脆香雞翼將停供應震驚連登仔
247分店周一早上仍有售 被質疑「marketing嚟」

自從連鎖快餐店麥當勞前日（11日）宣佈脆香雞翼因為船期未嚟到香港，存貨呢幾日會陸續賣晒之後，唔少連登仔同網民都崩潰，擔心好快冇得食。所以麥記就提供咗脆香雞翼供應表畀大家參考，等大家可以睇到邊間分店仲有得賣。而截至今朝10點半，全港247間分店都顯示仍然有售，想食脆香雞翼嘅朋友暫時仲有機會食到呀。

麥當勞前日喺facebook發帖解釋，因為全球供應鏈受到不穩定嘅國際航運影響，脆香雞翼要遲啲先可以到香港，佢嘅存貨都會陸續賣晒。但同時叫大家放心，因為脆香雞翼再返貨之前，麥炸雞會加入超值選，滿足大家食雞嘅慾望；就算單買一件雞都有優惠。

雖然有連登仔同網民對就快無脆香雞翼食表示「震驚」，「世界末日了」、「脆香雞翼係無可代替架」、「無脆香雞翼可以唔食老麥了」，但亦有人認為係麥記嘅宣傳手法，「marketing嚟嘅啫，想谷麥炸雞，個excel咁X多間都有都叫暫停供應」。

#channelchk #脆香雞翼 #麥炸雞 #麥當勞 #老麥 #麥記 #連登 #航運