叱吒「我最喜愛的歌曲」MIRROR團歌落榜
903小編疑用錯帳分享：𠝹死咗成隊 專頁急澄清貼文屬失實內容

香港人不嬲都對投票有一種執著，而近期嘅焦點都放咗喺叱吒度。而「叱咤樂壇我最喜愛的歌曲」一獎，可以話係鏡粉VS非鏡粉之爭！

不過今日就發生咗個小插曲，大約12點嘅時候，叱吒Facebook就照樣公佈投票走勢速報。原本MIRROR十二子有兩首團歌同埋六首個人作品進入最後15強，不過經過3日投票，依家7強就淨返全部個人單曲。有見呢個場面，903嘅小編就懷疑用錯帳戶分享個post，仲話「配票失敗，𠝹死咗成隊🤣」。不過呢個分享post就光速被delete！

事後 my903.com商業電台 再出post，嚴正聲明話「就網上流傳關於由本台發布之貼文，實屬失實內容」，仲話已經同「Facebook官方團隊處理所有失實發布」，會繼續密切留意。

網民就喺下面留言，諷刺商台「_咗咪大大方方認囉，唔好學正苦啲衰野得唔得」，又同商台玩邏輯遊戲，話「如果呢個po係事實，咁你del咗嘅po都係事實；除非呢個po係失實，我就信之前個po都失實喇」，而當中都不乏花生友，「鏡粉好惡你都敢得罪真係祝你好運啦」咁話。

#channelchk #叱咤2021 #我最喜愛的歌曲 #mirror #鏡粉

叱咤我最喜愛歌曲最後五強 MIRROR三子入圍

叱咤公佈「我最喜愛的歌曲」五強入圍名單。疑被903小編指「配票失敗，𠝹死咗成隊🤣」嘅MIRROR，最後得返姜濤《Dear My Friend,》、Edan《E先生 連環不幸事件》同Anson Lo嘅《Megahit》入圍，陳卓賢Ian《DWBF》就無緣入五強；其餘入圍仲有張敬軒《俏郎君》及MC張天賦《記憶棉》。

#channelchk #叱咤 #我最喜愛的歌曲 #MIRROR #姜濤 #DearMyFriend #Edan #E先生連環不幸事件 #AnsonLo #Megahit #張敬軒 #俏郎君 #MC張天賦 #記憶棉