እውነተኛ አገልጋይ በራሱ ችሎታ፣ እውቀት ወይም ጥረት አይመካም። በህይወቱ ላከናወነው መልካም ነገር ሁሉ ምስጋናውን ለሰጠው ጸጋ ያቀርባል። በገዛ ጉልበቱ አልፎ የተሻገረ መስሎት አይታበይም፤ ይልቁንም "ዛሬ ባለሁበት ማንነቴ በእግዚአብሔር ጸጋ እኔ ነኝ" ብሎ በትህትና ይንበረከካል። ይህ ትህትና እና የጸጋ ጥገኝነት ህይወቱንና አገልግሎቱን የሚያንፀባርቅ እውነተኛ ውበት ይሰጠዋል።

“ጌታ ኃጢአቱን የማይቆጥርበት ሰው ብፁዕ ነው።” — ሮሜ 4: 8

​በዚህ ዓለም ላይ ትልቁ ደስታና ዕረፍት ምንድን ነው? ብዙዎች ሀብት፣ ሥልጣን ወይም ዝና ሊመስላቸው ይችላል። ነገር ግን ቅዱሱ መጽሐፍ እውነተኛውን ብፅዕና (ደስታ) የሚያያይዘው ከውስጥ ማንነታችንና ከእግዚአብሔር ጋር ካለን ግንኙነት ጋር ነው። ሐዋርያው ጳውሎስ በመዝሙረኛው ዳዊት ቃል ተደግፎ እንደነገረን፣ እውነተኛ ብፁዕ ሰው ማለት "ጌታ ኃጢአቱን የማይቆጥርበት ሰው" ነው።
​
የማይቆጠር ኃጢአት ማለት ምን ማለት ነው?
በሒሳብ ስሌት ወይም በሕግ መዝገብ ውስጥ እዳ እንደሚመዘገብ ሁሉ፣ ኃጢአትም በሰውና በእግዚአብሔር መካከል ያለ ትልቅ እዳ ነው። ነገር ግን በኢየሱስ ክርስቶስ መስቀል ላይ በተከፈለልን ዋጋ ምክንያት፣ በእርሱ የሚያምኑ ሁሉ እዳቸው ተደምስሷል። እግዚአብሔር ኃጢአታችንን "አይቆጥርብንም" ሲባል፣ ኃጢአት አልሰራንም ማለት ሳይሆን፣ የኃጢአታችን ፍርድና ቅጣት በክርስቶስ ላይ ተጭኗል (ኃጢአታችን ለክርስቶስ ተቆጠረ) እና​ የክርስቶስ ፍጹም ጽድቅ ደግሞ ወደ እኛ መዝገብ ተዛውሯል/ተቆጥሮልናል (2ኛ ቆሮንቶስ 5:21) ማለት ነው።
​
ይህ ብፅዕና በሰው መልካም ሥራ፣ በሥጋዊ ጥረት ወይም በራሳችን ጽድቅ የሚገኝ አይደለም። ሙሉ በሙሉ በነጻ የሚሰጥ የእግዚአብሔር ጸጋ ነው። እኛ ልንከፍለው ያልቻልነውን የኃጢአት እዳ ክርስቶስ ሙሉ በሙሉ ስለከፈለው፣ እግዚአብሔር በመንፈስ ቅዱስ አማካይነት የሰውን ልብ ስያነቃቃ፤ በጸጋው ጥሪ በእምነትና ንስሐ ወደ እርሱ የሚመጡ ሁሉ የዚህ ነጻነትና ብፅዕና ተካፋዮች ይሆናሉ።

የኃጢአት በደለኝነት ስሜትና የፍርሃት ሕይወት የሰውን ውስጣዊ ሰላም ያጠፋል። ነገር ግን እግዚአብሔር ኃጢአታችንን እንደማይቆጥርብን ስንረዳ፦
➙​ከበደለኝነትና ከኩነኔ ስሜት ነጻ እንወጣለን።
➙​ከእግዚአብሔር ጋር የሚሆን እውነተኛ ውስጣዊ ሰላም ይኖረናል።
➙​በፍቅር ላይ የተመሠረተ አዲስ አኗኗር እንኖራለን።
​
"ጌታ ኃጢአቱን የማይቆጥርበት ሰው ብፁዕ ነው" የሚለው የእግዚአብሔር ቃል ለወደቀው የሰው ልጅ ሁሉ የተላከ የወንጌል የምስራች ነው። ዛሬም ቢሆን እግዚአብሔር በጸጋው ወደ እርሱ የሚመጡትን ሁሉ ለመቀበል ዝግጁ ነው። የኃጢአትህ ብዛት ወይም የሕይወትህ ውድቀት ምንም ያህል ቢሆን፣ በክርስቶስ ደም ታጥበህ "ጌታ ኃጢአቱን የማይቆጥርበት ብፁዕ ሰው" የመሆን እድል አለህ። ይህንን የእግዚአብሔርን ያልተገባ ጸጋና ፍቅር በማሰብ ሁልጊዜ በደስታና በምስጋና እንኑር።

@christcentered7

የሁሉ ሰጪ የሆነውን የጌታን ታላቅነት እያሰብን፣ በቅዱሳን ህብረት መካከል የምንቀበለው በረከት እጥፍ ድርብ ነው። በቃሉ እንደተጻፈው "ወንድሞች በኅብረት ቢቀመጡ መልካም ነው፤ እነሆ፥ እንዴት ያማረ ነው!" (መዝሙር 133:1)። ይህ ህብረት የቃሉን እውነት የምንካፈልበት፣ እርስ በርሳችን በወንድማማች ፍቅር የምንታነጽበትና እምነታችን የምታደስበት የጸጋ መድረክ ነው።

​የነፍሳችንን ጥማት በሚያረካው፣ መንፈሳችንን በሚያደሰው በእግዚአብሔር ፊት ተገኝተን አምላካችንን በቅዱሳን ጉባኤ መካከል እናመስግን፤ ሰላሙንም በልባችን እንቀበል።

​እንግዲህ እግሮቻችንን ወደ ቤቱ እናቅና፤ ልባችንንም ለበረከቱ እናዘጋጅ!

ኑዛዜ(Confessions) — የቅዱስ አውግስጥኖስ የሕይወትና የእምነት ጉዞ፤
​
በ4ኛው ክፍለ ዘመን በቅዱስ አውግስጥኖስ የተጻፈ፣ በዓለም ሥነ-ጽሑፍና በክርስቲያናዊ መንፈሳዊነት ታሪክ ውስጥ ትልቅ ስፍራ የሚሰጠው ድንቅ መጽሐፍ ነው። መጽሐፉ ደራሲው ከፈጣሪው ጋር ባደረገው ጥልቅ የግል ጸሎትና ንግግር መልክ የተዋቀረ ሲሆን፣ በውስጡ 13 ክፍሎችን (መጻሕፍትን) ይዟል።
​የመጽሐፉ ዋና ዋና ጭብጦች
➙​ አውግስጥኖስ ከወጣትነት እድሜው ጀምሮ በዓለማዊ ፍላጎት፣ በስጋ ፈተናና በተሳሳቱ ፍልስፍናዎች (እንደ ማኒካውያን እምነት) ውስጥ ያሳለፈውን ምስቅልቅል ሕይወት በግልጽ ያስቀምጣል።
➙​ አእምሮው ዕረፍት ያጣበትንና እውነተኛውን አምላክ ለማወቅ ያደረገውን ረጅም የእውቀትና የፍልስፍና ፍለጋ ያቀርባል።
➙​ እናቱ ቅድስት ሞኒካ በጸሎቷ ያፈሰሰችው እንባ፣ የቅዱስ አምብሮስ ትምህርትና በሚላን ከተማ ያጋጠመው ድንገተኛ የመንፈስ ቅዱስ ጥሪ አውግስጥኖስን እንዴት ሙሉ በሙሉ ወደ ክርስቶስ እንዳመለሰው ይተርካል።
➙​ በመጨረሻዎቹ ክፍሎች ስለ ጊዜ፣ ስለ ትውስታ (memory)፣ ስለ ፍጥረትና ስለ እግዚአብሔር ምስጢር ጥልቅ ስነ-መለኮታዊና ፍልስፍናዊ ትንተናዎችን ያቀርባል።
​
​መጽሐፉ፤ የሰው ልጅ የቱንም ያህል ቢሳሳትና ከእግዚአብሔር ቢርቅ፣ በእውነተኛ ንስሐና በፈጣሪ ቸርነት ወደ ሕይወት መመለስ እንደሚችል የሚያሳይ የታሪክ ምስክርነት ነው።
የመጽሐፉ ዋና ማጠቃለያ የሚሆነው አውግስጥኖስ በታዋቂው አባባሉ የገለጸው እውነት ነው፦ "አቤቱ፥ አንተ ለራስህ ፈጥረኸናልና፣ ልባችንም በአንተ ውስጥ እስኪያርፍ ድረስ እረፍት የለውም"

በጥያቄያችሁ መሠረት መጽሐፉን ከታች አስቀምጬዋለሁ 👇👇

ኦሪት ዘዳግም 33:26-27 (NASV)

“አንተን ለመርዳት በሰማያት ላይ፣ በደመናትም ላይ በግርማው እንደሚገሠግሥ፣ እንደ ይሽሩን አምላክ ያለ ማንም የለም።
ዘላለማዊ አምላክ (ኤሎሂም) መኖርያህ ነው፤ የዘላለም ክንዶቹም ከሥርህ ናቸው🥰

ኧራ አሜን 🙏🙌

የክርስትና ሕይወት በሁለት እውነታዎች መካከል የሚኖር መንፈሳዊ ጉዞ ነው፦ የተሰጠንን ማንነት እና የምንኖርበትን እውነታ የማስታረቅ ጉዞ።

​1. የታወጀው ማንነት (Position)
በክርስቶስ ኢየሱስ በኩል እግዚአብሔር አስቀድሞ ስምና ስፍራ ሰጥቶናል። ይህ በፍጹም በሥራችን ያገኘነው ሳይሆን በጸጋው የተሰጠን ድንቅ ስጦታ ነው፦
➙​የእግዚአብሔር ልጆች ነን (1ኛ ዮሐንስ 3፥1)
➙​ቅዱሳን ነን (1ኛ ቆሮንቶስ 1፥2)
➙​ተጠርተናል (ሮሜ 8፥30)
➙​ድነናል (ኤፌሶን 2፥8)

​2. የሚኖረው ማንነት (Practice)
ጉዞው የሚጀምረው እዚህ ጋር ነው። የተቀበልነውን የታወጀ ማንነት በዕለት ተዕለት ሕይወታችን የመግለጥ እና የመኖር ሂደት ነው።
​ከተጠራንበት ጥሪ ጋር የሚመጥን አካሄድ እንድንንቀሳቀስ መጽሐፍ ቅዱስ ያሳስበናል (ኤፌሶን 4፥1)።

​ስለዚህ ክርስትና ያልሆንነውን አዲስ ነገር ለመሆን የምናደርገው የኃይል ግብግብ አይደለም፤ ይልቁንም በክርስቶስ የሆንነውን ማንነት በተግባር ወደ መሆን የምናደርገው የእድገት መስመር እንጂ።

​የሐዋርያው ጳውሎስ ጸሎት አስቀድሞ በተጠናቀቀው የእግዚአብሔር ሥራ ላይ የተመሠረተ ነው፦
​“...አምላካችን ለጥሪው የበቃችሁ አድርጎ እንዲቈጥራችሁ፣ ...እንጸልያለን።” — 2ኛ ተሰሎንቄ 1፥11
➙ ​ጥሪው የእግዚአብሔር ሥራ ነው፤ ጸሎቱ እንድንጠራ ሳይሆን፣ ከተጠራንበት ታላቅ ጥሪ ጋር የሚመጥን ስብዕና እና ፍሬ በሕይወታችን እንዲገለጥ ነው።
➙ ​ጥሪው ታላቅ እንደመሆኑ መጠን በራሳችን ጥረትና ሥጋዊ አቅም ብቻ ልንመላለስበት አንችልም። ስለዚህ የዘወትር ምልጃችን "አባት ሆይ! ለአንተ የተለየውን ማንነቴን በምድር ላይ እንድኖር በጸጋህ አቅም ሁነኝ" የሚል ይሁን።

@christcentered7

ክርስቶስ ብቻ (Solus Christus)

​ማዕበል በናወጠውና ተስፋ በቆረጠው ዓለም ውስጥ፣ የሰው ልጅ ነፍስ የምትጠጋበትና የምታርፍበት ጽኑ መሠረት ትፈልጋለች። ለዚህም መሠረታዊና ብቸኛ መልስ፦ ኢየሱስ ክርስቶስ ብቻ ነው!

​ይህ እውነት በሦስት ታላላቅ ምሶሶዎች ላይ ይቆማል፦

​1. የክርስቶስ ማዕከላዊነት ላይ
ኢየሱስ ክርስቶስ የክርስትና አስተምህሮ ማሟያ ሳይሆን ራሱ ማዕከሉና መሠረቱ ነው። ከእርሱ ውጭ ሌላ አማላጅ፣ ሌላ መንገድ፣ ወይም ሌላ የድኅነት በር የለም። ነፍሳችን የምትቆመው በሰዎች መልካም ሥራ ወይም በሃይማኖታዊ ትውፊቶች ላይ ሳይሆን፣ በሕያው የእግዚአብሔር ቃል ላይ በተገለጠው በኢየሱስ ማንነት ላይ ብቻ ነው።

​2. የነፍሳት እረፍት በተጠናቀቀው የመስቀሉ ሥራ ላይ
"ተፈጸመ!" (ዮሐንስ 19:30)
የነፍሳት ድነትን እረፍት የሚገኘው በስጋትና በትግል ሳይሆን በደኅንነት እርግጠኝነት ነው። ኢየሱስ መስቀል ላይ የከፈለው ዋጋ ሙሉና ፍጹም ስለሆነ፣ በእርሱ ያመነች ነፍስ ከኩነተ-ኃጢአትና ከሞት ፍርሃት ነፃ ትወጣለች። ይህ እረፍት የሰው ልጅ በገዛ ጥረቱ የሚገነባው ሳይሆን፣ በጸጋ (Sola Gratia) ተቀብሎ በእምነት (Sola Fide) የሚለማመደው ሰላም ነው።

​3. በማይናወጠው በቃሉ መሠረት ላይ
ዓለምና ሥርዓቶቿ ቢናወጡም፣ በክርስቶስ ላይ የተመሠረተች ነፍስ ግን ፈጽሞ አትናወጥም። መሠረታችን በየዕለቱ የሚለዋወጥ ስሜታችን ሳይሆን፣ የማይለወጠውና የማይታጠፈው የእግዚአብሔር ቃል ነው። "ይህም ተስፋ እንደ ነፍስ መልሕቅ አለን እርሱም እርግጥና ጽኑ የሆነ..." (ዕብራውያን 6:19) እንደሚል፣ ክርስቶስ ማዕበሉን አልፎ ነፍሳችንን ከእግዚአብሔር ዙፋን ጋር ያቆራኛታል።
​
ነፍሴ ሆይ፤ ጸንተሽ የምትቆሚበትን ማዕበል የማይበግረውን ዐለት ፈልጊ፤ እርሱም የቀራንዮው ኢየሱስ ነው። የሰው ሥርዓት ይለዋወጣል፣ ምድርም ትናወጣለች፤ በኢየሱስ የተፈጸመው ሥራ ግን ለዘላለም የጸና ነው። ነፍሳችን ያረፈችው በሥራችን ሳይሆን በእርሱ ፍጹም ፍቅር ላይ ነው!

@christcentered7

​ብዙዎቻችን በህይወታችን ውስጥ አሁንም ደስታን፣ ሰላምን እና የህይወት ትርጉምን በሌላ አቅጣጫ ለመፈለግ እንፈተን ይሆናል። በሃብት፣ በትምህርት፣ በሙያ ስኬት ወይም በሰዎች ዘንድ በሚገኝ እፎይታ ውስጥ ፍጹም እርካታን ለመፈለግ እንሮጣለን፤ ነገር ግን በክርስቶስ ካገኘነው እውነተኛ እርካታ ውጪ ያለው ነገር ሁሉ ውስጣዊ ክፍተታችንን ሊሞላው አይችልም። ምክንያቱም የሰው ልጅ ተፈጥሮ በእግዚአብሔር አምሳል የተፈጠረ በመሆኑ፣ የልባችንን ጥልቅ ፍላጎት ሊያረካ የሚችለው ፈጣሪያችንና አባታችን ብቻ ነው።
​ኢየሱስ ክርስቶስ ወደ ህይወታችን የመጣው ህይወት እንዲሆንልንና እንዲበዛልንም ነው።

ዛሬም ቢሆን በህይወታችን የምንፈልገውን እውነተኛ ፍቅር፣ የማይናወጥ ሰላም እና ጽናት የሚሰጠን እርሱ ብቻ ነው። ስለዚህ አምነን የተቀበልነውን ጌታ አጥብቀን እንያዝ፤ ህይወታችንን በየቀኑ በሙሉ እሺታ ለጌታ አሳልፈን እንስጥ፤ በክርስቶስ ያለው ህይወታችንም በኃይልና በደስታ ይታደሳል።
​
"እኔ ሕይወት እንዲሆንላቸው እንዲበዛላቸውም መጣሁ።" — ዮሐንስ 10:10

የብልጽግና ወንጌል አስተምህሮ ዳሰሳ || Prosperity Gospel
የኢትዮጵያ ቃለ ሕይወት ቤተ ክርስቲያን ዋና ጸሐፊ ዶ/ር ስምኦን ሙላት ያስተላለፉት ትምህርት ነው። መሪዎች የቃሉ አስተማሪዎች ሲኾኑ እንዲህ ነው።

ይህ የብልጽግና ወንጌል አስተምህሮ በመጽሀፍ ቅዱስ ሲመረመር የተሰኘው ዳሰሳ በሕይወት ቲቪ youtube ገጽ ላይ ተገኛለችሁ....መደመጥ ያለበት መልዕክት ነው። በዚህ link 👇👇 https://www.youtube.com/watch?v=zu2ZeWwsVzM

የዚህ(የ2018 ዓ.ም) አማት ጉዞዬ፡

በደሌ ከፍ ብሎ ሳለ
ምህረትህ በኔ ላይ ገናና
እኔ ነኝ እግዚአብሔር የረዳኝ
ከትቢያ ካመድ ላይ ያነሳኝ🥰

ይህ አማት የፈጣሪ ምሕረት፣ ታጋሽነትና ጥበቃ የጎላበት ትልቅ የመማሪያ መድረክ ነው። ጊዜ ሲያልፍ አብሮ የሚሸኘው የቀናት ቁጥር ብቻ ሳይሆን የእኛም ውጣ ውረድ፣ ደስታ፣ ፈተናና ውድቀትም ነው።
​
​ይህ ዓመት በሕይወታችን የተከሰቱትን ድካምና ኃጢአት እያየ ፈጣሪ ሳይፈርድብን እስከ ዛሬ የቆየንበት የችሎቱና የትዕግሥቱ ማሳያ ነው (ሰቆቃወ ኤርምያስ 3፥22-23)።
​
ያለፉት ፈተናዎች፣ ያጋጠሙ ውድቀቶችና ያልተሳኩ ዕቅዶች ሁሉ መንፈሳዊ ጥንካሬና እውነተኛ ጥበብ እንድናገኝ የተፈቀዱ መለኮታዊ ትምህርት ቤቶች ናቸው።

​ያለፊትን ጊዜያት መለስ ብሎ ማየት የራስን ድካም ለመገምገም፣ በንስሐ ለመታደስ እና ከሰዎች ጋር የነበረን የበደል ሂሳብ ዘግቶ በሰላም ለመሻገር ወሳኝ እድል ይሰጣል።

ይህ ዓመት ምንም ይሁን ምንም በንስሐ፣ በይቅርታና በምስጋና አጠናቆ ወደ አዲሱ ምዕራፍ መሻገር የመንፈሳዊ ብስለትና የውስጥ ሰላም መሠረት ነው።

ጸጋ ይብዛላችሁ 🙏🙌
@christcentered7

​አዲስ ዘመን ሲጠባ ምድር በደመቀ አበባ እንደምትሸለም፣ የእኛም ሕይወት በእውነተኛ ንስሐ፣ በወንድማማች ፍቅርና በመልካም ፍሬ እንዲሸለም አድርግ። የባከኑ ጊዜያቶችን፣ ያልተሳኩ ዕቅዶችንና የልብን ስብራት በጸጋህ ፈውሰው።

​በዚህ አዲስ ዓመት አእምሮአችንን በአዲስ አስተሳሰብ አድሰው፤ እግሮቻችንን በጽድቅ መንገድ ላይ አጽና። ዘመናችንን ሙሉ በብርሃንህ እንድንመላለስና ለሌሎች የምሕረትህ ማሳያ እንድንሆን እርዳን።

መልካም አድስ ዓመት!
@christcentered7