آغلامازدیم زامان آغلاتدی منی
دوز یولوندان آزان آغلاتدی منی

گوردوم حسرتدی همالر سوموگه
ایشله ییر شاخدا سوموکدن ایلیگه
دوزوموزده اییلیر ایری لیگه

قالدی قانماز قانان آغلاتدی منی
آغلامازدیم زامان آغلاتدی منی

تک صبیر گلدی دئدیم ایش دوزه لر
قار گئدر، بوز ارییر یازدا گلر
نه بیلیم یازدا بوران باغری ده لر

یوخاچیخمیش گومان آغلاتدی منی
آغلامازدیم زامان آغلاتدی منی

دئدیلر بیر گون اولار ساز حالیمیز
قیتدیق اولسا واریمیز یاغ بالیمیز
ایندی کی اون تک اولوب ساققالیمیز

بو یالان سوز یامان آغلاتدی منی
آغلامازدیم زامان آغلاتدی منی

ظن ائدیردیم آغیر اولسا یارالار
یارالار آغریسین آنجاق یار آلار
نه بیلیدیم اوره گی یار یارالار

بیلمه مز لیکدی، قان آغلاتدی منی
آغلامازدیم زامان آغلاتدی منی

اره لر توشدو که جنگل جانینا
تولکی لر تور توخودو اصلانینا
طرلانی اووچو باتیر جاق قانینا

اوخدان آرتیق کامان آغلاتدی منی
آغلامازدیم زامان آغلاتدی منی

اری مز قالدی بیینده بوزوموز
گویده سایریشمادی بخت اولدوزوموز
نه قویون قالدی نه املیک قوزوموز

قوردا بنذر چوبان آغلاتدی منی
آغلامازدیم زامان آغلاتدی منی

من دئدیم باغلاسا یادلار قولومو
دایاقیم وار قورییا ساغ سولومو
قوپدی بیر چن که ایتیردیم یولومو

داغا باخدیم دومان آغلاتدی منی
آغلامازدیم زامان آغلاتدی منی

وای بیزه اولدی پوزولماز یازیمیز
مضراب اود توتدی قیریلدی سازیمیز
قالدی قیشلانمادا (عاصم) یازیمیز

یازی گول سوز یازان آغلاتدی منی
آغلامازدیم زامان آغلاتدی منی

#عاصم_اردبیلی
🍃🍃🍃
@dedekatib
🍃🍃🍃

▫️آینادان صحبتی سالدیم، منه داشدان دئدیلر،
یاری یاردان آییران قصّه‌نی، باشدان دئدیلر.

یاشیل احساسلی باغین داللادیلار قول-بوداغین،
اوراغی، دهره‌نی، ابزارِ معاشدان دئدیلر.

قورو اود توتدو، سؤنن چاغدا آلیشدیردی یاشی،
توستو قووزاندی، خطاکارلیغی یاشدان دئدیلر‌.

ایسته‌دی تامسینا ال‌بیرلیگین ائل لذّتینی،
«آییرین اللری الدن، گوزو قاشدان!» دئدیلر.

نئهره‌نی چالخالاییب، آیرانی یاغدان آییریب،
خاصیت‌لر بیزه دوغدان، یاوان آشدان دئدیلر.

نه قدر باش باش‌ایدی، قهریله توش اولدو داشا،
تا آیاقلاندی، نه تعریف کی باشدان دئدیلر!

چکدیلر شیش‌لره بریان قوزونو، ایل اوزونو،
داستانلار بیزه سهمیّه لاواشدان دئدیلر.

«آفتافا اوغروسو» قیشقیرتینی، قالخیزدی گؤیه،
کشتی دریاده اوغورلاندی، یاواشدان دئدیلر.

نفتی شربت سایاغی ایچدیلر، ایثاره باخین!
وطن ابناسینا بیر او  ایکی هاشدان دئدیلر.

گردکان، پسته، بادام، فندق ایچین میل ائله‌ییب،
بیر نوخوددان سوز آچیب «عاصم»ه، ماشدان دئدیلر...

#عاصم_اردبیلی
@dedekatib