造星IV女團1.12出道！經理人誓努力打低MIRROR
花姐證Win Win八婆 祖認睇漏Ash 佛囑高層勿糟蹋

ViuTV《全民造星IV》決賽在聖誕夜直播，由李嘉欣等5名評判和網民各佔一半評分，負責篩女人參賽者，從20強選出冠亞季軍直入女團。ViuTV公佈，女團將於明年1月12日出道，屆時才知道其餘人選。經理人戴穎（阿Wing）在賽後的《造星彩蛋》，被問到對女團有何寄語或祝福時，笑言將與女團「一齊努力，打低MIRROR！Yeah！」花姐聞言即質疑：「點解要打低MIRROR啫？我哋唔可以一齊行嘅咩？」阿Wing即時補飛：「咪就係一齊進步囉～」

20強決賽選手之一的穎蕎，最初在節目豪言，要與其他參賽者一起「剝花姐棚牙」。花姐在賽後承認，一眾選手的表現確實「剝我棚牙」︰「我啱啱都有同啲評判講，我諗住呢個比賽裏面有一班八婆嘅，但佢哋唔係八婆囉，除咗Win Win之外！哈哈哈哈！佢哋係一班好熱血啦、好有夢想嘅女仔啦。咁MIRROR、ERROR要小心啲嘞。」但她補充，Win Win和So Ching等很多選手的決賽表演都很好，亦比她想像中好。

2位導師被問到有否「睇漏眼」或滄海遺珠未能晉級時，「阿佛」許廷鏗認為2人眼光不錯，沒有睇漏眼，該復活的已被復活，部份復活者更晉身20強。但「阿祖」梁祖堯則承認睇漏Ash：「我真係好想佢可以喺一個好大嘅舞台上，表演到畀大家睇，不過，總有咁嘅機會嘅我覺得。」阿佛更自爆曾越級叮囑ViuTV高層，勿糟蹋她們：「頭先我都同金生（製作部副總裁金廣誠）講，你好好地對啲女呀，有啲咩搞唔掂，我而家置咗公司，我嚟挖角架我同你講，因為我真係好鍾意佢哋！」

#ViuTV #造星 #全民造星 #全民造星IV #造星IV #女團 #MIRROR #花姐 #戴穎 #黃慧君 #Ash #鍾卓穎 #梁祖堯 #WinWin #楊安妮 #許廷鏗 #channelchk