重溫《造星IV》第十集
Michelle唱歌劇場被批尷尬 不敵好友余潔滢

《全民造星IV》話咁快就嚟到第三個禮拜，喺夜晚九點半前，等Channel絲幫大家重溫吓上周五（12日）播出嘅第十集啦！

首先出場嘅分別係係聽個名都知有自信嘅Ace，同身形高挑嘅Tania。Ace唱歌、跳舞都有唔錯嘅根底，但星味同外形都爭少少；而Tania雖然喺面試時被批評「五音不全」，但全靠身形夠靚、外貌清秀，成功通過兩輪面試。到正式表演，跳唱《喘息空間》嘅Ace，不論係表演同裝扮都無乜特別亮點；輪到表演跳舞嘅Tania，舞藝唔錯、無特別甩Beat出錯，連埋佢本身嘅外形，評判已經收貨。雖然Tania講嘢多懶音又似乎無乜自信，但最尾仍然以兩盞紅燈勝出，而人緣甚好嘅Ace就跌入復活區。

接住落嚟嘅係Kay，身為陳輝陽女聲合唱團成員嘅佢，連梁祖堯都係佢Fans。雖然Kay來頭唔細，但對手Ana同樣都唔睇得小㗎～而家從事健力運動員嘅Ana，其實曾經患上過憂鬱症同厭食症，佢振作同康復嘅勵志經歷，都幾打動到Channel絲。表演空姐Theme歌舞劇嘅Kay，除咗個樣夠似空姐，唱歌同舞都無話特別吸引同突破，連導師同評判都有啲失望。而身形健美嘅Ana，唱《Take Me to Church》時一開聲就聽到佢聲底渾厚，同之前出場嘅Ika一樣咁唱得，連鄭融都忍唔住大讚「Very Nice」。最後Ana以兩盞紅燈擊敗Kay，率先晉級60強，並進入梁祖堯嘅組別。

全文閱讀：
https://www.facebook.com/101870318844226/posts/146360504395207/?d=n

#channelchk #ViuTv #余潔滢 #Michelle #全民造星IV #Ace #Tania #Kay #Ana

造星IV｜全城鬧爆梁祖堯foul走Sica 網民：親手宰殺自己組員

畀返主席Sica大家呀！昨日（7日）ViuTV《造星IV》真係睇到旁白師講晒粗口，死亡名單有Liu哥廖雪蕎、Ana羅安娜、阿杰周芷慧、Zoe余潔滢和Sica何洛瑤，點揀都揀唔到Sica啦！梁祖堯你識不識㗎！

梁祖堯先後foul走咗Hannah陳玉幸、咖哩黃雅慧、Liu哥、Ana、Mic周卓盈，每foul一個人都令全城震怒，叻！foul晒大家鍾意嘅，真係好難唔覺得無偏心、無私心！真係搞到大家都無晒心機追，又一次出現罷睇《造星IV》浪潮，又再一次全城怒插梁祖堯！

網民鬧爆：「foul哂啲有實力有樣嘅人……比咩賽啫？你直接畀個冠軍方方啦好唔好？嘥鳩我時間！」又有網民話梁祖堯「一男子簡（揀），勁過法官，幾十慢人睇都唔會影響到賽果，因為佢一個人代表」。

阿祖應該一早就估到今次foul人又會俾人圍插，所以一早喺前晚就出千字文解話打定底，拉埋阿佛許廷鏗、花姐同阿Wing落水，話所有foul人都係四個人一齊決定，提早反駁網民話係佢「一男子簡（揀）」。阿祖仲話大家睇到嘅只係製作組剪輯咗嘅表面，剪到被foul嘅人好唔抵先有綜藝效果，而佢比觀眾睇得更全面，決定foul邊個嗰陣，係考慮咗好多觀眾睇唔到嘅因素。

有心水清嘅網民就突破盲腸，「睇好勁嘅A組屌打B組係無意義，觀眾想睇弱勢反cup」。的確，由一開始就知A、B組實力懸殊，阿祖嘅組員較弱，被foul一啲都唔出奇，但問題係阿祖作為導師，係咪應該諗辦法提升B組嘅實力呢？

有網民問阿祖點解唔搵人幫手教，阿祖話有搵唱歌老師，仲畀每個人上private class，係製作組無剪出嚟。但係睇返阿佛搵鄧小巧幫手，製作組都有剪出嚟。仲有，B2組表演完之後，佢都自爆喺定位上唔清晰，唔知著重演戲定唱歌好，咁仲點叫組員相信自己呀？

想用戲劇包裝自己嘅組員唔唱得、唔跳得，但結果就係佢哋乜都唔得，完全表現唔到自己，大家嬲成件事係「輸導師」呀！

有網民仲懷疑阿祖「公器私用」，喺造星foul咗Sica，但就用嚟喺自己劇團客串，真正做到佢所講嘅：「呢啲面向會為佢哋帶嚟另外一啲機會，而呢個就係我嘅責任。」難怪網民建議不如直接搞《全民造戲》啦！

#造星IV #梁祖堯 #Sica #何洛瑤 #花姐 #全民造星 #channelchk #ViuTV #Liu哥 #廖雪蕎 #Ana #羅安娜 #阿杰 #周芷慧 #余潔滢 #嘮動新聞