燒賣關注組成功爭取？
大快活推燒賣主菜早餐 陳記出品…

Channel絲都幾鍾意食燒賣，但有關燒賣嘅知識水平偏低，好彩有 #香港燒賣關注組 ，大大擴闊Channel絲對品味燒賣嘅高度、深度，同濕度。今日燒賣關注組成員同網民不約而同捕捉到大快活「燒賣早餐」餐牌，主菜分別係牛肉燒賣同魚肉燒賣，反而唔見香菇豬肉燒賣，可能要幸運分店先有。

其實大快活之前已經有燒賣食，但只屬配菜，兩蚊加兩粒、或者唔要蘿蔔糕可轉燒賣可有可無嗰種。而家燒賣自己做boss，燒賣關注組喺po寫道：「香港飲食口味相信可以由快餐店直接反映出，觀察所得！進展如下：由無>蘿蔔糕可轉燒賣>燒賣主打menu」。

睇番餐牌，牛肉燒賣+粥+菜肉包+蘿蔔糕配飲品盛惠$36；唔要粥就$26。

魚肉燒賣+雞扒+炒滑蛋同多士配飲品，都係$36；但魚肉燒賣+菜肉包+蘿蔔糕配飲品就要$27，比牛肉燒賣貴1蚊。

無論牛肉定魚肉，燒賣早餐都係得3粒，比之前當做配菜嗰陣只係多一粒。如果你好鍾意食燒賣，可以俾多$4.5，有多3粒。

想平啲嘅，可揀牛肉燒賣+撈米粉配飲品，$30；魚肉燒賣就定咗要食撈米粉要加菜肉包，$32。

Recall大家嘅記憶，今年4月，關注組出po話：「做咗咁多年人，我都未見過大快活呢類快餐店下午茶有燒賣」。香菇燒賣+咖哩魚蛋+碗仔翅配飲品$31，得2粒燒賣咋。當時組員仲講笑咁話「遲啲結婚擺酒都有一味係燒賣」。估唔到半年之後，燒賣可以「當家作主」。難怪有組員留言：「我所知呢間公司長期有人係social media mon post。」

睇番4月個po，組員普遍對香菇燒賣食評都係麻麻，有人話「蒸到爛晒」、「似公仔點心」。有人就考古，話早餐配燒賣之前都有，不過係牛肉燒賣，可以加錢食燒賣，2蚊粒。

咁大家對今次推牛肉同魚肉燒賣點睇呢？成員表示「圓底嘅感覺會唔好食又粉」、「圓底，不了啦」、「佢入啲燒賣成本分分鐘平過塊火腿」、「$27食呢啲，我去小食店買燒賣好過。」

有人留言指「快餐店d燒賣同食嚿膠無分別」，關注組admin就回覆：「反映香港人喜愛食膠。」至於燒賣「產地」，據成員調查後發現係陳記。如果自己買，5包陳記$88，每粒約$0.5，平過大快活$4.5得3粒。嗰啲係租金人工嚟嘅…

至於陳記好唔好食，歡迎留言分享……

#大快活 #早餐 #燒賣關注組 #魚肉燒賣 #牛肉燒賣 #香菇豬肉燒賣 #陳記燒賣 #channelchk