容祖兒出道22年親自執導新歌MV
剖白感情世界：曾好努力惟最後要無奈放低

歌手好多時都會憑歌寄意，容祖兒（Joey）都唔例外，趁住今日9.29出道22周年推出新作《不配》（ https://bit.ly/2Y3VMj8 ）之餘，更首次親自操刀執導MV，希望將首歌想表達一段感情嘅遺憾美，完整呈現觀眾眼前，令樂迷更加明白佢唱乜嘢，「嗰種好努力但最後都無奈要放低，嗰個感情我都覺得好動人。」Joey處女作長達十分鐘嘅MV拍攝花絮亦將於今晚9時29分推出。

新歌《不配》紀錄咗Joey成長的真實情感，詮釋一段感情由淺到深再分道揚鑣，嗰種無奈至釋懷嘅感受。首次擔任MV導演嘅Joey就安排男女主角以現代舞方式去表達，佢話拍攝過程中有唔少難題，而且對鏡頭擺位同攞唔同鏡頭去捕捉唔同角度，都有啲難度，「以前被拍，但今次係發出指令，話畀camera man、舞者知道呢個動作同歌詞嘅關係、點樣呈現出嚟。」

為咗將故事意境提升到更高層次，MV又採用LED環幕拍攝，建造出一個寒冷凜冽極地世界，Joey直言覺得氣氛好震撼，感覺亦好配合新歌，「大家都曾經好努力去令到呢一份感情行落去，但就係因為大家努力過，所以更加唔捨得。」

談到個人經歷，Joey認為「愛情更多嘅唔係同唔同到對方行到去最後，其實係令對方成長，更加清楚自己係一個需要啲乜嘢嘅人。雖然唔能夠一齊，但係可以互相祝福。」對於已入行22年，Joey亦覺得堅持22年唔容易，亦多謝身邊每一個去幫佢嘅人、歌迷同屋企人，希望將來可以不斷進步，繼續做好自己。

#channelchk #容祖兒 #Joey 不配 #MV #處女作 #導演 #MV導演 #英皇