禁晚市堂食在即 空姐牛肉飯老闆娘諷：通關了！通通都關了
飲食業指過年前頒禁令致命 料最少持續一個月

政府周五（7日）起禁食肆晚市堂食，兼重新收緊限桌令，唔少食肆都叫苦連天，連向來撐政府嘅「空姐牛肉飯」老闆娘郭德英都喺facebook出post諷刺「通關了！😔通通都關了😔」，就咁睇都已睇得到有幾慘。有網民都喺帖文留言一齊鬧政府，又話「原來打咗兩針和打咗3針的人都與無打針的人同一樣被罰！」

除咗小店，連鎖酒樓集團都一樣嗌慘。專辦酒席嘅中式酒樓譽宴集團主席張家豪向傳媒表示，新年年頭同農曆年尾都係結婚擺酒旺季，又有公司年底晚宴、團年飯，集團原本幾乎逢周五至日都爆滿，但政府宣佈禁晚市堂食後，全部酒席都須取消及改期，暫時近50組已預訂酒席單位受影響，員工亦因此只能返半日工，收入變相減半。佢又呻，兩年來一直配合政府防疫措施，政府要求打針時，佢哋亦打咗，但當要收緊措施就向食肆先埋手，「飲食就受晒，停飛又唔見咁快！」

中小企食店聯盟召集人林瑞華今早在商台節目亦表示，今次喺過年前禁晚市堂食，影響不少公司嘅團年飯，影響程度比以往禁堂食更致命！佢估計禁令可能最少持續一個月，橫跨農曆新年，唔少業界都已作最壞打算。佢希望，如果7日內無不明源頭個案，政府檢討時應放寬措施，例如晚市可到晚上10時；若禁令持續，亦希望政府可推出抗疫基金支援業界。

飲食界立法會議員張宇人都話，估計業界呢段期間損失約40億元生意額，希望政府嘅防疫措施「張弛果斷」，當疫情受控、社區無病毒傳播時，就放寬措施。

#channelchk #禁晚市堂食 #堂食 #限桌令 #Omicron #COVID19 #空姐牛肉飯 #譽宴