TVB「呃tea食」娛樂記者訪問馬時亨叫錯名
稱呼林子祥「er～er～特別嘉實」 普通話問題更嚇親人

落選港姐、而家係TVB娛樂新聞台記者嘅黃婉恩早前被爆搲食免費tea set，走數唔出post後，噚日訪問馬時亨同林子祥嗰陣，竟然將馬時亨講咗做「馬—是—行」，話晒都係前高官，又經常接受傳媒訪問，而且個節目名已叫做《馬時亨名人堂》，但都可以講錯；想稱呼林子祥時又「er～er～er～」阿咗好耐都講唔出名，只er出「特別嘉賓」，真係隔住個mon都覺得尷尬！

馬時亨聽到黃婉恩講錯佢名時都忍唔住笑，話「講錯名呀！你連名都講錯」、「你一定要Cut咗呢個」，但黃婉恩最後都講唔到個名，只係「馬生你好」就算，繼續訪問。

黃婉恩知道林子祥同馬時亨打波認識之後，似乎對佢哋嘅「故事」都好有興趣，「會唔會再分享打波嘅故事呢？」，又問「除咗分享唱歌經驗，會唔會分享兩個嘅故事呢？」、「做訪問準備前會唔會諗返以前嘅事呢？」

不過之後普通話訪問仲「有趣」，黃婉恩一嚟即問「為甚麼今天在這裏呢？」林子祥聽到都「打個突」，然後就笑住回應話「馬先生邀請我跟他對話......」。之後黃又將「訪問」講成「訪蚊」，問「有沒有準備......」就講成「有冇準備」，想講「林生是有演唱會」就真係照講「林生」，然後「演唱會」就變咗「煙嗆煨」。雖然訪問出街就剪走晒呢啲片段，但話晒訪問會做Live，而條片可以繼續俾觀眾loop，都係做好準備好啲。

#channelchk #馬時亨 #林子祥 #黃婉恩 #TVB