وعشان يتغلبوا ع الموضوع ، يديروا في مراجعة مع رواحهم ويقيموا معتقداتهم ، وينبشوا ورا الساس اللي بنيت عليه ، عشان يعرفوا لو كان الميزان اللي يقيسوا بيه في الأمور قاعد يخدم في مصلحتهم فعلياً ولا خلاص معش ينفعهم .

الميديا خلت شباب والبنات سقف طموحاتهم عالي بكل ، سواء في شريك حياتهم او طبيعه الحياة يلي يبوها ، مع انهم لا ظروفهم ولا مجتمعهم يسمح انهم يعيشو الحلم يلي يبوه ، لهذا كلها تجري وراء الاوهام لا يلقو حب ولا علاقه دوم ولا مستقبل ناجح .

خاطري تبطلوا دور محور الكون شوية ، وتشوفوا حياتكم شوية ، مفيش داعي تكملوا حياتكم تحاولوا تلفتوا إنتباه غيركم ، وتخلوا الأنظار كلها عليكم وتقللوا من قيمة غيركم بس لإرضاء النقص الي عندكم .

مافيش شيء قاعد يفوت هكي ، و مافي شيء عادي كل شيء نحسوا فيه و أضعاف إحساسك حتى لو خارجيًا باين العكس ، اللي ورا كلمة "عادي" قصة أنت مش عارف عليها شيء .

ما يرفضوش الانتقاد من أول كلمة ، يديروا ردة فعل متكنطية وعاطفية تخليهم يصكروا علي رواحهم لدرجة لا عاد يمشي معاهم كلام ولا نقاش ، ولا يتقبلوا فكرة انهم يغيروا من رواحهم .

بالنسبة ليا الناس اللي شايفين رواحهم فكرياً يسحابوا إن آراءهم فوق الناس كلها ، علي أساس انهم متمكنين من الحقائق وعارفينها خير من غيرهم ، بس الحقيقة تقول إن شعورهم بالاستعلاء هذا ما طلعش إلا من خوفهم الزايد علي تقديرهم لنفسيتهم ، ويبوا يندسوا وراه عشان يحموا قيمتهم قدام رواحهم .

التواضع الفكري مش انك شخصية ضعيفة ولا تنهز بسرعة ، ولا انك تنذل وتوافق علي اي كلام ينقالك عشان ترضي الناس ، لما نكون متواضع فكرياً برضو مش انه انا ما عنديش مبدأ بكل ، انا واثق في كلامي ومقتنع بيه لكن عقلي يتقبل لو حد جابلي دليل قاطع يثبت اني غلطان ، عادي نقوله "صح كلامك" من غير ما نحس انه قيمتي نقصت ، راهو شجاعة وفروسية عقلية ، الشخص الذكي فكرياً ما يطيحش قدره واثق في عقله ، لدرجة انه ما يخافش من فكرة ممكن يكون غالط في لقطة معينة ، باختصار تقعد إنسان "مكتفي بروحه" وما عندكش عقدة نقص مش هامك تفوز في كل نقاش عشان تبان الذكي ، لأن قيمتك قدام روحك ثابتة ومش موقفة علي كلمة أنت الصح .

عموماً إن مهما الواحد تغير للأحسن ولا حتى حاول يتغير ، يلقى الناس ما زالت تعاير فيه بأخطائه القديمة ، وهذا أحقر شي ممكن يديره أي حد إنه يقعد يمسك عليك غلطة فات وقتها ، نحس فالموضوع عقدة نقص عندهم اصلاً اللي يعايرك بالماضي مش هامه مصلحتك غير هو يبي يغطي علي عيوبه ويحسس روحه إنه خير منك ، واللي مقعمزين في الماضي نحسهم عقولهم صغار ، باختصار كلام الناس وتعبيرهم يعبر علي نقصهم هما مش عليك أنت ، طالما أنت تغيرت وراضيت ضميرك صكر وذانك ومتعدلش علي حد .

الشخص الناجح مش مبروز روحه بإنجازاته ديما عينه ع الحاجة الأقوى ، ومستصغر اللي داره أمس ، وتلقاه ديما مش مستقر ، ولا يطمن لأي مرحلة يوصللها لأن عينه ع الأفضل ديما .

توا بنكون معاكم صريح ما فيش حد فينا يقدر يعيش حياته بالطريقة اللي تريحه مية في المية وهو مش مدور كلام الناس ، ومهما قعدنا نكابروا ونقولوا والله ما يهمني حد وما نعدل على حد ، يقعد رأي الناس والوسط اللي عايشين فيه يأثر فينا ولو حاجة بسيطة حتى لو كان التأثير هذا في العقل الباطن بس ، نحنا كبشر طبيعتنا اجتماعيين وكل واحد منا يحب يحس روحه مقبول وسط الناس اللي يعرفهم ، وزيد عليها نحنا في ليبيا عيشتنا اجتماعية مترابطة والعيلة والناس كلها تدخل في بعضها ، يعني كلمة شن بيقولوا علينا الناس هذي كبرنا وتغذينا عليها وتلقاها تسبق في قرارات واجد في حياتنا وحتى في تفاصيلنا اليومية ، لكن الشطارة وين الشطارة إنك توصل لمرحلة تلفتر فيها كلام الناس ، والحاجات تخص حياتك ومستقبلك سكر وذانك ودير اللي يريحك أنت ويناسبك ، والحاجات تخص الأصول والاحترام هنا طبيعي الواحد يدير حساب للناس وللعرف ، لأنك عايش وسط مجتمع وتبي تقعد علاقتك كويسه بالجميع ، ف انه نلغوا تأثير كلام الناس نهائيًا هذي كذبة نكذبوا فيها علي أنفسنا .

شفتوا لما تلتم عليكم مشاعر عكس بعضها وتقعدوا اليوم كله ادسو فيهن ، وديروا في رواحكم مش فارقه معاكم ، ويجي الليل تلقوا رواحكم وجهاً لوجه مع التناقضات اللي قاومتوا فيهن طول اليوم .

مش طبيعي النقد اللي يجيك من الناس وللهِ يجيب المرض ، خاصةً لما يجيك من ناس ما طلبتش منهم رأي ، والأسلوب واضح إنهم مش جايين ينصحوا جايين يجرحوا وخلاص ، فيه فرق بين واحد ينصحك من نيته ، واحد يستغل النصيحة بحجة عشان ينقص منك .

وحدة من بديهيات الحياة:
راهو عادي جدًا تشوف بشر أفضل منك ، مش لازم تحسدهم ولا تطمع في عيشتهم ، ومش لازم برضو تكون كيفهم وتقعد تقلد فيهم وتستنسخهم ، ومش شرط حتى لازم دير معاهم علاقات ، يكفي انك تشوفهم وتسكت .

في صنف من البشر في الحياة ما زالوا يجروا ورا اللي بايعهم ، ويهينوا في نفسهم علي خاطر ناس مش حاسبينهم أصلاً ، الصنف هذا مستعد يتبهدل ، وينهان ، ويتنازل علي حقه ، ويسمع الكلام الشين ، ويمسح كرامته في الأرض ، هذا كله عشان يقعد موجود في حياة حد مسترخصه .

من حبي للفرص وكرهي إني نضيعها ، تلقوني حتى وأنا مقتنع إن الشي مش ليا وما يناسبنيش ، وحتى لما الناس اللي حواليا ينصحوني بنفس الإحساس اللي داخلي ، نستمر في خوض التجربة وإعطاء الفرص ، لعند اللحظة اللي نقرر فيها نستغنى بكامل إرادتي ، حتى لو كانت التجربة هذي كلفتني خسائر .

عشان تلغي صفة متحبهش فيك اعترف بيها ، لأنه كل مابتنكر وجودها حتضهر علي هيئة محاولة اثبات ، والناس لما بتحاول تثبت حتحس بنقص الصفة هذي فيك ، والحل ساهل ، اول ماتبطل تنكر الصفة هذي أنت بروحك حتحس براحة ، وبعدها تبدا تخدم عليها لين تحول ، مجرد التقبل لها حتفتك منها .

↜ اهلا فيك يا غالي منور القناة ؛ 🤍
↜ الاسم ↼ 𝒉𝒐𝒘𝒂𝒊𝒅𝒂ღ
↜ لا تغادر يا طيب، منورنا .
— — — — — — — — —

↜ تم مغادرة عضو من القناة
— — — — — — — — —
↜ الاسم ↼ ݺ،النائلي 🗽.
↜ الوقت ↼ 03:55AM
↜ بواسطة : @hazrrbot
↜ تم حظره من القناة ✓

↜ تم مغادرة عضو من القناة
— — — — — — — — —
↜ الاسم ↼ ݺ،طاهر،المصراتي🥷🏿
↜ الوقت ↼ 06:37AM
↜ بواسطة : @hazrrbot
↜ تم حظره من القناة ✓