ህብረተሰቡ ከደንብ ማስከበር ጋር በመቀናጀት አዋኪ ተግባራት መከላከል እንዳለበት ተገለፀ ።

20/ዐ1/2018 ዓ.ም
**አዲስ አበባ**

የአዲስ አበባ ከተማ አስተዳደር የደንብ ማስከበር ባለሥልጣን አዋኪ ድርጊቶችን ለመከላከልና በስነምግባር ብልሹ አሰራር ዙሪያ ከቂርቆስ፣አቃቂ ቃሊቲ ፣ ንፋስ ስልክ፣ቦሌ፣የካ እና ለሚ ኩራ ክፍለ ከተማ ከተወጣጡ የህብረተሰብ ክፍሎች ጋር የባለሥልጣኑ አመራሮች በተገኙበት የውይይት መድረክ አካሂዷል ።

በመድረኩ የመክፈቻ ንግግር ያደረጉት የባለስልጣኑ ዋና ስራ አስኪያጅ ሻለቃ ዘሪሁን ተፈራ ደንብ ማስከበር በከተማ አስተዳደር የተሰጠውን ተልዕኮ በመወጣት በዋነኝነትም ዘጠኙ የደንብ መተላለፎች በመከላከል በመቆጣጠርና እርምጃ በመውሰድ በከተማችን መሬት ባንክ የገቡትን መሬቶችን በመጠበቅ ምንም አይነት ወረራ እንዳይከሰት እንዲሁም በከተማችን የሚስተዋሉ ሌሎች የደንብ መተላለፎች እንዲቀንሱ በርካታ ተግባራት መከናወናቸውን ገልጸዋል።

አክለውም የትውልድ ገዳይ የሆኑትን አዋኪ ተግባራት ለመከላከል ህብረተሰቡ ከደንብ ማስከበር ኦፊሰሮች እና የጸጥታ አካላት ጋር በመቀናጀት የግንዛቤ ስራዎችን አጠናክረው መስራትና እርምጃ እንዲወሰድ የበኩላቸውን ሚና መወጣት እንደሚገባ ተናግረዋል ።

የአዋኪ ተግባር ምንነትና የማህበረሰቡ ሚና በሚል ባለስልጣኑ ከኢትዮጵያ ፖሊስ ዩኒቨርስቲ ጋር በመተባበር የተዘጋጀው ሰነድ በዶ/ር ዋና ኢንስፔክተር ኤርሚያስ ከበደ ቀርቧል።

የማህበረሰባዊ እሴቶች ምንነትና ጠቀሜታ፣ ከማህበረሰብ እሴቶች ማፈንገጥ፣ አዋኪ ተግባራት በአዲስ አበባ ምን እነደሚመስል ፣ አዋኪ ድርጊቶችን እንዴት መፍታት እና መከላከል እንደሚቻል በሰነዱ በዝርዝር ተካቷል ።

ብልሹ አሰራርና ሌብነትን ለመከላከል የህብረተሰብ ሚና'' በሚል የተዘጋጀው ሰነድ በባለስልጣኑ የስነ ምግባርና ፀረ ሙስና ዳይሬክቶሬት ዳይሬክተር አቶ እዮብ ከበደ ቀርቦ ውይይት ተካሂዶበታል።

በመድረኩ የባለስልጣኑ ም/ስራ አስኪያጅ አቶ ንጋቱ ዳኛቸው ህብረተሰቡ በአሁኑ ሰዓት ህገ ወጥነትን ለመከላከል እያደረገ ያለውን ስራ በማጠናከርና በባለቤትነት ተባባሪ በመሆን ሊሰሩ እንደሚገባና ከመሰል አዋኪ ተግባራት ራሳቸውን በማራቅ ለሌሎች አርዓያ መሆን እንደሚጠበቅባቸው ተናግረዋል ።

በመጨረሻም ከተሳታፊዎች ጋር ሰፊ ውይይት በማድረግ ለተነሱ ሀሳቦችና ጥያቄዎች ከመድረኩ ምላሽና አስተያየት ተሰጥቶበት መድረኩ ተጠናቋል ።

መረጃው ፡-የአዲስ አበባ ከተማ አስተዳደር የደንብ ማስከበር ባለሥልጣን ኮሙዩኒኬሽን ጉዳዮች ዳሬክቶሬት ነው፡፡