《造星IV》IvySo、暐翹成功令B組翻身
A組唱將Ika被淘汰 「BB組」小矮人勁可愛

《全民造星IV》嚟到最後幾個星期，表演越嚟越高質～喺周四（9日）晚播出嘅一集中，無論係A組嘅《剖白》同小矮人，定B組嘅《勞斯萊斯》，都一樣咁好睇啊～

A組首先由唱家軍Ashi、Ika、VAL、Tengie、安希婷、Ada仔同穎蕎表演由幾首歌改篇組成嘅Medley《剖白》。各位唱得之人係今場表演都無失準，而喺唱到最尾一句嘅時候，安希婷因為諗起上一段婚姻而忍唔住落淚，令評判迪偉問佢點解要喊，場面一度有啲凝重，好彩呢個時候欣宜出場再讚大家唱得好好，出嚟化解尷尬嘅氣氛。

去到B組嘅《勞斯萊斯》，由旁白師最愛嘅Ivy So同暐翹擔任Drama主角，其他成員Alice、Gao、Karen、Winka、方方、馬欣、東東、榛棊就負責喺後面獻唱。雖然一開始排戲時有啲尷尬，但Ivy同暐翹最後嘅演出真係好成功，因為Channel絲爭啲都睇到哭左哭埋右⋯⋯再加埋後面成員嘅歌聲，應該會係今季暫時最正嘅Drama～就連欣宜都真係忍唔住喊咗，好似導演黃修平咁講，「夭心夭肺」呀。希望祖祖可以知道，其實觀眾唔係唔想睇謝劇，係想睇唔尷尬嘅戲劇⋯⋯

最後呢場對決由B組勝出，A組嘅Ika要被淘汰，又多一個Channel絲心水走⋯⋯好傷心，不過好似Ika咁講，最緊要係繼續堅持做想做嘅嘢，大家如果想繼續聽Ika唱歌，可以留意佢IG同佢嘅YouTube Channel！（ shorturl.at/jyJLV ）

而第三輪對決由A組嘅「Passion」出場，成員有Ariel、Candy、Day、Kinki、Yoyo同阿蛋，平均年齡得18.5歲，勁青春⋯⋯Channel絲想唔認老都唔得。可能就係因為經驗唔係太多，佢哋係構思演出嘅時候一度好迷失，好彩有同屬A組嘅Marf、超酸等幫手開導，最尾成功帶咗《七個小矮人》上台。呢6隻壞咗嘅小矮人真係好QQQQQ，估計應該電暈咗唔少觀眾，連評判都一致認同勁有活力！各位參賽者嘅進步，比起表演更加令人感動。

#channelchk #全民造星IV #勞斯萊斯 #剖白 #七個小矮人 #IvySo #暐翹