黎明難忍舊版《夏日傾情》 震音震過貓王 重新錄製
拋金句：做人畢竟要與時並進 必須面對已經過時

「I Love You～ 你會否聽見嗎？......」想當年，黎明嘅《夏日傾情》冧到唔少fans，呢首經典金曲到近年開演唱會都幾乎必唱，但黎明話前排重聽返當年唱嘅《夏》時，覺得「真係震過貓王，不停震，句句尾個隻字都震，我意思係啲震音～～」，所以佢決定重新錄製首歌，今日就可以喺音樂平台聽喇！

黎明出po公佈嘅時候都繼續發揮「金句王」本色，話聽返當年嘅《夏日傾情》之後，「即刻醒悟，什麼叫做：力拔山兮氣蓋世」，連自己都無法忍受，辛苦咗一班鍾意呢首歌嘅朋友嘅支持，「真係要講句，對不起我愛你」。

所以，為咗大家唔使再聽到「震音老土版」嘅《夏》，佢經過重重困難去申請版權，最終都如願重新錄製，「做人畢竟要與時並進，當年情可以存在，但必須面對已經過時」。不過佢覺得齋錄一首好無謂，所以亦重錄《越夜越有機》，而且刪走原版有嘅槍聲，錄製「和平氣氛版本」；至於另一首就係《戀愛者聯盟》。

黎明最後仲用咗MC $oho & KidNey大熱歌曲《係咁先啦》嘅歌詞做ending，話「講完啦，係咁先，下次再講啦。」然後繼續拋金句：「鍾意定唔鍾意，對得住自己鍾意，又冇對唔住人」。

#channelchk #黎明 #夏日傾情 #金句 #越夜越有機