تفتكروا ليه الإنسان بيعمل الذنب رغم علمه بالعقاب.. وهنا مش بنتكلم على الجاهل أو اللي ناسي، لأ زي السارق لما بيسرق وهو عارف إن الشرع يعاقب بقطع يده، أو الزاني وهو عارف إن ده شيء هيدخله النار مثلا..

فكروا على بال ما أكتب الجواب..

عاوز أقول كلمتين قبل ما أنام..

إحنا ضيعنا فرص بعمرنا بسبب عدم الإلتزام ده.. سنين كتير بتعدى على الفاضي بسبب عدم الإلتزام وإنك لما تمسك حاجة تكمل فيها للآخر.. وعلى رأي الشيخ سمير مصطفى قال هتندم لما الأيام تعدى عليك وتكتشف إنك معملتش حاجة.. مش نقص موارد لأ.. مرقعة وقلة إلتزام.. تصبحوا على خير..

الإسماعيلية، نمرة ستة، آخر الغروب..

وكما قال ذو الصوت الناعم حسن شاكوش:
شايفك قمر ومنورة سمايا.. سماياااع..

في حلقة القران كنت بسمع من سورة المائدة فلما وصلت لأية: " ولو أنهم أقاموا التوراة والإنجيل وما أنزل إليهم من ربهم لأكلوا من فوقهم ومن تحت أرجلهم، منهم أمة مقتصدة، وكثير منهم ساء ما يعملون "

فالشيخ وقفني وقال تأمل الآية دي، وللأمانة كنت بحفظها عادي ومن وانا طفل ومركزتش في تأملها بالظبط.. وقالنا شوفوا أهل الكتاب وهم اليهود والنصارى بيقول لو كانوا طبقوا كلام ربنا المكتوب في التوراه والإنجيل ربنا كان هيرزقهم من فوق ومن تحت وهيكرمهم برزق وافر.. ما بالك لو حافظت على القرآن وطبقت أحكامه والقرآن أجل واعظم من التوراه والإنجيل.. وبدأ يتحدث طويلا عن أن من فوائد الإلتزام كثرة الرزق وسعته..

بالمناسبة النبي وصحابته كانوا اغنياء، أسيادنا الزبير أو عبد الرحمن بن عوف أو عثمان بن عفان ثرواتهم ضخمة جدا حتى بأرقام اليوم وكانوا مليارديرات ولكن كان عندهم من الزهد والورع ما يجعل كل هذا المال لا يشغلهم عن دينهم ويلهيهم عن الآخرة.. وكذلك النبي ﷺ كان غنيا وسيدنا أبو بكر كذلك.. ولكن كانوا زهادا في الدنيا وطبعا فيه فرق بين الفقر والزهد.. الفقر مذموم والزهد محمود ولكن ده موضوع تاني ممكن نتكلم فيه بعدين.. وكنت شوفت أمير منير مع أبو زيد تقريبا اتكلم في الموضوع ده..

المهم يعني هدف البوست إن يعني اتقوا الله واحفظوا القرآن وحاولوا تطبقوه في كل أموركم، ووقتها ربنا هيغنيكم بشكل كبير جدا..

ربنا يعلمنا الأدب..

الفيديو ده للشيخ الحويني سمعته كذا مرة، وبحب أسمعه على فترات بحيث يذكرني ببعض الأصول اللي لا مفر منها، وأعتقد هيفيدكم إن شاء الله.. اسمعوه كويس هتاخدوا شوية نصائح مفيدة جدا، واحتفظوا بيه..

https://youtu.be/YMIBvSB0kec?si=SG_289bU_XUDb7eX

بفكركم بكانفا برو لو حد حابب يشترك فيه.

صباح الخير..

انت مش ملتزم وكويس زي ما انت فاكر.. انت بس لسه متعرضتش للحظة الضعف الإنساني فتقع في غلط كبير.. ولأجل ده إياك تشوف نفسك أحسن من الناس.. انت بس ربنا مسابكش لنفسك لسه.. علشان كده كان من دعاء النبي ﷺ: ولا تكلني لنفسي طرفة عين .. لما سُئل سيدنا عمر عن التقوى، قال التقوى أن لا ترى في نفسك ميزة عن الآخرين..

على فكرة بقى أنت أصلا مش كويس، أنت فقط مستور.. الأكيد إنك تعرضت لضعفك الإنساني قبل كده، لعلك موصلتش لغلط كبير آه بس كده كده غلطت.. ربنا خلق الإنسان ضعيف في أصله.. لذلك توب وأوعى توقف توبة لحد ما تموت.. ولا تحقرن أخاك..

الكلام لي أولا ثم هو لكم..
ربنا يعلمنا الأدب..

سبحان الله..

والله الإنسان لو بس يتأدب ويطبق كلام النبي ﷺ كان زمانه في حتة تاني أقسم بالله، سواء في الدين والدنيا..

لما بتأمل حديثه ﷺ: " أحب الأعمال إلى الله أدومها وإن قل "

تذكرت إني في سنة تانية كنت مهتم بمجال كده واللي يعرفني يعرف إن حركتي سريعة وأحب أغوص في الأعماق مرة واحدة بس بزهق بسرعة برضوا.. المهم المجال ده كنت مجمع له كورسين كده توتال ١٥٠ فيديو خلال يومين سمعت ٣٠ فيديو وبعدين وقفت، فلو أني حافظت على ريتم يوميا فيديو واطبقه .. ساعة بس يوميا.. كان زماني من أحسن الناس في المجال ده ولكن الإنسان عجول..


حفظ القرآن اللي الناس بتستصعبه.. لو أنك كل يوم.. نص صفحة فقط .. يعني ربع ساعة بكتيره حفظ لو انت متخلف ومراجعة قديم قول ربع ساعة زيه.. خلال اي مرحلة دراسية - زي الثانوي او الكلية - هتختم القرآن..

حتى مذاكرة الكلية لو كل يوم بتدي ساعتين بس للمذاكرة هتخلص المنهج وهتبقى من أوائل الدفعة كمان ولكن حضرتك بتتمرقع وتزنق نفسك لليالي الامتحان.. 😅

ربنا يعلمنا الأدب..

انا اتعرضت لأعبث موقف ممكن يحصل..

كان عندي شوية مصالح فمنمتش و روحت الجامعة مطبق فنعست على نفسي في سيشن أحد الدكاترة الكبار.. فصحاني وهو مضايق وقال: حد ينام في حضور استاذ!! مفيش التزام في الجيل ده.. قولتله معلش وغسلت وشي.. المهم إني لقيتني مش قادر فإستأذنت وروحت القاعة الكبرى نمت فيه نص ساعة في آخر كرسي ورجعت.. المهم الدكتور بيقول: كنت فين.. قولتله: هصارحك لأني مش بكذب.. انا روحت نمت في القاعة شوية علشان أقدر افوق.. بصلي بصة غريبة كده..

المهم إني ببص مين الدكتور اللي ماسك البورتفليو بتاعي وهيقيمني كمان يومين.. لقيته نفس الدكتور..

ههههه سقطنا بورتفليو..

سهرتنا جميلة إن شاء الله

عاوز أبطل الطب وافتح وكالة حديد زي المعلم إبراهيم سردينة ألف رحمة ونور عليه وتلميذه المعلم عبد الغفور البرعي أو المعلم رفاعي الدسوقي برضوا

اخواتي وزميلاتي الفيميلز المحترمين..

عاوز تفسير لظاهرة محاولات انتحار بعض الفتيات بسبب إنهم اتخانقوا مع خطيبهم.. مش تنمر والله بس دي شباب ميتزعلش عليها، بيبقى عريس الجنة خالص وبنطلون كات وعرف ديك وبتاع، ولنفترض إنه سبع البرومبة وسبع رجالة، وأفحل من أنجبت مصر.. إيه مبرر الانتحار برضوا؟ أقصد يعني ممكن تتصالحوا وتعيشي حياة حلوة مع ساحر القلوب ده..

لو انتحرتي هيسيبك ( بالمنطق يعني كده كده ماتت) ، ولو تعبتي هيسيبك، ولو قطعتي ايديك مثلا، فانا شايف يتجوز بنت جلدها سليم مثلا، ونخف جنان ومرازية في دكاترة الطوارئ..

يعني انا شوفت بنت ١٨ سنة عندها سكر نوع 1 ، وكل ما خطيبها يتخانق فيها تبطل الأنسولين ، وامبارح جت الطوارئ علشان بسبب خدت علبة دواء غريب كده وده دخلها في DKA coma، وأمها بتقولي بسبب خطيبها ( تيبيكال عريس الجنة )..

وانا الحقيقة مش لاقي مبرر، لسه مفيش بنات قطعت شرايين علشاني وده شيء مضايقني الحقيقة😔

عمري ما عرفت فكرة الإعجاب السريع أو المعاكسات أو حتى التحرش، إلا كإنها لحظة بيغلب فيها الجانب الشهواني على عقل الإنسان وروحه.

يمكن لأني بطبعي محتاج أنجذب لعقل اللي قدامي؛ لطريقة تفكيره، ثقافته، ووعيه. حتى لو الشكل جميل، فده وحده مش كفاية أو مبهر بالنسبة لي.. أعتقد إن ده قريب من مفهوم Sapiosexuality.

أنا مش بنكر إن الجمال يلفت الانتباه، طبيعي.. لكن نادرًا ما يكون كفاية إنه يصنع تعلق حقيقي..
ممكن تشوف شخص شديد الجمال، وبعد دقائق كلام تنطفئ كل الصورة..
وفي المقابل، ممكن شخص عادي جدًا في البداية، لكن مع الوقت جمال روحه وطريقته في التفكير يخلوك تشوفه الأجمل فعلًا.

والكلام ده له أصول دينية برضوا، يعني سيدنا النبي ﷺ قال: "تُنكح المرأة لأربع..." ثم قال: "فاظفر بذات الدين"
وده مش معناه إن الشكل أو المال مش موجودين أو مش مطلوبين، لكن فيه توجيه واضح إن الأساس الحقيقي هو الأخلاق، والروح، والشخصية.. لأن دول الأعمق والأبقى.. والنبي قال إنه يختار واحدة لما يشوفها يتبسط ويسعده شكلها..

فلذلك مؤمن إن الشكل مطلوب كقبول أولي، لكن الانجذاب الحقيقي بيتبني على الشخصية، الوعي، والروح.

الجمال البصري نسبي ومتغير بين الناس والثقافات والزمن، بينما الراحة النفسية والإعجاب بالشخصية أعمق وأثبت على المدى الطويل.
كتير من العلاقات تبدأ بإعجاب بالشكل، لكن بعد فترة بتحصل خيانات مثلا بسبب الأساس الواهي ده، لأن اللي بيخلي الإنسان متمسك بحد بعد سنين غالبًا هو طبعه، عقله، وطريقته في الحياة.

وفي النهاية، الشكل كده كده بيتغير مع الوقت، لكن الروح الحلوة والفكر الناضج هم اللي بيخلوا الإنسان يُحب كل يوم من جديد..

ربنا يعلمنا الأدب..

دلوقتي تقدروا تتواصلوا مباشرة عن طريق رسائل القناة بدلا من الخاص.

الانفار ( العمال ) اللي بيشتغلوا في الزرع، يعرفوا يعني إيه ergonomics ؟

متنسونيش في الأيام المباركة دي من صالح دعائكم وخالصه، ولكم بالمثل إن شاء الله..

تقبل الله طاعتكم..❤️

مهم جدًا يا شباب نستغل اليومين دول كويس..
يوم التروية ويوم عرفة من أعظم أيام السنة فعلًا، وممكن دعوة واحدة صادقة فيهم تغير حياتك.

ادعوا ربنا بكل اللي في قلبكم..
بالرزق، بالستر، بالنجاح، بالهداية، بالصحة، بأهلكم، بمستقبلكم، وبالحاجات اللي محدش يعرفها غير ربنا..

ولو مش عارف تبدأ تدعي إزاي، فالأمر بسيط:

ابدأ بحمد ربنا والصلاة على النبي ﷺ،
بعدها استغفر شوية،
وبعدين ادعي براحتك وبطريقتك العادية جدًا.

مش لازم ترتيب ولا كلام كبير.. ربنا عالم بما في القلوب أصلًا..

ومن أحسن الأدعية اللي ممكن تكررها:

"اللهم إنك عفو تحب العفو فاعفُ عني."
"يا مقلب القلوب ثبت قلبي على دينك."
"رب إني لما أنزلت إليّ من خير فقير."

وطبعا من حديث النبي ﷺ:
“لا إله إلا الله وحده لا شريك له، له الملك وله الحمد وهو على كل شيء قدير.”

وأفضل وقت للدعاء يوم عرفة غالبًا من بعد العصر لحد المغرب، فحاولوا قدر الإمكان تبعدوا عن المشتتات وتقعدوا مع ربنا شوية..

وعادي جدًا تقرأ الدعاء من الموبايل لو ده هيساعدك تركز..
المهم الصدق وحضور القلب، مش الشكل.

ربنا يبلغنا وإياكم فضل الأيام دي ويكتب لنا فيها القبول والفتح والعفو.
ربنا يعلمنا الأدب.

الحمد لله أننا مسلمين.

كل عام وأنتم طيبين وبخير ❤️

بعت الصورة بتاعت العيد قبل اللي فات دي على روم vegans هنود على ديسكورد وبلكوني قبل ما أخد اسكرين بالردود مع الصورة.. خسارة.. بكرة إن شاء الله أعمل اكونت فيك وانزل صورة الأضحية الجديدة😂😂

كنت داخل أتكلم شوية انجليزي ولقيت المتاح vegans والحاد وحاجات مش ولا بد وشوية كلام يدخلوا جهنم، فاختارت بتوع الخضار، قاعد يقولي أصل ال ethics وبتاع وانتم عالم متوحشة ومتحضنتوش وانتوا صغيرين.. يعم غور، ستيك اللحم الميديم رير بارقابهم.