幼稚園小朋友整碌柚燈籠 家長的戰爭！

小朋友做功課，特別係勞作小手工，從來都係家長之間的戰爭。3歲小朋友整到成個銀河系出嚟？唔巧玩啦。呢啲習作仔，咪又係幼稚園畢業N年嘅家長操刀。其實唔止香港係咁，台灣都係。最新題目係——碌柚燈籠。

台灣「爆廢公社」公開版有網民分享讀緊幼稚園嘅姨甥女碌柚燈籠習作——名為親子創作，家長小朋友一齊整。整完之後拎番學校，由小朋友評分。樓主hashtag「嚇死一堆小朋友」，點解？睇圖。係異形蛋呀！裡面仲會著燈㗎！

負責操刀嘅媽媽亦有開po分訪製作心得，話囡囡當然冇睇過《異形》，idea係媽咪諗嘅。你問小朋友唔驚異形咩滑劣劣咁核凸，阿媽就醒喇，佢話異形蛋係「很可愛的蛋」、「會生出一隻小蟲蟲唷」；天真無邪嘅小朋友就話：「好！我要做可愛的小蟲蟲！」

都啱嘅，異形都係蟲蟲嚟㗎，小朋友仲幫手喺碌柚裡面舖海綿同黐「蟲蟲」喺面，兩個鐘頭完成。碌柚當然唔好嘥，小朋友食得好滋味。

呢位創作系家長做勞作得心應手，但唔係人人都咁勁。有家長諗咗兩日兩夜都諗唔到眼前個碌柚可以點搞，諗到個碌柚開始縮水咁滯，惟有喺group發出求救訊號徵集idea。有機會battle，網民馬上使出真功夫。真係眼界大開！

有媽媽慨嘆：「以前看新聞總報萬聖節小朋友被打扮的很誇張，現在自己當媽了才知道，幼稚園給的創意勞作或是什麼活動，根本就是家長跟家長之間的戰爭啊～」、「做完也天亮了！」有網民回應：「真的是搞死家長而已⋯⋯還有就是家長pk大賽」。亦有家長「曬幸福」：「我剩下一年了！」

參考番一眾家長幫幼稚園小朋友設計嘅碌柚燈籠，都有人撞橋整龍貓，雕功精細；亦有家長選擇用畫筆代替雕挖。有媽媽整咗個熊本熊（頭）燈籠，髹上顏色之後對手黑晒，仲建議大家整碌柚燈籠時千祈唔好切皮，要原隻上，因為擺設期間果皮同果肉切開之後容易發霉，會吸引好多真蟲蟲㗎！

仲有一樣好緊要嘅資訊，年經嚟嘅，就係大家千祈千祈，千祈唔好幫貓貓戴碌柚皮「帽子」，一來貓貓唔鍾意嗰陣味，二來碌柚嘅汁液有機會令喵星人皮膚過敏紅腫，記住唔好咁玩呀。廣傳pls。

#碌柚燈籠 #中秋節 #家長勞作 #親子 #channelchk

＝＝＝＝＝＝＝＝＝＝＝
🔥出氣師登場！「谷鬼氣、搵我哋」🔥
如果大家有咩疑難「谷鬼氣」，不妨搵我哋「出氣師」，等我哋幫手出返口氣！
出氣WhatsApp： https://wa.me/85263544742