​ብዙ ጊዜ ስለ ፍጥረት ስናስብ ወደ አእምሯችን የሚመጣው ሳይንሳዊው የቁስ አካል አወቃቀር ወይም ሥነ-ሕይወት (Biology) ሊሆን ይችላል። ነገር ግን፤ ፍጥረት ማለት እንዲሁ በአጋጣሚ የተፈጠረ ቁስ ሳይሆን መለኮታዊ ጥበብ የተገለጠበት የእግዚአብሔር አጠቃላይ መገለጥ ነው።

​እግዚአብሔር ዓለምን የፈጠረው ከምንም (Ex Nihilo - Out of Nothing) ነው። ይህ የሚያሳየው የፈጣሪን ፍጹም ኃያልነት ብቻ አይደለም፤ ፍጥረትን ለመጀመር ምንም ዓይነት ውጫዊ አስገዳጅ ነገር እንዳልነበረበትም ጭምር ነው።

​👉 መለኮት ዓለምን የፈጠረው ጎድሎት ለመሙላት ሳይሆን፣ በፍቅሩና በክብሩ  ሙላት ውስጥ ፍጥረታትን ተጠቃሚ ለማድረግና የማይመረመረውን ክብሩን ለመግለጥ ነው።
​👉 ከከዋክብት ጋላክሲ እስከ ጥቃቅን የሕዋስ አወቃቀሮች ድረስ ያለው ሥርዓት (Cosmos)፣ እግዚአብሔር የሥርዓትና የውበት አምላክ መሆኑን ያሳያል።

​ምንም እንኳን ፍጥረት በሰው ኃጢአት ምክንያት ቢበላሽም፣ እያንዳንዱ አበባ፣ እያንዳንዱ ኮከብ የመለኮትን ታላቅነትና ኃያልኘት ያውጃሉ።

@christcentered7

ጌታን አመልካለሁ(2x)
ከሱ ጋር ለመኖር
ጉዞ ጀምሬአለሁ(2x)

በጽዮን ሀገሬ አብሬው ለመኖር
ጉዞ ጀምሬአለሁ ወደ ቅድስት ሀገር(2x)
ተስፋን ተሞልቼ ከጌታ ልገናንኝ
ስንቄን ተሸክሜ በጎዳና ላይ ነኝ(2x)

አቀበት በዛብኝ ብዬ አልመለስም
በልቤ ካለችው ከጽዮን አልቀርም(2x)
በቀንም በሌትም እሷን እያለምኩኝ
በተስፋ እጓዛለሁ ርስቴን እንዳገኝ(2x)

ጌታ ይጠብቀኛል ቤቴን አስናድቶ
እግዳው ነኝና እጆቹን ዘርግቶ(2x)
ልጁ ደስ እንዲልኝ ተጨንቆ ተጠቦ
ይጠባበቀኛል ጌታ እጁን ዘርግቶ(2x)

✍D.r Dereje Kebede

@christcentered7

የእግዚአብሔር ፍቅር እና ቅዱስ ቁጣ

​በዘመናችን ባሉ አብያተ ክርስቲያናት ውስጥ ስለ እግዚአብሔር ባህርያት ሲሰበክ፣ አብዛኛውን ጊዜ ትኩረት የሚሰጠው ለአንዱ ገፅታ ብቻ ነው። እሱም እግዚአብሔር ፍቅር ነው የሚለው እውነት ነው። አዎን፣ እርሱ ፍፁም አፍቃሪ አምላክ ነው! ነገር ግን ስለ ፍቅሩ ብቻ እየተናገርን፣ ስለ ቅዱስ ቁጣውና ስለ ፍፁም ፍትሁ ወደ ጎን ካልን፣ የምንረዳው መጽሐፍ ቅዱሳዊውን አምላክ ሳይሆን በራሳችን ምኞት የሳልነውን ጣዖት ይሆናል።
​በወንጌላውያን አስተምህሮ መሠረት፣ የእግዚአብሔር ቁጣ እንዲሁ በድንገት የሚቀጣጠል ስሜታዊ ቁጣ አይደለም፤ ይልቁኑ ከቅድስናው የሚነጭ፣ በኃጢአትና በአመፅ ላይ ያለው ዘላለማዊና ፅኑ መቃወም (Holy Antagonism) ነው።
​ “እውነትን በዓመፃ በሚከለክሉ ሰዎች በኃጢአተኝነታቸውና በዓመፃቸው ሁሉ ላይ የእግዚአብሔር ቍጣ ከሰማይ ይገለጣልና፤”
— ሮሜ 1፥18

​አንዳንዶች "እግዚአብሔር ኃጢአትን እንጂ ኃጢአተኛውን አይጠላም" የሚል የተለመደ አባባል ይናገራሉ። ነገር ግን መጽሐፍ ቅዱስ የእግዚአብሔር ቁጣ በኃጢአተኛው ሰው ላይ ጭምር እንደሆነ ይናገራል፤ ምክንያቱም ኃጢአት ከሰው ተነጥሎ በባዶ አየር ላይ የሚንሳፈፍ ነገር አይደለም። እግዚአብሔር ፍፁም ቅዱስ ስለሆነ ኃጢአትንና አመፅን ዝም ብሎ ማለፍ አይችልም፤ ፍትህ መፈፀም አለበት።
​በሌላ በኩል ደግሞ፣ እግዚአብሔር ፍፁም አፍቃሪ ነው። ታዲያ ይህ የፍፁም ቅድስናው (የቁጣው) እና የፍፁም ፍቅሩ መፍትሄ የት ላይ ተገኘ?
​
​ይህ የማይታረቅ የሚመስለው የፍቅር እና የቁጣ መገናኛ የተፈታው በቀራንዮ መስቀል ላይ ብቻ ነው።
👉​ቅዱስ ቁጣው ተገለጠ፦ እግዚአብሔር ኃጢአታችንን እንዲሁ ይቅር ብሎ በነጻ አላለፈውም። በኃጢአታችን ምክንያት እኛ ላይ ሊፈስ ይገባው የነበረው መለኮታዊ ቁጣና ፍርድ ሁሉ በእኛ ምትክ በሆነው በኢየሱስ ክርስቶስ ላይ ፈሰሰ። ክርስቶስ ስለ እኛ እርግማንና የቁጣ ማብረጃ (Propitiation) ሆነ።
👉​ፍፁም ፍቅሩ ተገለጠ፦ እኛ የቁጣ ልጆች ሆነን ሳለን፣ እግዚአብሔር የገዛ ልጁን በመስጠት ለእኛ ያለውን ፍቅር አሳየ።

​በመስቀል ላይ እግዚአብሔር ኃጢአትን የቀጣበትን ፍትሁን አሳይቷል፤ እኛን ደግሞ በክርስቶስ ስራ ያጸደቀበትን ፍቅሩንና ጸጋውን ገልጧል። ማዳን ሙሉ በሙሉ የእግዚአብሔር ሉዓላዊ ስራ (Sola Gratia) ነው!
​
በመስቀል ላይ የተከፈለው ዋጋ ምን ያህል ከባድ እንደሆነ ስንረዳ፣ እግዚአብሔር ለኃጢአት ያለው ቁጣ ምን ያህል አስፈሪ እንደሆነና ለእኛ ያለው ፍቅር ደግሞ ምን ያህል ጥልቅ እንደሆነ እናስተውላለን። ጽድቃችን በራሳችን ስራ ወይም ምርጫ ሳይሆን፣ በእርሱ ስራ ላይ ባለን እምነት ብቻ ነው (Sola Fide)።

የእግዚአብሔርን ቁጣ መረዳታችን፣ በክርስቶስ ላገኘነው ደህንነት የምናቀርበውን የምስጋና ህይወትን ይለውጠዋል።

@christcentered7

ስምህ ይቀደስ 🙌

​"በሰማያት የምትኖር፤ አባታችን ሆይ... ስምህ ይቀደስ..." እያልን የሰማዩን አባት የምናመሰግንበት፣ በሕይወታችንም የእርሱን ቅድስና የምንመሰክርበት ይህ ቃል፤ የቃላት ድርድር ብቻ አይደለም፤ የፍጥረት ሁሉ ናፍቆት፣ የሰው ልጅም የዘወትር የልብ መሻት እንጂ። በሰማያት ያሉ መላእክት ያለማቋረጥ የሚቀድሱትን የአምላክ ስም፣ እኛም በምድር ላይ በሕይወታችን፣ በባሕርያችንና በንግግራችን ቅዱስነቱን እንድንገልጥና እንድንመሰክር የቀረበ የቅድስና ጥሪ ነው።

​የእግዚአብሔር ጸጋና ቅድስና በሕይወታችን ሲገለጥ፣ ጨለማው ይበራል፣ የረከሰው ይነጻል፣ የፈረሰውም ይገነባል። ስለዚህም የቅዱሱን አምላክ ስም እያነሳን በነጻ በሰጠን በረከት እንባረካለን፤ በቃሉ ብርሃንነትም በእርሱ ቅድስና እንመላለሳለን፣ እናድጋለን።

​ስምህ ይቀደስ🙌

የመንፈስ ቅዱስ ሥራዎች — ክፍል 1
​
1. አዲስ ሕይወት ሰጪ (ዳግም ልደት)ነው።
​"ኢየሱስም መለሰ፥ እንዲህ አለው፦ እውነት እውነት እልሃለሁ፥ ሰው ከውኃና ከመንፈስ ካልተወለደ በቀር ወደ እግዚአብሔር መንግሥት ሊገባ አይችልም።" (ዮሐንስ 3:5)

​አንድ ሰው ወደዚህ ምድር የሚመጣው በሥጋዊ ልደት ነው። ነገር ግን ወደ እግዚአብሔር መንግሥት ለመግባት ሥጋዊ ልደት ብቻውን በቂ አይደለም፤ መለኮታዊ ልደት ያስፈልጋል። ​የመንፈስ ቅዱስ የመጀመሪያውና ትልቁ ሥራው በኃጢአት የሞተውን የሰውን ማንነት ለውጦ አዲስ ሕይወት መስጠት ነው። እኛ ራሳችንን ማዳን፣ ማደስ ወይም መቀየር አንችልም። መንፈስ ቅዱስ ግን በክርስቶስ ኢየሱስ ስራ እንድናምንና ዳግም እንድንወለድ ያደርገናል። ከድሮው የኃጢአት ባርነት አውጥቶ፣ የእግዚአብሔር ሕይወት በውስጣችን እንዲዘራ ያደርጋል።
​
Luther's Small Catechism👇
​"እኔ በራሴ ጥበብና ኃይል በጌታዬ በኢየሱስ ክርስቶስ ማመን ወይም ወደ እርሱ መቅረብ እንደማልችል አምናለሁ፤ ነገር ግን መንፈስ ቅዱስ በወንጌል ጠራኝ፣ በስጦታዎቹ አበራኝ፣ በእውነተኛውም እምነት ቀደሰኝና ጠበቀኝ።"

​ 2. የልጅነታችን ማረጋገጫ ነው።
​"የእግዚአብሔር ልጆች መሆናችንን ያ መንፈስ ራሱ ከመንፈሳችን ጋር ይመሰክራል።" (ሮሜ 8:16)

​ብዙ ጊዜ ሰይጣን በሐሳባችን ላይ መጥቶ "አንተ ኃጢአተኛ ነህ፣ እግዚአብሔር አይወድህም፣ የእርሱ አይደለህም" እያለ ሊከስንና የደህንነት እርግጠኝነት ሊያሳጣን ይሞክራል።
​በዚህ ሰዓት በውስጣችን ያለው መንፈስ ቅዱስ ድምፁን ያሰማል። እኛ የባሪያ መንፈስ ሳይሆን የልጅነት መንፈስ ስለተቀበልን፣ በልባችን ውስጥ ሆኖ አንተ የእግዚአብሔር ልጅ ነህ! እያለ ይመሰክራል። ይህ ምስክርነት በስሜት ላይ የተመሠረተ ሳይሆን፣ መንፈስ ቅዱስ በውስጣችን የሚያስቀምጠው ጥልቅና የማይናወጥ መለኮታዊ እርግጠኝነት ነው። እግዚአብሔርን "አባ አባት" ብለን በድፍረት እንድንጠራው የሚያደርገን እርሱ ነው።
​
Charles Spurgeon👇
​"ሰይጣን መጥቶ 'አንተ ኃጢአተኛ ነህ፣ የእግዚአብሔር ልትሆን አትችልም' ሲለኝ፣ እኔም 'አዎ ኃጢአተኛ ነኝ፤ ነገር ግን በክርስቶስ የዳንኩ ልጅ ነኝ' እለዋለሁ። ምክንያቱም የመንፈስ ቅዱስ ውስጣዊ ሹክሹክታ ከሰይጣን ጩኸት በላይ ይበረታል። እርሱ 'አንተ የእርሱ ነህ' የሚል ጥልቅ እርግጠኝነት በነፍሴ ውስጥ ያስቀምጣል።"

3. ​የርስታችን ማኅተም (ዋስትና)ነው።
​"እናንተም ደግሞ የእውነትን ቃል፥ ይኸውም የመዳናችሁን ወንጌል፥ ሰምታችሁ ደግሞም በክርስቶስ አምናችሁ፥ በተስፋው በመንፈስ ቅዱስ ታተማችሁ፤" (ኤፌሶን 1:13)

​በጥንቱ ዘመን በአንድ ዕቃ ላይ ማኅተም ሲደረግ፥ ዕቃው የባለቤቱ መሆኑንና ማንም ሊነካው እንደማይችል ማረጋገጫ ነበር።
​እኛም ወንጌልን ሰምተን ባመንንበት ቅጽበት እግዚአብሔር በራሱ መንፈስ አትሞናል። መንፈስ ቅዱስ በሕይወታችን ውስጥ የእግዚአብሔር የዘላለም የባለቤትነት ምልክት ነው። ከዚህም በላይ ለሰማያዊው ርስታችን እንደ "ቅድመ ክፍያ" ወይም ዋስትና (Guarantee) ሆኖ ተሰጥቶናል። በምድር ላይ ስንመላለስ ምንም ዓይነት የሕይወት ውክቢያ ቢገጥመን፥ እኛ የእግዚአብሔር መሆናችንንና የዘላለም ሕይወት እንዳለን ማኅተማችን ይመሰክራል።

John Owen👇
"በአማኝ ልብ ውስጥ ያለው የመንፈስ ቅዱስ ማኅተም ሁለት ነገርን ያሳያል፤ ባለቤትነትንና ደህንነትን። እግዚአብሔር በእኛ ላይ የራሱን ማኅተም ሲያደርግ 'ይህ የእኔ ነው፤ ማንም ሊነካው አይችልም' ማለቱ ነው። ይህ ማኅተም በምድር ፈተና ውስጥ ስንቀረጽ እንኳ ተደብቆ የማይጠፋ የሰማያዊው ርስት መያዣ ነው።"

@christcentered7

(መዝሙር 143፥8-12)
"አንተን ታምኛለሁና በማለዳ ምሕረትህን አሰማኝ፤ አቤቱ፥ ነፍሴን ወደ አንተ አንሥቻለሁና የምሄድበትን መንገድ አስታውቀኝ። አቤቱ፥ ወደ አንተ ተማፅኛለሁና ከጠላቶቼ አድነኝ። አንተ አምላኬ ነህና ፈቃድህን ለማድረግ አስተምረኝ፤ ቅዱስ መንፈስህም በጽድቅ ምድር ይምራኝ።
አቤቱ፥ ስለ ስምህ ሕያው አድርገኝ፤ በጽድቅህም ነፍሴን ከመከራዋ አውጣት።
በምሕረትህ ጠላቶቼን ደምስሳቸው፥ እኔ ባሪያህ ነኝና ነፍሴን የሚያስጨንቁአትን ሁሉ አጥፋቸው።"

እግዚአብሔርን የመምሰለችን፣​
የትህትናችንም፣​
ሰው የመውደደችንም፣
የትዕግስታችንም፣
የይቅር ባይነታችንም፣
የቅድስና ሕይወታችንም፣
የደስታችንና የሰላማችንም፣
ሰውን የመርዳታችንም፣
የእምነታችንና የጽናታችንም፣
የመመረጣችንና የጽድቃችንም፣
የእኛነታችንና የመልካምነታችንም፣
የስኬታችንና የጥንካሬያችንም፣
ዛሬ ላይ በነጻነት የመቆማችንም ምስጢር...
በሙሉ የእግዚአብሔር ጸጋ ስጦታ እንጂ የገዛ እጃችን ስራ ስላልሆነ፤ ክብርና ውዳሴ ሁሉ ወደ ምንጩ ወደ እግዚአብሔር ነው። በመሆኑ፤ ትኩረታችንን ከራሳችን ላይ አንስተን ፤ማየት፣ ማሰብና ማተኮር ያለብን ወደ እግዚአብሔር ጸጋ ብቻ ነው።

​ የጸጋው ባለቤት ትኩረታችንን ሁሉ ይውሰደው!

ጌታ እግዚአብሔር ሆይ እርዳኝ🙏🤲

1. ካንተ በቀር ሌላ መጠጊያ የለኝምና...
2. የልቤን ጭንቀት የምታውቅ አንተ ብቻ ነህና፤ ልቤም ያርፍ ዘንድ.....
3. አለም በጫጫታ ስትሞላ እኔ በአንተ ውስጥ ሰላምን እንደገኝ፣ መንገዴን በብርሃንህ፣ ልቤን በሰላምህ እንድትሞላው....
4. ከጭንቀቴ በላይ ያንተ ታላቅነት ይታየኛልና፤ በራሴ ጥረት ያልተሻገርኩትን በአንተ ጸጋ እንድሻገረው....
5. ማዕበሉ ቢበረታም አንተ ከእኔ ጋር ነህና፤ እግዚአብሔር ሆይ እጄን ይዘህ እንድታሻግረኝ ዘንድ.....
6. ሰው ሲጨክን አንተ ቸር ነህና፤ በሰዎች መካከል ብቻዬን እንዳልሆን፣ በፅናት እንድቆም እና ካንተ ጋር እንድጠነክር ዘንድ....
7. ሁሉን ማድረግ ለሚቻለው አምላክ ነገሬን ሁሉ አደራ ሰጥቻለሁና፤ ነገን ለአንተ ሰጥቼ ዛሬን በሰላም እንድኖር ዘንድ....
8. ይህንን አዲስ ቀን በበረከትህና በምህረትህ እንድጀምረው፤ የቀኑን ውሎዬን፣ ሃሳቤንና መንገዴን ለአንተ አደራ ሰጥቻለሁና....
9. አዲስ ቀን፣ አዲስ ተስፋ... ዛሬም እንደ ትላንቱ በቸርነትህ....
10. ያንተ እርዳታ ለሁሉም በቂ ነውና፤ ዛሬም ነገም ለዘላለም!

አሜን 🙏🙌

የመንፈስ ቅዱስ ሥራዎች — ክፍል 2

​ 4. እውነተኛው መምህር ነው።
​“አብ በስሜ የሚልከው ግን መንፈስ ቅዱስ የሆነው አጽናኝ እርሱ ሁሉን ያስተምራችኋል እኔም የነገርኋችሁን ሁሉ ያሳስባችኋል።”
   (ዮሐንስ 14፥26)

​ክርስቲያናዊ ሕይወት በሰው ጥበብና ፍልስፍና የሚመራ ሕይወት አይደለም። መለኮታዊ መመሪያ ያስፈልገዋል።
​መንፈስ ቅዱስ የክርስቶስን ተከታዮች ብቻቸውን አልተዋቸውም፤ እውነተኛ መምህር ሆኖ ተሰጥቷቸዋል። መጽሐፍ ቅዱስን ስናነብ፣ በሕይወት መንገድ ላይ ውሳኔዎችን ስንወስንና ሰማያዊውን እውነት መረዳት ሲያቅተን መንፈስ ቅዱስ የቃሉን ትርጉም ይተረጉምልናል። ከመሳሳት ይጠብቀናል፤ እንዲሁም የኢየሱስን ቃላትና ትምህርቶች በትክክለኛው ሰዓትና ቦታ በልባችን ላይ ግልጽ አድርጎ ያሳስበናል።

Martin Luther👇
"የሰዎች ቃልና ትምህርት ጆሯችን ላይ ብቻ ይጮኻሉ፤ ልባችንን ግን ሊለውጡት አይችሉም። መንፈስ ቅዱስ ግን በልብ ውስጥ የሚናገር ፍጹም መምህር ነው። እርሱ በውስጣችን ሆኖ ካላስተማረን በቀር፣ ማንም ሰው የክርስቶስን ወንጌል ቅንጣት ታህል እንኳ ሊረዳ ወይም ሊያምን አይችልም።"

5. የቃሉ ምስጢር ገላጭ ነው።
​“መንፈስም የእግዚአብሔርን ጥልቅ ነገር ስንኳ ሳይቀር ሁሉን ይመረምራልና ለእኛ እግዚአብሔር በመንፈሱ በኩል ገለጠው።”
   (1ኛ ቆሮንቶስ 2፥10)

​መጽሐፍ ቅዱስ ልክ እንደ ሌሎቹ መጻሕፍት በሰው አእምሮና ጥናት ብቻ ተመርምሮ የሚደረስበት ተራ የፊደል ክምችት አይደለም። ቃሉ የተጻፈው በመንፈስ ቅዱስ እስትንፋስነት ስለሆነ፥ ምስጢሩ የሚፈታውም በራሱ በባለቤቱ ነው።
​ብዙ ጊዜ ቃሉን ስናነብ ግር ሊለን ወይም ሊጨልምብን ይችላል። ነገር ግን መንፈስ ቅዱስ በልባችን ሲበራ የቃሉን ጥልቅ መለኮታዊ ምስጢር ይገልጥልናል። ታሪኮቹን ወደ ሕያው ሕይወት ይቀይራቸዋል። ቃሉ ለነፍሳችን ብርሃን፣ ለጉዟችንም መመሪያ እንዲሆን አእምሯችንን ይከፍታል።

John Calvin👇
​"የሰው ልጅ አእምሮ የእግዚአብሔርን ጥልቅ ምስጢር በራሱ ማስተዋል አይችልም፤ ምክንያቱም ያ መንፈሳዊ እውርነት ነው። ስለዚህ መጽሐፍ ቅዱስን ስናነብ የቃሉ ባለቤት የሆነው መንፈስ ቅዱስ በልባችን ውስጥ ምስክርነቱን (Internal Testimony of the Holy Spirit) ሊሰጠንና የቃሉን ምስጢር ሊገልጥልን ይገባል። ያኔ ቃሉ ተራ ፊደል መሆኑ ቀርቶ መለኮታዊ ኃይል ይሆናል።"

ይቀጥላል...
@christcentered7

የመንፈስ ቅዱስ ሥራዎች — ክፍል 3
​
6. የጸጋ ስጦታዎች አከፋፋይ ነው።
​“ይህን ሁሉ ግን ያ አንዱ መንፈስ እንደሚፈቅድ ለእያንዳንዱ ለብቻው እያካፈለ ያደርጋል።” (1ኛ ቆሮንቶስ 12፥11)

​በክርስቶስ አካል (በቤተክርስቲያን) ውስጥ ማንም ሰው ባዶ እጁን አልተቀመጠም። ጌታን ስንቀበል መንፈስ ቅዱስ ለአገልግሎትና ለቅዱሳን ማነጻጸሪያ የሚሆን ሰማያዊ የጸጋ ስጦታ (Spiritual Gift) ይሰጠናል።
​ይህ ስጦታ በራሳችን ችሎታ ወይም ጥረት የምናገኘው ሳይሆን፥ እርሱ እንደ ፈቀደና እንደ ጥበቡ ለእያንዳንዳችን የሚያድለን መለኮታዊ እቅም ነው። አንዱ እንዲያስተምር፣ ሌላው እንዲረዳ፣ ሌላው ደግሞ እንዲያስተዳድር ጸጋን የሚሰጠው እርሱ ነው። ዓላማውም እርስ በርሳችን እንድንደጋገፍና የክርስቶስ አካል እንድታድግ ነው።

Matthew Henry👇
​"በቤተክርስቲያን ውስጥ ያሉ ስጦታዎች ሁሉ ከአንድ ምንጭ የሚቀዱ ናቸው፤ እርሱም መንፈስ ቅዱስ ነው። ስጦታዎች የተሰጡን ለፉክክር ወይም ለትዕቢት ሳይሆን ለአገልግሎት ነው። እግዚአብሔር ለአንዱ የሰጠውን ስጦታ ሌላው እንዲደገፍበት ያደረገው፣ ማንም ሰው በራሱ ሙሉ እንዳልሆነና ወንድሙ እንደሚያስፈልገው እንዲረዳ ነው።"

7. የወንጌል ምሥክርነት ኃይል ነው።
​"ነገር ግን መንፈስ ቅዱስ በእናንተ ላይ በወረደ ጊዜ ኃይልን ትቀበላላችሁ፥ ... እስከ ምድር ዳርቻም ድርም ምስክሮቼ ትሆናላችሁ።" (ሐዋርያት ሥራ 1:8)

​ደቀ መዛሙርቱ ኢየሱስ ከመሰቀሉ በፊት በፍርሃት ተደብቀው፣ በሮችን ዘግተው ይቀመጡ ነበር። ነገር ግን በጴንጤቆስጤ ዕለት መንፈስ ቅዱስ በወረደባቸው ጊዜ ምን ሆነ? ፍርሃታቸው ወደ ሰማያዊ ድፍረት ተቀየረ!
​የመንፈስ ቅዱስ ትልቁ ሥራ አማኞችን ወንጌልን ለዓለም እንዲመሰክሩ መለኮታዊ ኃይል ማስጠት ነው። ወንጌልን መናገር የሰዎች ጥበብና ንግግር ሳይሆን የሰማይ ኃይል ይፈልጋል። እርሱ ሰዎችን የመጋፈጥ ፍርሃታችንን ይሰብራል፤ በምንናገርበት ጊዜም በሰሚዎች ልብ ውስጥ ሰርጾ የሚገባ የእውነት ኃይልን በቃላችን ላይ ያደርጋል።

Charles Spurgeon👇
​"ያለ መንፈስ ቅዱስ ኃይል ብንሰብክ፣ ንግግራችን እንደ ዝናብ ጠብታ በድንጋይ ላይ ይፈስሳል እንጂ ልብን አይሰብርም። ነገር ግን መንፈስ ቅዱስ በቃላችን ላይ ኃይል ሲያደርግ፣ ደካማው ምስክርነታችን እንኳ የሰዎችን ሕሊና የሚወጋና ወደ ክርስቶስ የሚያመጣ የሰማይ መዶሻ ይሆናል።"

8. የእውነተኛ አንድነት ምንጭ ነው።
​"በሰላም ማሰሪያ የመንፈስን አንድነት ለመጠበቅ ትጉ።" (ኤፌሶን 4:3)

​የሰው ልጅ በተፈጥሮው በዘር፣ በቋንቋ፣ በደረጃና በዕውቀት መከፋፈልን ይወዳል። በቤተክርስቲያን (በክርስቶስ አካል) ውስጥ ግን ይህንን የክፍፍል ግንብ የሚያፈርስ ድንቅ ኃይል አለ፤ እርሱም መንፈስ ቅዱስ ነው።​መንፈስ ቅዱስ ልዩነቶቻችን ሳይጠፉ፣ በተለያየ የጸጋ ስጦታ ውስጥ ሆነን በአንድ ልብና በአንድ መንፈስ እንድንተሳሰር ያደርገናል። እውነተኛ የክርስቲያን ፍቅርና አንድነት በሰው ጥረት የሚመጣ ሳይሆን መንፈስ ቅዱስ በልባችን ውስጥ የሚሰፋው ሰማያዊ ማሰሪያ ነው። አማኞችን ሁሉ የአንድ አካል ብልቶች አድርጎ ያስማማል።

Philip Melanchthon👇
​"የሰዎች ስምምነትና ጥምረት በፖለቲካና በሕግ ሊጠበቅ ይችላል፤ የቤተክርስቲያን አንድነት ግን ሰማያዊ ነው። መንፈስ ቅዱስ በተለያዩ አገራትና ቋንቋዎች ያሉትን አማኞች በአንድ እምነትና በአንድ ፍቅር ያጣብቃቸዋል። ይህ አንድነት የሰዎች ጥረት ውጤት ሳይሆን የመንፈስ ቅዱስ ተአምር ነው።"

ይቀጥላል....
@christcentered7

​የሰው ልጅ ውድቀት በጥቂቱ መታመም ወይም መቁሰል ሳይሆን፣ በራሱ መነሳት የማይችልበት ፍጹም መንፈሳዊ ሞት ነው። ሰብአዊ ፍልስፍና፣ ሳይንስና ስልጣኔ የሰውን ልጅ የውጭ ገጽታ ሊያምሩ ይችላሉ፤ ልቡን ግን ሊቀይሩት አይችሉም። ሰው ጥሩ ምክር’ የሚፈልግ ታማሚ አይደለም፤ ሕይወትን የሚሻ ሙት ነው እንጂ። ያንን ሕይወት ደግሞ መስጠት የሚችለው የክርስቶስ ትንሣኤ ብቻ ነው።

@christcentered7

(መዝሙር 20)
1. በመከራ ቀን እግዚአብሔር ይስማህ፤ የያዕቆብ አምላክ ስም ያቁምህ።
2. ከመቅደሱ ረድኤትን ይላክልህ፥ ከጽዮንም ያጥናህ።
3. ቍርባንህን ሁሉ ያስብልህ፤ የሚቃጠል መሥዋዕትህን ያለምልምልህ።
4. እንደ ልብህ ይስጥህ፤ ፈቃድህንም ሁሉ ይፈጽምልህ።
5. በማዳንህ ደስ ይለናል፤ በአምላካችን ስም ከፍ ከፍ እንላለን፤ ልመናህን ሁሉ እግዚአብሔር ይፈጽምልህ።
6. እግዚአብሔር የቀባውን እንዳዳነው ዛሬ አወቅሁ፤ ከሰማይ መቅደሱ ይመልስለታል በቀኙ ብርታት ማዳን።
7. እነዚያ በሰረገላ እነዚያም በፈረስ ይታመናሉ፤ እኛ ግን በአምላካችን በእግዚአብሔር ስም ከፍ ከፍ እንላለን።
8. እነርሱ ተሰነካክለው ወደቁ፤ እኛ ግን ተነሣን፥ ጸንተንም ቆምን።
9. አቤቱ፥ ንጉሥን አድነው፥ በጠራንህም ቀን ስማን።

የመንፈስ ቅዱስ ሥራዎች — ክፍል 4
​
9. የዓለም ወቃሽ ነው።
​"እርሱም መጥቶ ስለ ኃጢአት ስለ ጽድቅም ስለ ፍርድም ዓለምን ይወቅሳል።" (ዮሐንስ 16:8)

​አንድ ሰው ጌታን ሳይቀበል በፊት ኃጢአቱን አይቶ እንዲጸጸትና ንስሐ እንዲገባ የሚያደርገው ማን ነው? የሰዎች ንግግር ወይም የሕግ ጫና ሳይሆን የመንፈስ ቅዱስ መለኮታዊ ውግዘት (Conviction) ነው።
​መንፈስ ቅዱስ ወደ ዓለም የመጣው ሰዎችን ሊኮንን ሳይሆን፣ ስለ ኃጢአታቸው (በክርስቶስ አለማመናቸውን)፣ ስለ ጽድቅ (ክርስቶስ ፍጹም ጻድቅ መሆኑን) እና ስለ ፍርድ (የዚህ ዓለም ገዥ መፈረዱን) በመውቀስ ሰዎችን ወደ ንስሐና ወደ እግዚአብሔር ለመመለስ ነው። በአማኞችም ሕይወት ውስጥ ስሕተት ስንሠራ ወዲያውኑ ልባችንን የሚነካንና ወደ መስመር የሚያስገባን የእርሱው የፍቅር ወቀሳ ነው።

John Calvin 👇
​"የመንፈስ ቅዱስ ወቀሳ ሰዎችን ለማስፈራራት ሳይሆን ለደህንነት የሚሆን ፍጹም ንስሐን በውስጣቸው ለመፍጠር ነው። ይህ ወቀሳ ወደ አማኙ ልብ ሲመጣ፣ የኃጢአትን አስከፊነትና የእግዚአብሔርን ፍጹም ጽድቅ ቁልጭ አድርጎ ያሳያል። አማኙን ከመስመር ሲወጣ ወዲያውኑ ወደ አባቱ እቅፍ የሚመልሰው ይህ የፍቅር ጅራፍ ነው።"

10. የባሕርይ መለወጫ (የመንፈስ ፍሬ) ነው።
​"የመንፈስ ፍሬ ግን ፍቅር፥ ደስታ፥ ሰላም፥ ትዕግሥት፥ ቸርነት፥ በጎነት፥ እምነት፥ የውሃት፥ ራስን መግዛት ነው።" (ገላትያ 5:22-23)

​ክርስቲያናዊ ሕይወት የሕግጋት ስብስብ ሳይሆን የባሕርይ መለወጥ ነው። በገዛ እቅማችን ቁጡነታችንን ወደ ትዕግሥት፣ ጥላቻችንን ወደ ፍቅር ለመቀየር ብንታገልም ሙሉ በሙሉ መለወጥ አንችልም።
​እውነተኛ ለውጥ የሚመጣው ከመንፈስ ቅዱስ ጋር ስንተባበር ነው። በሕይወታችን ውስጥ እንደ ወይን ገበሬ እየሠራ፥ የክርስቶስን መለኮታዊ ባሕርይ በውስጣችን ያፈራል። እኛ የምናደርገው በእርሱ መመራት ብቻ ነው፤ እርሱ ደግሞ በውስጣችን ሰላምን፣ ደስታንና ራስን መግዛትን ማፍራት ይጀምራል። ሰዎች እኛን ሲያዩ የክርስቶስን መልክ እንዲመለከቱ ያደርጋል።

Matthew Henry👇
​"እነዚህ 'የሥጋ ፍሬ' ሳይሆኑ 'የመንፈስ ፍሬ' ተብለው መጠራታቸው፣ በራሳችን መሬት ላይ ሊበቅሉ የማይችሉ ሰማያዊ ተክሎች መሆናቸውን ለማሳየት ነው። የመንፈስ ቅዱስ ሥራ በውስጣችን ያለውን የቆሸሸና የመራራ ባሕርይ ለውጦ፣ እንደ ክርስቶስ ያለ ጣፋጭና አፍቃሪ ማንነትን ማፍራት ነው።"

11. የቅድስና መሪ  ነው።
​"ነገር ግን እላለሁ፥ በመንፈስ ተመላለሱ፥ የሥጋንም ምኞት ከቶ አትፈጽሙ።" (ገላትያ 5:16)

​በውስጣችን ካለው የድሮው የሥጋ ምኞትና ኃጢአት የመሳብ አዝማሚያ ጋር የምናደርገውን ውጊያ በገዛ እቅማችን ማሸነፍ አንችልም። ዛሬስ አልበድልም ብለን ብንቆርጥም እንኳ መውደቃችን አይቀርም።
​የድል ምስጢሩ ግን በመንፈስ መመላለስ ነው። መንፈስ ቅዱስ የቅድስና መንፈስ ነው። በውስጣችን ሆኖ የሥጋን ምኞት እንድንጸየፍና መለኮታዊ ሕይወትን እንድንራብ ያደርገናል። ለእርሱ አመራር እጅ ስንሰጥ፣ እርሱ የኃጢአትን ጉልበት በውስጣችን እየሰበረ በቅድስና መንገድ ይመራናል። ኃጢአትን የምናሸንፈው ታግለን ሳይሆን በመንፈስ ቅዱስ ተመርተን ነው።

John Owen👇
​"በውስጥህ ያለውን የኃጢአትና የሥጋ ምኞት ለመግደል የምታደርገው ጥረት ሁሉ ያለ መንፈስ ቅዱስ ከሆነ ከንቱ ነው። ኃጢአትን በራስህ ጉልበት ለመዋጋት መሞከር ሰይፍ ሳይይዙ ወደ ጦርነት የመግባት ያህል ነው። ኃጢአትን የምንገድለው በመንፈስ ቅዱስ መሪነትና ኃይል ብቻ ነው። እርሱ በውስጣችን የቅድስናን ውበት ሲያሳየን የሥጋ ምኞት ጉልበቱ ይረግፋል።"

ይቀጥላል.....
@christcentered7

ጌታ ሆይ፤
አንዳንዴ በህይወት ጉዞዬ እጅግ ዝዬና ደክሜ፣ በድካሜ ውስጥ ተስገብግቤ፣ ስንፍናዬ ስንፍናን እየወለደ፣ እኔው ራሴ ወድቄ ሌሎች እንዲወድቁ ምክንያት ስሆን እገኛለሁ። ማበርታት ባልችል እንኳ፣ የበረታውንና በብርታት የቆመውን ወንድሜን በሚያቆስልና በሚያደክም ከንቱ ቃላት እንዳልሰብርህ እለምንሃለሁ።
ለስንፍናዬ፣ ለውድቀቴና ለሃጢአቴ ምክንያት እየደረደርኩ፣ የራሴን ስህተት ልክ ለማስመስልና ራሴን ለማጽደቅ ከምሮጥበት የልብ ጥማት አድነኝ። ጥፋቴን በምክንያት መሸፈን፣ ውድቀቴን ይበልጥ ማግዘፍ እንደሆነ አውቃለሁ።

​ስለዚህ አሁን የከንቱነትን ካባ ጥዬ፣ ድካሜን ሳልሸሽግ፣ በፍጥነትና በልብ ሙሉነት ወደ ጸጋህ ዙፋን በደፍረት እቀርባለሁ። ሃጢአቴን፣ ስብራቴንና ውድቀቴን ሁሉ በፊህ ይዤ እገባለሁ፤ በማንም ፊት ሳይሆን በአንተ ፊት እበረከካለሁ፣ እቀርባለሁ፣ እወድቃለሁ።
አንተ በደሌን የምትደመስስ፣ በጸጋህ የምታድስ፣ በምህረትህም የምታቆም አምላክ ነህና ተቀበለኝ። ከውድቀቴ አንሳኝ፣ ከስንፍናዬ አላቀቀኝ፤ መንፈሴን አድስልኝ።

​አሜን🙏🙌