暴龍哥徵集婚宴騎呢事件簿
新娘前度衝上台求婚 新郎開席前醉喊：我唔想結婚！

婚，唔係人人都一生只結一次。緣份未到，離離合合是常事。但係大喜日子「被（預告）」離婚，真係會記一世。

暴龍哥首《無賴》，相信大家都曾經喺婚禮聽過，冧呢？但如果你聽到嘅係《好心分手》、《愛在深秋》，你會展示「姨母笑」定係當無事？暴龍哥今日出po邀請大家分享下 #一人一個結婚之匪夷所思 ，仲加一個hashtag #即場拆人情應該已經好小事 。

【新郎系列】
．新郎開席前就已經飲醉咗，四圍喊住同人講「我唔想結婚呀～」

【外父／老爺系列】
．外父準備將個女交俾新郎哥嘅時候，對住新郎哥講：「以後好好對我個囡，之前嗰啲我就當你逢場作戲，你自己做過咩就好自為知啦⋯⋯」
．證婚簽紙，新郞老竇拒簽，走咗

【外母篇／奶奶系列】
．去「飛天馬車」嗰間酒樓，熄燈起音樂，以為一對新人坐係上面，點知係外母同奶奶，兩老好似香港小姐咁揮手同散花，帶起全場氣氛。
．見過女家多咗人嚟話要加枱，男方話唔加，跟住個外母拉成班親戚走，新娘追到去門口坐喺度喊。

【前度系列】
．見過新娘前度男朋友衝上台求婚，當時條友喊晒口，揸住紮花，而同一時間一對新人宣讀緊誓詞， 個律師擘大個口，一班兄弟竟然係拉一對新人，而唔係拉條仔走…

【司儀系列】
．「我哋睇番一對新人嘅生前片段！」
．送禮物俾四大長老：「不如請岳父錫啖奶奶影張相丫！」（貴圈真亂）
．做慣左Annual Dinner ，知名女主持喺個婚禮尾聲大叫：「我哋出年見！」個知名男司儀幫佢兜：「好，擺滿月酒見！」

【新娘系列】
．我結婚時，新郎遲到，伴郎甩底，負責錄影嘅朋友瞓過籠，去到教堂冇帶機，然後件婚紗離奇地燒爛咗，新郎當日在我補妝時先佈置花車，我補完妝要當街當巷企到佢佈置完畢…好多人覺得我捱得過呢個婚禮都真係奇蹟。我記得結婚間church都好旺，都係因為有個新娘悔婚先退到個期…可能嗰日真係不宜結婚。

【意外篇】
．試過有friend結婚，證完婚交換完戒指諗住抛花球，點知新娘一抛抛埋隻戒指出去，搞到要所有賓客一齊搵，可惜最後都係搵唔到。
．晚宴期間，有唔知係男家或女家嘅朋友定屋企人（女）報警，話唔知係男家定係女家嘅朋友定屋企人（男）非禮佢，搞到宴會中間多咗班藍衣同便衣上嚟。收隊時，兩個藍衣人行埋去新郎新娘度講咗句：「恭喜哂，拜拜！」

#我真係恭喜你呀 #無賴 #婚宴 #拆人情 #鄭中基 #channelchk

覺唔覺今年造星IV決賽Dance Battle冇乜印象？唔覺睇過選手大頭？旁白師同大家分析咗原因🧐，仲幫大家實現李嘉欣開聲恭喜Marf嘅願望🤣 👉 https://youtu.be/Jk60aKpTNwA

#ViuTV #造星 #全民造星 #全民造星IV #造星IV #女團 #channelchk #嘮動新聞 #李嘉欣 #邱彥筒 #marf #我真係恭喜你呀
＝＝＝＝＝＝＝＝＝＝=＝＝＝＝
記得Like、Share、Comment條片，Subscribe我哋YouTube Channel，仲有撳埋鐘仔搶先睇片喇！
https://www.youtube.com/ChannelCHK