‏إياك تقبل تطلع من الدنيا دي منسحب أو مهزوم ....

و إعرف إن مفيش حاجة بتحصل عبث .... ولا جهد بيروح في الفراغ .... ليك رب إسمه الكريم ... و مش هيسيبك زعلان و مكسور علطول ... مسيره يعاملك بإسمه الكريم ....

و خليك دايما فاكر إن في الأخر

ربك هيراضي الكل
#نوتيلاا
‎#الله_كريم
‎

إنت مش متخيل كمية النمو و التطور اللي هتحصل لك في حياتك لو بطلت تصدق نفسك إنك مظلوم و تستاهل أكتر من اللي إنت فيه.. و بدأت تصدق إن الوحيد اللي من حقه يقرر إنت تستاهل أكتر ولا لأ هو الطلب عليك في السوق …

الطلب عليك أكتر من المعروض من فئتك = تستاهل أكتر

إنما فيه منك كتير و مفيش ميزة عندك ميزة مقدرها السوق .. يبقى عشان خاطرك إنت .. بطل صياح و شكوى و الشعور القاتل بالإستحقاق اللي هيإذيك أكتر واحد ده … و إشتغل على اللي السوق عايزة مش على اللي إنت شايفه 🤝

#نوتيلاا
#الله_كريم

قيمتك = (قدراتك+ علاقاتك + مهاراتك) X عدد الناس اللي ساعدتها بقدراتك دي

و دايما دايما .. إقسم العدد على ٢ .. عشان دايما تفضل حاسب حساب إن نص عمرك قضيته بتساعد نفسك مش الناس التانية.

قيمتك = نص عدد الناس اللي ساعدتهم.

جرب كده الحسبة دي و راجع قيمتك بينك و بين نفسك 💙

#نوتيلاا
#الله_كريم

خدها من أخوك و إرمي ورا ضهرك …

مفيش شرف في المحاولة إلا بعد الوصول و الفوز…

إنما كل ما متعرفش توصل لحاجة تشتغل نفسك و تصبر نفسك و تقول (يكفيني شرف المحاولة) لا ده مش شرف يا صاحبي .. دي حجة البليد

و تصبيرة الفاشل .. و مقبرة الإستمرارية .. المحاولة تساوي صفر … ميبقالوش قيمة إلا لو اتوجد جمبها واحد تحقيق و إنجاز…

إنما كل ما حد يسألك تقوله حاولت و يكفيني شرف المحاولة … قسما بالله ما هتوصل لحاجة 🤝

المحاولة فقط = صفر

و لا شرف في الأصفار

و لا قيمة لمجموع الأصفار مهما بلغ عددها


#الله_كريم

لا ثغرات في الخطة الإلهية ... !!!

أنا مش عارف ليه الجملة دي معلقة في دماغي بقالي فترة ... و قررت أكتبها هنا دلوقتي ...

بس عموما لو إنت الدنيا ملخبطة معاك و مش فاهم ليه ده بيحصلك ... أو إنت قلقان من مشكلة متوقعها ... أو أي حاجة مش مريحاك ... إعتبر الكلام ده إشارة ليك ...

متخافش الخطة مرسومة لمصلحتك تماما ... و مش هتفهم ده إلا في المشهد الأخير ... ساعتها بس هتفهم إن كل اللي كان بيحصلك كان خطوات محددة في خطة خير راسمهالك الكريم ...

ففك وشك كده .. و روق و سيبها لله ... !!!

و إفتكر دايما .. إن في النهاية .. ربك هيراضي الكل 💙

#نوتيلاا
#الله_كريم

طيب يا جماعة نقول تاني معلش …

شوية كلام صريح كده من القلب و عالدغري .. و موجه للشباب الجميل اللي بيتابعني و بيحضر ال Events اللي بطلع أتكلم فيها

أنا شاطر فشخ في شغلي .. شاطر بإفترا يعني الحمد لله .. و شاطر أكتر في ال public speaking و ال Mentorship

عادي جدا تاخدني قدوة في الشغل .. عادي تتوقع مني الأحسن دايما في البيزنس و التوجيه و كده

بس أنا مش قدوة أخلاقية نهائي .. ولا مثل ديني أعلى .. مش معنى إني شاطر في حاجة معينة إنك تتوقع مني الكمال في. كل النواحي

واحدة من أكبر لعنات ال public speaking في مصر هو إن ال speaker الشاطر اللي الناس بتسمعه و يعجبها في حاجة معينة الناس بتبقى متوقعة منه الكمال المطلق ..

يبقى كامل دينيا و كامل أخلاقيا و كامل عمليا ..

موضوع تأليه الناس العادية ده شئ وحش في المطلق .. فكرة إفتراض الكمال دي مؤذية ليك و للتاني ..

ليك عشان لو هو غلط في حاجة انت هترفض تستفيد منه في كل حاجة فهتبقى ظلمت نفسك

و فرضت عليه إنه يفضل مزيف و متصنع مش حقيقي. قدامك .. فكده ظلمته هو …

فا من الآخر يا جماعة كده أنا بني آدم عادي .. شاطر في شغلي .. و بلصم باقي جوانب حياتي

بتشعبط في اللي أقدر أتشعبط فيه في الدين .. و لما بستخدم أمثلة في كلامي من الدين بيبقى بهدف توصيل المعلومة من خلال شئ مشترك بينا .. مش عشان تقولي (بارك الله في علمك و خلقك و تدينك)

و لما بتكلم بحدود على ال stage مش معنى كده إن دي طريقة كلامي العادية .. لا عادي بشتم و بأبح و لساني طويل وسط اصحابي و الناس اللي بيقى مرتاح معاهم ..

و لما بشجعك و أحمسك إنك تاخد خطوة .. ده مش معناه إني متحمس ٢٤ ساعة .. و مبيأسش ساعات و بقع ساعات أكتر .. لا عادي جدا بيعدي عليا أيام سواد مبقدرش أقوم من السرير .. و أيام تانية بكسر الدنيا ..

فا هون على نفسك يا صاحبي كده .. و متخليش ال stage و ال social media يدوك إحساس مزيف بالكمال للشخص اللي بتتفرج عليه ..

فا تاني كده .. أنا مش قدوة دينية ولا قدوة أخلاقية .. أخرك تاخد مني اللي يفيدك في الشغل و طريقة التفكير .. متتوقعش مني أكتر من كده.

سلام عليكوا

#الله_كريم
#نوتيلاا

لو جيت تبص وتحسبها في إن إيه الفرق اللي بين الناجح و الفاشل, و انا هنا أقصد النجاح الجبار الإنفجاري مش ناجح بياخد 10 - 15 الف جنيه في الشهر .. لا أقصد النجاح اللي يتدرس ...

هتلاقي اللي يقلك الفرق في الإجتهاد, و اللي يقلك الفرق في الظروف, لا الفرق في استغلال الفرصة و هتسمع كلام كتير ... و أنا بعد 10 سنين من السعي الغير منقطع ورا حلمي ...

لما قعدت و بصيت كده علي اللي بطلوا يسعوا و اللي كملوا .. لقيت إن الفرق في حاجة واحدة بس مفيش غيرها و هي (تحمل الضغط النفسي) ... قرار إنك تسعي ورا حلم في بيئة زي اللي محيطة بينا هنا دي محتاج كمية رهيبة و لا محدودة من القوة النفسية ....

من أول لحظة لأخر لحظة كل مجهودك منصب في حاجة واحدة و هي إنك تكمل ... و تفضل تشحن قوتك النفسية عشان تتحمل الضغط النفسي ... ما بين ضغط التضحية بالنجاحات المضمونة الأمنة مقابل الحصول علي نجاح عظيم فيه مخاطرة .. الضغط النفسي من المشككين ... من المحبطين ... من اللي خايفين عليك و مشفقين عليك من الإحباط فبيحبطوك بإديهم من عينة عيش في الواقع و كفاية كده أحلام, و ضغط نفسي التجربة و الفشل و التكرار ....

ركز كده .... اللعبة كلها تحمل ضغط نفسي ... إنك تفضل مكمل يوم كمان ... خطوة كمان ... مرة كمان ... تحمل الضغط النفسي ... هو ده سر اللعبة ... إتحمل الضغط النفسي يوم زيادة .... والله هتوصل ... ده اللي قدرلك تتحمل .. أكيد مقدرلك تفرح أكتر من اللي مستحملش .... إستسلم بكرة .. بس النهاردة إستحمل الضغط النفسي ... سيب حلمك بكرة ... بس النهارده قاوح ... و لما بكره يجي ... نبقي نشوف .. جايز بكره يكون يوم وصولك .. !!!

تنح توصل
كلمة السر تحمل الضغط
مفيش بطولة في الاستسلام أي حمار يعرف ينام علي بطنه....لكن مش أي حصان يقدر يرمح
ونحب نقول للضغط النفسي هو ده أخرك ؟؟؟؟
#والله_علي_ما_أقول_شهيد
#الله_كريم
#أبو_المجد