乘客誤將$1000當$100
的士司機拒認當場吞金牛落肚

今時今日，揸的士成為最搵命搏行業之一，除咗昨日（12日）一名的士司機在西環慘遭乘客割頸殺死外，近日連打兩個8號風球，唔少的士司機為搵食，冒死喺無保險情況下開工，但打風下「加價」又引發全城熱議。Channel絲今日再收到報料，一名的士司機為咗車資問題，更疑當場「吞銀紙」以圖毀滅證據，真係搵命搏！

事件喺的士業界瘋傳，暫時我哋取得兩條乘客拍低嘅片段，如果有網民知道更多，歡迎click入我哋「出氣WhatsApp（ https://wa.me/85263544742 ）」，同我哋出師氣報料！

講返件事，據的士業界透露，事件發生喺早幾晚，當時一名男乘客登上一部新界的士，然後要求司機出發去一個目的地，再由目的地沿路折返出發點，其間，乘客曾預付100元車資予司機，但其後乘客驚覺，自己預付嘅其實係一張1000元紙幣，於是向司機要求找錢。

不過，司機拒絕承認乘客誤將1000元當100元，仲話「你講乜都得啦」，乘客無奈下報警，但等候警察調查期間，司機竟然當場吞咗張「金牛」，於是乘客就拍低片段。

片段中，其實係睇唔到司機將銀紙放入口，但確實係見到司機「口郁郁」，根據片段對話，乘客隔住玻璃稱：「係咁𡁻，係咁𡁻！𡁻完未呀你，阿Sir睇到啦，係咁𡁻呀！吞咗喇，吞埋喇！」

而司機其後一度下車反駁：「我真係未驚過！」他更反指對方「販毒」，但對方立即否認，其後司機更有所動作，喺褲頭掏出一袋啡色的物體，指着說：「喺入面呀，你嚟攞吖！」Channel絲相信，司機身上疑似開了造口，令排泄物排入「造口袋」中，再進行處理。

想知事件之後嘅發展？我哋已透過的士業界聯絡兩位當事人，如果有知情者有更多料，歡迎聯絡Channel絲跟進。

#Channelchk #的士司機 #吞銀紙 #1000蚊 #出氣師 #車資