چی وەڵێ بەشما وەشی بێ کۆ لوا ؟
ڕۆحما یانەو گەشی بێ کۆ لوا ؟

تا وەرە و بزڵەو هەواری لۆڕیێ
کەی شوانە و بێ‌لەشی بێ کۆ لوا ؟

ڕوومەتی شیرین و حورمەت باو بێ
کەی زەمانوو ڕوو ڕەشی بێ، کۆ لوا ؟

ڕۆ ویاری ئیسە مەردەن چی وەڵێ
پەی جوانی سەروەشی بێ کۆ لوا ؟

سوور و سپیاو دیمەنێشا پۆشنای
ڕوومەتێ گردٚ مەهوەشی بێ کۆ لوا ؟

ئیسە دڵ مەردەن جە یانەو عاشقی
خەم جە شینوو بێ‌بەشی بێ کۆ لوا ؟

سۆزوو هۆرە و لوورە نا یانەو خەما
سیاچەمانێ پەی کەشی بێ کۆ لوا ؟

ئیسە سەیێدٚ شێعرە پەی مەردەی چڕۆ
زیننە بێ غەل و غەشی بێ کۆ لوا ؟

#سه‌یێد_ڕه‌حمان_مه‌حموودی

‍ ئی وڵاتە چوار وەرزش هەر خەزانەن، هەر خەزان
خاس زانوو خالقیچش چا سەرەیچه‌و ناڕەزان

چێ وەهار و هامنیچ مانگێوە پاییزی مەشا
هامنیچەن چی چلێنە ئای سەردٚاینە تەزان

چەوپەڕوو شاری مەوینم گردەڕۆی نەورۆزشەن
چێگە نەورۆز سەرچلێ شادٚی خەمێمانە و عەزان

لێ‌بەرێما تا سەروو بانی ولی بێ ئا کەسەیچ
ئەی دەسش مڕیۆ وڵاتش دا بە دەستوو ناحەزان

چن بە ڕیش‌چەرما گنێ بانێ بە قێخاو شارەکەیم
ئیسە قێخان چی وڵاتە ئەحمەق و گێج و نەزان

ئننە بێ‌تامیچ بیەن هەمسا بەرەیچم، ناعێلاج
پەی سەواخەیری دەسیچم نا دەسانوو بێ‌مەزان

پەی من و تۆ چێ بەڵا بەی یا قەزا تەقدیرەن و
شێخ فتواش گردٚ بە نەفعەو وێشەن و چن بێ قەزان

تۆ بە ئی شێعرێتە سەیێدٚ شەربەتوو تاڵی مەدٚەی
چێگە حەق تاڵەن مواناشه‌و مواچا ناسزان

#سه‌یێد_ڕه‌حمان_مه‌حموودی


─┅─═ঊঈ👑 ঊঈ═─┅─
#کانال_تلگرامی_چشمیدر👇
🆔 @chashmidar1