🔸خلال مناوبة الأمس، لقيت العديد من الأمهات اللي يتابعوني في الصفحة، ويحاولوا يطبقوا النصائح ودايما يتفكروا واش نقولهم عندما يجي يوسوسلهم الشيطان باش يزيدوا البيبرون.

🔸إحدى الامهات قالتلي أنها بسببي حبست الصناعي و راهي ترضع رضاعة حصرية. وأخرى قالت نجي نمد البيبرون، كي نتفكرك يا طبيبة واش تقولينا في الصفحة نتراجع.

🔸أمهات الخدج كذلك اللي راهم يديروا #رعاية_الكنغر، تحية ليهم. ملتزمات بالتوصيات، وحتى أطفالهم ما شاء الله، في صحة جيدة وحالتهم مستقرة ويرضعوا رضاعة طبيعية حصرية.

💐الحمد لله أنني رجعت نشوف ثمرة الجهد والتعب اللي أبذله في الميدان. والحمد لله أن الله وفقني باش نخلي تأثبر ايجابي ولو صغير على الأمهات.

🔸الصفحة درتها لانني ما نقدرش نوصل للجميع. لكن نقدر ننشر عليها كل ما يفيد في موضوع الرضاعة.

🔸حتى دورة التحضير للرضاعة الطبيعية، راني نلقى نتائج مع أمهات كاين اللي رضعت وفشلت من قبل، ودخلت تتعلم واكتشفت أخطاءها وعازمة ما تعاودش، وكاين اللي أول تجربة، حبت تستفيد باش ما تطيحش فريسة لضغوطات المحيط، وكاين حتى ممرضات وطبيبات، دخلوا كأمهات، وتعلموا حوايج يفيدوا بيهم مريضاتهم في عملهم اليومي.
💐وكلهم زادوا حبوا الرضاعة، وتمسكوا بيها وماشي مستعدات يفرطوا فيها😊.

☝️وكله توفيق من الله تعالى.

💐أملي أن ينتشر الوعي بأهمية الرضاعة، ويزيدوا عندنا عدد الاستشاريين، باش نولوا نوصلوا لكل شرائح المجتمع. علابالي البدايات هي الصعبة، لكن كل واحد يدير اللي يقدر عليه، وحجرة فوق حجرة، نبنوا حصن منيع للدفاع عن حق كل رضيع وام في الرضاعة الطبيعية.

وهذا ماكان 😊

((أذكركم باللي مازالت التسجيلات متواصلة للدورة الجديدة، رابط استمارة المعلومات :
https://forms.gle/tZYeqVvSMY4sWH2J6
سارعوا التسجيل قبل بداية شهر جانفي))