የባለስልጣኑና የሰላምና ፀጥታ አስተዳደር ቢሮ የ2018 በጀት ዓመት 1ኛ ሩብ ዓመት ዕቅድ አፈፃፀም በሁለቱ ተቋም ጠቅላላ ካውንስል ተገመገመ::

ጥቅምት 5/2018 ዓ.ም
አዲስ አበባ

የአዲስ አበባ ከተማ አስተዳደር ደንብ ማስከበር ባለስልጣን እና ሰላምና ፀጥታ አስተዳደር ቢሮ የ2018 በጀት ዓመት 1ኛ ሩብ ዓመት ዕቅድ አፈፃፀሙን ክብርት ወ/ሮ ሊዲያ ግርማ እና ሻለቃ ዘሪሁን ተፈራ እንዲሁም የሁለቱ ተቋማት የማእከል አመራሮች በተገኙበት በደንብ ማስከበር ባለስልጣን መሰብሰቢያ አዳራሽ ውስጥ የግምገማ መድረክ አካሄደ።

የአዲስ አበባ ከተማ ሰላምና ፀጥታ አስተዳደር ቢሮ ኃላፊ ክብርት ወ/ሮ ሊዲያ ግርማ በመክፈቻ ንግግራቸው በሩብ አመቱ መጀመሪያ ዓለም አቀፍም ሆነ ሀገር አቀፍ የሆኑት የአደባባይ በዓላት ፍፁም ሰላማዊ በሆነ መልኩ ማከናወን መቻሉ የሁለቱ ተቋማት ጥምር ውጤት መሆኑን በማንሳት ከ1ኛ ሩብ ዓመት አፈፃፀም ሪፖርት በመነሳት ለቀጣይ ለሚሰሩ ስራዎች መዘጋጀት እንደሚገባ ገልጸዋል።

በግምገማው ላይ የ2018 በጀት ዓመት 1ኛ ሩብ ዓመት አፈጻጸም ሪፖርት ሰነድ ከአዲስ አበባ ከተማ አስተዳደር ደንብ ማስከበር ባለስልጣን እቅድና በጀት ዳይሬክቶሬት ዳይሬክተር ኮ/ል አድማሱ ተክሌ እንዲሁም ከአዲስ አበባ ከተማ ሰላምና ፀጥታ ቢሮ አቶ ማስረሻ ሀብቴ ቀርቧል።

በሪፖርቱ የ2017 በጀት ዓመት ዕቅድ አፈጻጸምን በመገምገም ተቋማቱ ከተሰጣቸው ተልዕኮ ጋር በጥምረት በማያያዝ ክፍተቶችን በመለየት ለ2018 በጀት ዓመት ዕቅድ እንደግብአት በመጠቀም በ1ኛ ሩብ አመት ተፈጻሚ የማድረግ ስራዎች መሰራታቸው በሪፖርቶቹ ተገልጿል።

ከሪፖርቶቹ በመነሳት የተቋማቱ አመራሮች ከተቋም ግንባታ አንጻር ስለሚገኙበት ደረጃ፣ ብልሹ አሰራርና ሌብነትን ከመግታት አንጻር እየተሰሩ ስለሚገኙ ተግባራት እና ሌሎች በሂደት ላይ ስለሚገኙ ስራዎች የተለያዩ ሀሳቦችን በማንሳትና የመፍትሄ ሀሳብ በማቅረብ ሰፊ ውይይት አድርገዋል።

በግምገማዊ ውይይቱ ማጠቃለያ ላይ የአዲስ አበባ ከተማ አስተዳደር ደንብ ማስከበር ባለስልጣን ዋና ስራ አስኪያጅ ሻለቃ ዘሪሁን ተፈራ 2017 በጀት ዓመት ሁለቱም ተቋማት ስኬትን ያስመዘገብንበት ዓመት መሆኑ የተለየ መነቃቃት የመጣበት ነው ያሉት ኃላፊው በ2018 በጀት ዓመትም ይህን ስኬት አስቀጥሎ መሄድ ተገቢ እንደሆነ ገልጸዋል።

ከቀረበው የ2018 በጀት ዓመት 1ኛ ሩብ ዓመት አፈጻጸም ሪፖርት ላይ እንደ ክፍተት የተነሱ ሀሳቦችን እንደግብአት በመውሰድ በቀጣይ በላቀ መነሳሳት ውጤታማ ስራዎችን የምንሰራበት መንገዶች መፍጠር እና እንደክፍተት ለታዩት ነጥቦችም አዳዲስ አሰራርና የመፍትሄ ሀሳብ በመዘርጋት ስራዎች ሊሰሩ እንደሚገባ በግምገማዊ ውይይቱ ማጠቃለያ ተመላክቷል።

በመጨረሻም የአዲስ አበባ ከተማ ሰላምና ፀጥታ አስተዳደር ቢሮ ኃላፊ ክብርት ወ/ሮ ሊዲያ ግርማ ለቀጣይ የትግበራ መርሀ-ግብር የሚሆን ቀጣይ ስራ አቅጣጫ በመስጠት ግምገማዊ ውይይቱ ተጠናቋል።

ዘገባው :- የአዲስ አበባ ከተማ ደንብ ማስከበር ባለስልጣን ኮሙኒኬሽን ዳይሬክቶሬት ነው።

ከተማችን ከደንብ መተላለፍ የጸዳች ሰላምና ጸጥታዋ የተጠበቀ እንድትሆን የቅንጅት ስራዎችን ማጠናከር እንደሚገባ ተገለፀ ።

06/02/2018 ዓ.ም
**አዲስ አበባ**

የአዲስ አበባ ከተማ አስተዳደር ደንብ ማስከበር ባለስልጣን እና የአዲስ አበባ ሰላምና ጸጥታ አስተዳደር ቢሮ የ2018 በጀት ዓመት የ1ኛ ሩብ አመት እቅድ አፈጻጸም የሁለቱ ተቋማት ከፍተኛ አመራሮች በተገኙበት ከክፍለ ከተማ እና ከወረዳ አመራሮች ጋር የውይይት መድረክ አካሂዷል ።

የመክፈቻ ንግግር ያደረጉት የአዲስ አበባ ሰላምና ጸጥታ አስተዳደር ቢሮ ኃላፊ ክብርት ወ/ሮ ሊዲያ ግርማ በከተማው የተካሄዱ አለም አቀፍ ስብሰባዎች እና በአደባባይ የተከበሩ የሃይማኖትና ህዝባዊ በዓላት ያለምንም የጸጥታ ችግር ፍፁም ሰላማዊ በሆነ መንገድ ተከብሮ እንዲጠናቀቅ ሁለቱ ተቋማት የጸጥታ ሀይሉን በማቀናጀትና በማስተባበር ያከናወኑት ውጤታማ ተግባር በቀጣይም አጠናክሮ ማስቀጠል እንደሚገባ ገልጸዋል።

ከወንጀል መከላከልና መቀነስ ስራዎቻችን ጋር ተያይዞ ህብረተሰቡን የሰላም ባለቤት በማድረግ ውጤታማ የሆነ ስራዎች መሰራት መቻሉን ማህበረሰቡ የደንብ ማስከበር አጋዥ እንዲሆን የግንዛቤ ማስጨበጫ ስራዎችን አጠናክሮ በመሰራት የደንብ መተላለፍ በከተማችን እየቀነሰ መምጣቱን ኃላፊዋ ተናግረዋል ።

አክለውም በቀጣይ በከተማችን የሚካሄደው 6ኛው ሀገር አቀፍ ምርጫ በሰላም እንዲጠናቀቅ የማህበረሰብና የፀጥታ መዋቅርን በማቀናጀት ህዝቡን የሰላም ባለቤት በማድረግ ግንዛቤ መስጠት ስራዎች ተጠናክረው መሰራት አለባቸው ብለዋል።

የባለስልጣኑ ዋና ስራ አስኪያጅ ሻለቃ ዘሪሁን ተፈራ ውጤታማ የሆኑ አፈፃፀሞች የተገኙት ቅንጅታዊ አሰራር በመዘርጋቱ ስራዎችን በዕቅድ መሠረት ማከናወን በመቻሉ መሆኑን ገልጸዋል ።

አክለውም በቀጣይ ከተማችን ከደንብ መተላለፍ የጸዳች ሰላምና ጸጥታዋ የተጠበቀ ውብ ጽዱ እንድትሆን የቅንጅት ስራዎችን በማጠናከር በክፍተት የታዩ ጉዳዮችን ዕቅድ በመከለስ የተሻለ ስራ ለማከናውን ዝግጁ መሆን እንደሚገባ ተናግረዋል።

የአዲስ አበባ ከተማ አስተዳደር ሰላምና ጸጥታ ቢሮን የ2018 በጀት ዓመት የሩብ ዓመት ዕቅድ አፈጻጸም ሪፖርት በቢሮው የእቅድና በጀት ዳይሬክተር አቶ ማስረሻ ሀብቴ ቀርቧል ።

ቢሮው ከሚመለከታቸው አካላት ጋር በትብብር በመስራት በከተማዋ ውስጥ ሠላምና ጸጥታን የሚያደፈርሱ አዝማሚያዎችን ቀድሞ በመለየት እና የተፈጸሙ ድርጊቶችን ሳይባባሱ በቅንጅት በመከላከል የከተማውን እና የህብረተሰቡን ደህንነት ለማስጠበቅ በርካታ ተግባራት ማከናወኑን በሪፖርቱ ተገልጿል ።

የባለስልጣኑ የ2018 በጀት ዓመት የሩብ ዓመት ዕቅድ አፈጻጸም ሪፖርት በባለስልጣኑ የእቅድና በጀት ዳይሬክተር ኮለኔል አድማሱ ተክሌ አቅርበዋል ።

ከደንብ ተላላፊዎች ቅጣት እና ከተወረሱ ንብረቶች ጨረታ ሽያጭ እስከአሁን ባለው ከ63 ሚሊዮን ብር በላይ ገቢ ወደ ፋይናንስ ገቢ ማስገባት መቻሉን በሪፖርቱ ተገልጿል ።

በመጨረሻም በስራ አፈጻጸም ግምገማው ሰፊ የሆነ ውይይት በማድረግ የተሳተፉ አመራሮችና ዳይሬክተሬቶች በቀረበው ሪፖርት ላይ አስተያየትና ጥያቄዎች አቅርበው ከመድረኩ ምላሽ ተሰጥቶበት የአዲስ አበባ ከተማ ሰላምና ፀጥታ አስተዳደር ቢሮ ኃላፊ ክብርት ወ/ሮ ሊዲያ ግርማ የቀጣይ ስራ አቅጣጫ በመስጠት ግምገማዊ ውይይቱ ተጠናቋል።።

ዘገበው ፡- የአዲስ አበባ ከተማ አስተዳደር የደንብ ማስከበር ባለሥልጣን ኮሙዩኒኬሽን ጉዳዮች ዳሬክቶሬት ነው፡፡