環境局黃錦星IG驚現青天白日旗賀國慶日
局方：懷疑有黑客

環境局局長黃錦星個IG，今早出現咗一支好奇怪嘅旗。簡稱出旗。

支旗，係「青天白日滿地紅旗」emoji，而最奇怪嘅係，個po係講「國慶日，長假期」。配圖係晨光曦微。

咪住先局長，究竟你係揀錯旗，定係提早咗慶祝先？
環境局局長新聞秘書回覆傳媒查詢時就話，「懷疑有黑客」，又指局長IG已即時更改密碼。

明星聲稱被黑客入侵嘅例子屢見不鮮，之前傅穎曾表示IG被hack，用來發放淫褻及暴力圖片，其後無綫藝人陳自瑤亦指IG遭黑客入侵，更遭勒索要錢「贖番個戶口」。

至於黃錦星呢個case，就有少少奇怪。因為張日出圖、caption同hashtag都喺番度，冇咗嘅只係「青天白日滿地紅旗」emoji。如果真係有黑客，咁個黑客做嘅手腳，就只係咁手多加咗支旗仔emoji？

咁當然，出「旗」可以制勝亦可以致命，「國慶日」舉錯旗，局長都可以gg。

有網民馬上cap圖，留言表示：「你gg了」、「早咗九日喎局長」、「局長快啲走」、「黃錦星個頭好ｘ，快啲剪頭髮換衫買機票」、「明就明，唔明就家明啦！」、「經營你ig嗰嗰，希望唔會俾人炒啦」…

要顯示愛國心，可以學人辦楊明。佢一身中國紅，由帽、口罩到衫（唔知底褲係咪），都係同一個tone嘅中國紅，成封大利是咁，仲做埋Mirror最鍾意做嘅心心手勢，擺上IG話寫道：「國慶日祝大家健康快樂」#祖國生日快樂。Emoji唔出旗，用表情符號。著到咁出po，風格強烈，message清晰，黑客（如有）要落手（如果係真）都冇咁易。

可惜吖，楊明 upload「國慶日」上微博嘅po，係用Samsung Z Flip 5G，唔係華為。效果同用iPHONE嗌激動歡迎孟晚舟「回家了」嘅歐陽震華差唔多，都係唔夠愛國。

順帶一提，早於2019年，青天白日旗emoji已從香港、澳門最新iPhone版本「被消失」 了...

p.s.見到楊明個心心手勢，忽然諗起Stanley邱士縉@Mirror嗰句金句：「卅幾歲要做呢啲嘢（俾心），自己都唔好意思啦！」楊明都四張啦…

#黃錦星 #青天白日滿地紅 #國慶日 #楊明 #黑客 #環境局 #channelchk