الاكثر تحديا هو ببداية أي فرع جديد لازم تثبّت نفسك على أرض صلبة فـ من تثبت راح يصير البناء عندك اسهل بهواي. حاليا اني بمرحلة الثبيت تقديريا راح تاخذ كم شهر علما تخلص 😆.

شكلي راح اعتمد على المصريين بالحياتية...

المحاضرة الاولى ✅
كانت مقدمة حلوة و بلش بالنوع الاول من الكاربوهيدرات.

راح اتبع كلام هالدكتور بالبداية افهم كيمياء الكاربوهيدرات و البروتين و الدهون و من بعدها ابلش بالمادة 😬.

ليش نسمي المدارات الالكترونية (الاوربيتالات) بالحروف s, p, d, f؟

بزمن ما قبل ميكانيك الكم، العلماء چانوا يدرسون الضوء الي تطلعه الذرات إذا تسخّنت أو اتعرضت لطاقة. يسلطون الضوء على موشور زجاجي، والضوء ينفصل إلى ألوان وخطوط يسموها "الطيف الذري".

الخطوط هاي ما چانت كلها نفس الشكل — بعضها حاد، بعضها منتشر، وبعضها ضعيف. فسمّوها حسب مظهرها:
أ. s (sharp): يعني "حاد"، سموها هيچ لأن الخط الطيفي كان ضيق وواضح جدًا.
ب. p (principal): يعني "رئيسي"، وهاي الخطوط كانت قوية وأساسية بالطيف.
ج. d (diffuse): يعني "منتشر"، لأن الخطوط مشتتة أو ضبابية.
هـ. f (fine): يعني "رفيع" أو "دقيق"، لأن الخط كان دقيق وضعيف.

بعدها لما اجت نظرية الكم، وانفهمت حركة الإلكترونات حوالين النواة، صار عدنا تصور جديد للاوربيتالات (مناطق تواجد الإلكترونات). وكل نوع من هاي الأوربيتالات يختلف بشكلها وطاقتها.

فقرروا العلماء يستخدمون نفس الحروف القديمة، لأن الخطوط الطيفية الي چانوا يشوفوها أصلاً ناتجة عن انتقالات هاي الإلكترونات بين الأوربيتالات.

اذا انت عالم عندك جائزة نوبل و يحكمك حزب النازي شنو تسوي؟

ببداية الأربعينات من القرن الماضي، النازيين (الألمان) غزوا الدنمارك، و كان بموجب قوانينهم يمنعون أي أحد من امتلاك الذهب ويصادروه. بعض العلماء الفيزيائيين كانوا خايفين من مصادرة جوائز نوبل مالهم (اللي مصنوعة من الذهب) ويتعرضون للمسائلة.

لذلك، هربوا ميدالياتهم الذهبية إلى معهد العالم الشهير نيلز بور في كوبنهاغن. هناك، استعان بور بالكيميائي جورجي دي هيفيشي، واللي قدر يذوب الذهب باستخدام الأكوا رييجا (الماء الملكي). بعدين خبّى المحلول البرتقالي على رف في المختبر طول فترة احتلال النازيين (لحد 1945).

بعد نهاية الحرب، رجّع جورجي الذهب إلى حالته الصلبة عن طريق اختزاله من المحلول، وبعدها رجعوا الذهب إلى لجنة نوبل. اللجنة صهرت الذهب وصبته من جديد في قوالب ميداليات نوبل.

خلال الذوبان، الذهب يتأكسد ويذوب بالمحلول، ولما نضيف مادة مختزلة يرجع يترسب كذهب صافي.

it's fun to watch 😆.

و هذا Spectroscope

طريقة عمله كلش بسيطة وهي:
1. تسخّن العنصر حتى يطلع ضوء (مثلاً بالهب).
2. هذا الضوء يدخل على منشور أو شبكة حيود، واللي تكسر الضوء حسب ألوانه (أطواله الموجية).
3. النتيجة تطلع لك خطوط ملوّنة مميزة لكل عنصر، نسميها "الطيف" مال العنصر.

و كل عنصر إله بصمة ضوئية خاصة بيه.
مثال: الهيدروجين يطلع أربع خطوط مشهورة (أحمر، أخضر مصفر، أزرق فاتح، أزرق غامق). و ماكو عنصر ثاني يطلع بالضبط نفس الالوان كل عنصر له الوان معينة يطلعها مثل البصمة!

فكرة النص كانت من كتاب The Disappearing Spoon.

ليش الثلج يزحلق؟

خلال الـ 200 سنة الي فاتوا كان هناك معتقد سائد ان الثلج يزحلق بسبب الضغط و الاحتكاك الي يصير بين رجل الانسان و الثلج, و لكن دراسات علمية حديثة اثبتت ان هذا المعتقد خاطئ كلياً و طلع ما لهم دور اساسي بالموضوع.

شوية خلي نراجع المي, هو عبارة عن H2O مركب ثنائي القطب يتكون من سالب جزئيا (الاوكسجين) و موجب جزئيا (الهيدروجين) من خلال الكهروسالبية, لما يكون بدرجة الانجماد اقل من الصفر سيليزي راح تترتب جزيئات الماء بشكل بلورة صلبة... لهنا تمام؟

حذاءك او اي شي تلبسه او حتى رجلك الحافية, متكونة من مواد كذلك ثنائية القطب, فـ اول ما تخطو خطوة على الثلج راح يصير هناك تفاعل بين جزيئات حذاءك مثلا و الثلج (ثنائي القطب - ثنائي القطب) يسبب اضطراب بالبلورة نتيجة هذا التفاعل فـ طبقة الثلج الملامسة لحذاءك راح تتحرك جزيئاتها بسرعة و تخرب الشكل البلوري الي جانت بي و تصير سائل و بالتالي راح تزحلقك.

هاي المعلومة ممكن تكون ما مهمة بالنسبة للاغلب ولكن مهمة للصناعات و للمستقبل, ممكن يتم اختراع احذية ضد التزحلق؟ او اكتشافات ثانية.

ليش اكو ثلج شفاف و ثلج ابيض؟
هو مو المي ما له لون؟ فكيف الثلج الي ينزل من السما و الثلج الي نجمده يكون ابيض؟

ببساطة بسبب الشوائب الذائبة بالماء مثل الغازات و الاملاح ولكن اهمهم هو غاز الاوكسجين, لما مكعب الثلج يبدا يتجمد و يتخذ شكل الحاوية مالته راح يبدا يدفع الغازات للاماكن الي راح تتجمد بالاخير لان الثلج بلورة تحاول ترتب جزيئاتها بشكل منتظم فـ بعد ما يصل التجمع للمكان الاخير; الغازات راح تنحبس على شكل فقاعات و هالفقاعات راح تسبب تشتت بالضوء و تخلي المي من شفاف او بلا لون الى ثلج له لون ابيض (لون مو حقيقي).

شلون تحصل على ثلج شفاف؟
قلل الغازات من خلال غليان المي لان ذوبانية الغازات تقل بالحرارة (حط المي على النار و من يغلي طفي النار و خليه يبرد و بعدها فرّغه بقالب الثلج و خليه بالمجمدة).

ليش لما تصب المي على الزيت يحصل فرقعة قوية؟

لازم نعرف ان المي تحت الضغط الجوي الطبيعي, حرارته ما تكون اعلى من 100 سيليزي, واي حرارة او طاقة اضافية مجرد راح تستهلك لتسريع عملية تبخر المي.

اما الزيت فـ درجة غليانه اعلى بكثير من درجة غليان الماء, ولهذا يستعمل للقلي لان ممكن يصل للـ 175 سيليزي من دون ان يغلي!.

فـ لما تضيف المي الي درجة غليانه 100 سيليزي على الزيت الحار الي درجة حرارته تقريبا 175 سيليزي; المي السائل راح يمتص الحرارة من الزيت و بسرعة يتحول الى بخار بشكل شبه انفجاري, فـ هذه السرعة هي سبب تناثر الزيت مع البخار (الفرقعة), كذلك اكو عامل مهم اضافي وهو ان كثافة الزيت 0.9 و المي 1 (الاكثر كثافة ينزل للاسفل و الاقل كثافة يطفو) فـ اثناء صب المي راح ينزل لأسفل الزيت قبل ما يتبخر و بمجرد تحول السائل الى بخار راح يسبب اندفاع قوي من الداخل للبخار ويصير عندك فرقعة و انتشار اكبر للزيت.