外傭要少主跪地叩頭道歉片瘋傳 事件變羅生門
網民引男童媽媽澄清：跌低唔願起身

網上同WhatsApp媽媽群組噚日（16日）流傳影片及截圖指有外傭當街要小朋友跪地叩頭道歉，仲話工人姐姐指摘「he is naughty」，引嚟大批網民鬧爆，但今日就有自稱認識小朋友媽媽嘅人士稱，事件真相其實係小朋友跌低唔願起身，「媽媽好清楚姐姐沒有虐待小朋友，不是叩頭認錯」。

流傳嘅影片片長7秒，見到一名小朋友跪喺地上，雙手掂地面後，隨即拍拍手掃走上面啲塵。佢望一望企喺旁邊嘅外傭後，未有企起身。據影片嘅描述就指事發係噚日近5時，地點位於廣播道港台電視大廈對出行人路，「一開頭以為小朋友唔小心跌親，但直至行近附近（2-3分鐘），個小朋友依然跪在地上，小朋友一直作叩頭動作及聽到他口裏說sorry sorry」。

呢位途人話佢上前了解過，但小朋友唔識答，所以問咗工人姐姐咩事，對方就詬「because he is naughty」 ，所以要小朋友下跪叩頭認錯，「希望呢位小朋友嘅家長可以見到，保護好自己的小朋友」。

不過到今日，有自稱認識當事人媽媽人士強調，事件「不是如網傳咁樣」，媽媽已知道事件，而真相係小朋友跑時跌低唔願起身，「媽媽好清楚姐姐沒有虐待小朋友，不是叩頭認錯」。

#channelchk #下跪 #跪地 #虐待 #道歉 #外傭 #廣播道