ من بعد صلاة
- " فجر يوم عَرَفة (يوم الوقفة ) "و حتى "عصر آخر أيام التَّشريق ( الأيام المعدودات).."
- أمَّا الأيام المعلومات فهيَّ "العشر الأوائل من ذي الحجة "..

#صيغة التَّكبير بتختلف من مكان لآخر..
يعني عندنا في مصر بنكبر و نهلل و نُصلِّي على رسُول اللَّه-ﷺ- لكن في أماكن تانية يكتفون بالتَّكبير و التَّهليل( كله صح )🫡 ..

#دكتورة _سوزان_علمتني

اللهم اكتبنا مع حجاج بيتك هذا العام ..
هم حجوا إليك بأجسامهم .. وأتيناك بأرواحنا ونياتنا وقلوبنا وكل جوارحنا ..
نطلب رضاك عنا . فأشركنا معهم بنيتنا واكتبنا معهم بصالح أعمالنا ..
اللهم إنا نوينا الحج قلبًا وروحًا واشتياقًا إليك ..
اللهم إنا نوينا إحرام جوارحنا عن محرماتك ..
ونوينا طوافًا حول رضاك ومحبتك ومحبة نبيك ..
ونوينا سعيًا بين الطاعات والأعمال الصالحة ..
ونوينا رميًا لجمار شهواتنا ووساوس شياطيننا ..
اللهم إنا نوينا وقوفًا عند حدودك وشرعك .. فاقبلنا على تقصيرنا وبعدنا وجهلنا ..
اللهم ردنا إليك وإلى محبتك ردًا جميلاً ..

كل ما أدخل أساعد ماما في المطبخ تطردني معرفش ليه!

وإحنا بنعلم أولادنا سنن العيد لازم نفهمهم لما يجوا يعيدوا على حد كبير يقولوا كل سنة و "حضرتك" طيب مش وإنت طيب