DJ 打風搭的士被收$20附加費批「馬路的屎」
司機同業嘆：揸巴士有勞保，的士有乜嘢？

有一個題目，由噚日朝掛8號波一路拗到而家——嚴格而言係拗咗好多年，無限loop但永遠冇答案。拗緊嘅係：打風時的士司機應否徵收附加費。加入討論戰陣嘅有商台DJ歪歪王遠杰。

佢噚日8號風球下截到的士，司機話加20蚊，開單時仲撕走單上面車牌號碼：「我濫收車資犯法㗎！」歪歪問佢：「你原來知道的？咁樣鞭撻自己都有？」hashtag #的士判官 #的士佬 #馬路的屎 #人性

其實件事仲有少少前文，但唔重要，只係拎嚟做個反差。歪歪話佢一上車，司機話：「廿蚊啦！上車！」歪歪以為「風暴之下體現人間有愛」收20蚊咁平，到落車時至知係附加費20數。歪歪形容對方係「攞指甲鉗打劫」、「我已經好感激」。

網民反應5050，有人話加20蚊算良心價，有人笑歪歪：「第一次八號風球坐的士咩？20蚊你執到啦！」Channel絲聽番朋友講，噚日附加費好多都係50蚊添…也有人吐苦水指：「我以前喺機場做，佢夠膽開我$1,000。我xx條DCx車費（計距離）夠元朗去澳門都得。」

講得最多嘅，係保險問題。好多留言都話，應體諒司機打風嗰陣要「食自己」，因為保險唔包。咁係咪真係唔包呢？據知8號風球掛起首兩個鐘，汽車嘅全保仲係包，第三個鐘開始就得番第三保。

有的士司機喺的士嘅fb專頁熱烈討論，有司機呼籲同行守法，「如果有心服務在8號風球需要返工或有急事要車市民時，請按錶收費，但所有風險請的士佬自行承擔，因為的士佬有得選擇唔開工。」呢個po，似引戰多哟……

有行家就話：「真金白銀租車返嚟㗎，交租邊個可憐佢哋呀？生意額低收佢平啲租金呀？」群情洶湧。

有司機打長文話：「將心比己，八號風球巴士咁大架都準備收工啦，巴士司機起碼都有勞工保險，的士司機有乜嘢？」又指水浸黑點路段屬高危，「就算你肯畀錢，個司機肯唔搏命」，認為政府應該正視問題制定附加費指標，甚至去到最極端係，立法嚴禁的士司機打風落雨收附加費，違者重罰：「我估計一到八號風球啲司機就會全部收工，鬥快返屋企。」

以下開放討論。

#的士 #的士判官 #的士佬 #打風 #人性 #附加費 #8號風 #獅子山 #channelchk