前賽車手評「Benz衝斑馬線」語出驚人
撻朵「交通安全顧問」上《東張西望》：
停車嗰位都有責任

無綫 TVB 節目《東張西望》嘅「脊醫風波」未停，又有新嘢都惹嚟網民質疑啦。相信大家對Channel C都報導過嘅「Benz衝斑馬線」車cam片記憶猶新，而《東張》喺嗰集都搵嚟一位交通安全顧問剖析司機嘅對與錯，但呢位顧問語出驚人，佢竟然話衝線嘅私家車雖然唔啱，但停車嗰位司機都有責任咁話喎⋯⋯

喺條車cam片入面，片主停低打死火燈畀等過斑馬線嘅女士同小朋友過馬路，點知呢個時候一架Benz就突然超前駛過，嚇到佢哋即刻後退。Benz嘅30歲司機被捕之後，佢段車Cam片都開始喺網上流傳，即使佢想自辯，但仍然畀網民鬧到佢飛天，「唔識睇前車打死火燈？」、「見到有人都唔識停車㗎？」。網上鬧聲一片，但《東張》訪問嘅交通安全顧問呂米高，就別有一番見解，話停車嘅司機「係有少少責任」，因為一來嗰位女士同小朋友未「正式」行出斑馬線，二來司機見到佢哋未行，就唔應該停低⋯⋯呂米高仲話，「喺香港啲車跟得好貼、好迫、好快」，如果司機當時唔停，「其實係完全無危險、無犯到法」，而後面嘅車亦都唔會因為咁樣而爭啲撞到佢或者發嬲。

可能因為呂米高係車手出身，睇法同常人唔同，所以有唔少觀眾都聽到O晒嘴。事件經FB專頁「 思思 TVB 的二三事」出Post後，更加多網民對呂嘅講法表示不解，仲叫呂米高返去再讀一次《道路使用者守則》，因為第五章寫到明「駕駛人士駛近「斑馬線」時，須留意是否有等候橫過馬路的行人（特別是兒童、長者及殘疾人士），並應減速，預備在「讓路」線前停下來，好讓他們橫過馬路。」

見到呂米高咁樣講，真係唔難理解部份司機嘅心態，所以為咗安全，喺香港都係人讓車算把啦。

#channelchk #Benz #東張西望 #TVB #無綫 #呂米高 #斑馬線

秀茂坪Tesla險撞斑馬線過路翁 激到阿伯揮拐杖

個幾月前，有段車Cam片瘋傳，係位Benz司機爭啲撞倒對過斑馬線嘅母女，結果警方以涉嫌「危險駕駛」拉咗位司機。當時網上好多人都鬧Benz司機唔識讓人，而TVB《東張西望》仲搵前賽車手呂米高分析事件，話「唔一定要讓斑馬線」。事隔無耐，類似嘅事又重演。今日（10日）下午，一位老翁喺秀茂坪過緊斑馬線嘅時候，爭啲就畀一架Tesla電動車衝埋嚟撞低。

根據網絡瘋傳嘅車Cam片，好彩呢位伯伯過馬路嗰陣有Keep住睇車，見到Tesla衝埋嚟嘅時候，都無諗住做賽跑冠軍，如果唔係恐怕已經被Tesla撞低。見到架車爭啲撞到佢仲直行直過，伯伯嬲到拎起拐杖想打架車，可惜架車🛻已經一枝箭咁揸走咗。人類總要重複相同嘅錯誤，唔知呢位Tesla司機知道自己紅爆各大車Cam群組未呢？

#channelchk #斑馬線 #車禍 #Tesla #電動車 #長者 #車Cam #秀茂坪 #拐杖 #交通意外 #呂米高 #東張西望 #TVB #賽車 #危險駕駛 #人類總要重複同樣的錯誤

屯門綿羊仔直衝斑馬線 拒收油停車
車cam直擊 險撞安定邨過路翁嫗

有車壇教父之稱的著名賽車手呂米高，早前以「交通安全顧問」身份受訪TVB節目《東張西望》，向廣大市民稱即使有人等候橫過斑馬線，但私家車照衝不停亦「完全冇危險，冇犯到法」。不知是否有人跟隨呂的建議，繼日前一輛Tesla電動車在秀茂坪直衝斑馬線，險撞拐杖翁，涉嫌危險駕駛被捕後，近日亦有一輛綿羊仔電單車在屯門直衝斑馬線，險撞一對年邁夫婦！

昨晚（13日）網傳一段車cam片，顯示一對年長夫婦橫過屯門安定邨商場對開斑馬線時，疑遭電單車男司機無視。綿羊仔在老夫婦面前直接衝過斑馬線，並無收油。幸好翁嫗過路時一直留意路況，才不被撞傷。不過老伯不滿電單車手的駕駛態度，向其方向伸手拍打，但未有打中，更懷疑因此步履不穩，要由妻子扶助。

#車cam #屯門 #安定邨 #斑馬線 #呂米高 #TVB #東張西望 #綿羊仔 #電單車 #車禍 #交通意外 #channelchk #危險駕駛