亞視男星閃卡最後一彈 年輕版尹天照被似試當真Locker
網民跪求出女神版

近期熱爆嘅MIRROR鏡仔卡已經換到尾聲，如果大家仲有鋪儲卡癮，可以考慮下呢套「ATV男星限量版閃卡」。無錯！又係亞視，真係要唱首「亞視會～永遠都存在～」呀！佢哋最近都有樣學樣，推出一套12款男神閃卡。今日最後一彈就有陳啟泰、尹天照、盧海鵬同劉錫賢，但有網民講笑話劉錫賢應該係ERROR；另有人就覺得尹天照張卡太早期，有啲似YouTube頻道試當真嘅Locker添！

亞視為咗谷年費會籍，喺facebook專頁介紹呢套男神閃卡，一共有12張，每張都加件炸雞，其實唔睇樣的話，齋睇設計同鏡仔卡都有8、9成似，不過男神卡唔少藝人都已離巢。噚日第一彈率先登場包括4位插住炸雞袋巾嘅秦沛、潘志文、劉永同「LOKLAM」羅樂林；之後又有揸炸雞當槍嘅「煎pan」陳展鵬、林韋辰、鄭則仕同袁文傑。今日下畫推出最後一彈就係陳啟泰、尹天照、盧海鵬同劉錫賢，但就冇網民想要嘅「第一代教主」張立基。

亞視男神閃卡一出都有唔少網民留言大讚，仲話「我想儲呢set！」，但似乎網民都嫌未夠喉，想繼續出第四彈，「有鵬哥點解冇大姐明㗎」、「杜汶澤點可能無呀」、「會唔會出中華英雄版嘅何家勁」，仲有人提議將當年前意大利球員岩布仙尼唱「Happy birthday to me」一幕整成閃卡；又有網民提議出女神版，「有男神冇女神，跪求萬綺雯」，仲有教煮餸嘅方太同「亞視一姐」薛影儀等。

#channelchk #亞視 #ATV #男神閃卡 #尹天照 #陳啟泰 #盧海鵬 #劉錫賢 #MIRROR #鏡仔卡