TVB咪神張秀文閃嫁金融才俊晒婚照
前年情人節獲金牌媒人Bob點醒改變一生
嘮動新聞👉 https://youtu.be/hslkSsqxRF4

「YouTube唔會改變你一生，你今晚肯出嚟就會改變你一生！」就係林盛斌（Bob）呢句說話，令「TVB咪神」張秀文（Sammi）封盤，閃嫁拍拖年幾嘅金融才俊王大權（Billy）。佢哋仲已經影咗Pre-Wedding，張秀文今日再喺ig po婚照，仲多謝撮合佢哋嘅「金牌媒人」Bob。

現年34歲嘅張秀文2010年港姐亞軍出身，之前同Bob合作拍綜藝節目《你估我唔到》後成為好友，Bob更為Sammi做媒人，介紹佢認識「筍盤」Billy。兩人嘅戀情上月先被傳媒踢爆，噚日（16日）Sammi接受傳媒訪問時就大方承認已答應男友求婚，係被未婚夫誠意打動，但否認係雙喜臨門。佢哋仲原定計劃到外地旅行結婚，但因為疫情關係，婚禮會暫延至出年舉行。

Sammi今日就喺ig貼出同未婚夫嘅婚照，兩人置身草叢中，Sammi着上低胸婚紗兼露出長腿，打扮十分性感；Billy就攬住女友纖腰，場面浪漫。Sammi仲透露佢同未婚夫嘅相識經過，「2020年的2月14日，還記得我穿着睡衣窩在床上，拿着手機在看YouTube，差不多晚上9點的時候，突然阿Bob發訊息來問我在做甚麼，沒甚麼特別的話就出來參加他的朋友聚會，而這班朋友全部都係靈糧堂的同學仔和家長，另加一位男士，專誠想介紹給我認識。當時我正在看綜藝節目，看到一半有點緊張，時間又有點夜，又無化妝無梳頭，我都真係非常誠實地回覆阿Bob：『我唔想出嚟。』金牌媒人回了我一句：『睇YouTube唔會改變你一生，你今晚肯出嚟就會改變你一生！』結果，在一班小朋友唱著靈糧堂校歌的歌聲下，我遇見了我的未來老公，我餘生的另一半，謝謝你的出現，謝謝你的愛。特別鳴謝金牌媒人林盛斌先生。」

唔少藝人包括陳自瑤、方力申、陸浩明等都留言恭喜，Bob就話「哈哈！」、戴祖儀則祝福Sammi「未來繼續開心幸福快樂」。

選美出身嘅Sammi曾主持《3日2夜》、《學是學非》等，早年憑34D魔鬼身材而備受注目，成為「宅男女神」。之後每次都會不時「派福利」，十分識做。

#channelchk #張秀文 #Sammi #TVB咪神 #宅男女神 #林盛斌 #Bob #金牌媒人 #王大權 #閃婚 #封盤