華記突「轉軚」組反對林鄭連任大聯盟
爆夏寶龍第一個多謝何君堯撐《國安法》
嚇到林鄭面青
嘮動新聞👉 https://youtu.be/YbHB-TrenaQ

下屆特首選舉明年舉行，特首林鄭月娥雖未有表明會爭取連任，但向來撐政府嘅華記正能量就突「轉軚」，表明「倒林鄭」兼力數佢五宗罪，包括從不贊成實施《國安法》，但實施後就邀功；錯判7.21形勢等，直言「過去4年我受夠喇！我忍唔到林鄭！」。華記呼籲成立「反對林鄭連任大聯盟」，雖然佢利申無個人利益，但有撐政府嘅網民就質疑華記「反政府，香港點會好呀」、「難以令人信你冇政治利益。對你好失望！」

華記喺YouTube頻道話，林鄭死罪係唔贊成現屆政府推行廿三條及實施《國安法》，「基本上林鄭月娥從來唔贊成推動《國安法》，但阿爺見到219萬民意後，畀咗《國家安全法》香港，而家林鄭揸住《國家安全法》認屎認屁，好似《國家安全法》係林鄭月娥爭取返嚟，呢度令我好反感。」

華記又話實施《國安法》其實最大功勞係立法會議員何君堯。華記解釋，何君堯喺去年2月嘅一次大會上，已大力推動《國安法》同廿三條，最終《國安法》喺同年6月30日出爐，仲透露港澳辦主任夏寶龍頒佈《國安法》後，「第一個多謝就係何君堯，當時你見到林鄭月娥塊面係一青一白」，但結果今日「個個人做何君堯，你知啦！何君堯面對好多把刀」。華記又指林鄭忌才，隨後他與何君堯推動健康碼、廿三條，都被林鄭當「臭四」。

至於喺7.21事件上，華記又批評時任政務司司長張建宗，居然話警隊要向市民道歉，質疑佢支持黑衣人，而林鄭錯信張建宗，就錯判形勢定性7.21為暴動，華記就重申事件只係互相毆鬥，「攞藤條叫暴動？」

華記又話林鄭搞到司法大倒退，大量冤案出現後，就叫人唔好批評法官；4年任期無作為，仲整咗《逃犯條例》出嚟；又無能力對抗5眼聯盟。華記問林鄭「美國領事館點解會有千幾人喺我哋度返工」，稱入境處應拒續簽證，又問點解美領館地權係永久，認為行政長官如果係鷹派、有作為，應即刻改變土地，得返30年期，「你要有承擔有作為有前瞻性！」

華記鬧林鄭唔重視民意，希望佢做埋今屆就算，勸佢相夫教子，做開心快活人，「畀個政協你做，畀個國家領導人你做咪得囉！好似CY（梁振英）咁，CY落返嚟做特首就最好喇！」

#channelchk #林鄭 #特首選舉 #華記 #華記正能量 #何君堯 #鄧炳強 #夏寶龍 #國安法

「華記」成立反林鄭連任大聯盟一星期即撤回
稱遭陳淨心等藍營抹黑顛覆 改撐劉德華做特首

親建制KOL「華記」楊官華宣佈成立「反對林鄭連任大聯盟」唔夠一個星期，噚日（10月31日）就宣佈正式撤回。佢話連日來俾藍營嘅人日日誣蔑抹黑，又遭另一親中KOL陳淨心製作普通話短片指顛覆國家，為咗「唔想俾位人入，唔想國家難做、警察難做、國家難做」，所以撤回，並改為支持「民間特首劉德華」來屆做香港特首，仲希望劉德華歌迷會會員一齊支持。

「華記」噚晚喺YouTube頻道「華記正能量」播出嘅片段話，大聯盟成立後「一石激起千重浪」，令社會出現極大矛盾，又稱遭唔同陣營人士抹黑佢顛覆國家，「以前識藍營嘅人日日都喺度誣蔑抹黑緊我」。佢仲逐一點名，當中包括話親中KOL陳淨心用普通話拍片話佢顛覆國家，「好多網友擔心啲人排隊去國安『隊我』，話我顛覆國家」。

佢話自己作為「小市民」，無辦法抵擋瘋狂抹黑，所以宣佈反對林鄭連任大聯盟正式撤回，「唔想引起社會矛盾，唔想俾人抹黑我，亦唔想警察難做、國家難做。」佢又慨嘆，成立大聯盟只希望反對林鄭連任，但遭千夫所指，形容「政治上真係揣摩唔到」。

片入面嘅「華記」身後放有藝人劉德華嘅相，寫住「劉德華與『民間特首』的錯認」。華記稱，香港有《國安法》後會施德政，就要用「福將」，所以改撐「民間特首」劉德華擔任特首，「希望劉德華fans club會員一齊支持，......，咁就成個香港皆大歡喜」；如果唔想搞到劉德華，就建議大聯盟改做「香港人齊心通關大聯盟」，希望香港早日通關，唔想林鄭去到出年都連任，令香港繼續通唔到關。華記認為，如果林鄭「可以收賣到香港市民話今年可以通到關呢，冚世界支持你；但如果你今年通唔到關，我真係出年搵劉德華做」，強調「anyone but carrie lam」。

特首選舉明年3月舉行，但林鄭未有宣佈參選，但「華記」上周一（10月25日）已在宣佈成立「反對林鄭連任大聯盟」，話「作為一個香港市民，我受夠啦，我忍夠咗林鄭」；又形容反對林鄭連任大聯盟吃力不討好，得罪現解行政長官無着數，而且仲會俾人攻擊，但仍要「是其是，非其非」。

#channelchk #林鄭 #特首選舉 #華記 #華記正能量 #陳淨心 #劉德華 #民間特首 #抹黑 #顛覆國家 #國安法

僅僅一個星期，「反對林鄭連任大聯盟」就壽終正寢了～華記喺藍營、黃營「夾攻」之下，宣佈「撤回」聯盟，仲改口加持華仔做特首⋯⋯

去片👉 https://youtu.be/kC5LnN6sM1Q
＝＝＝＝＝＝＝＝＝＝=＝＝＝＝
記得Like、Share、Comment條片，Subscribe我哋YouTube Channel，仲有撳埋鐘仔搶先睇片喇！
同埋Follow我哋Facebook、Instagram同Telegram呀！
👉YT： https://www.youtube.com/ChannelCHK
👉FB： https://www.facebook.com/channelchk
👉IG： https://www.instagram.com/channelchk
👉TG： https://t.me/channelchk
報料／廣告接洽：
info@channelchk.com
#channelchk #嘮動新聞 #華記 #華記正能量 #楊官華 #林鄭月娥 #特首 #連任 #CarrieLam #劉德華

「華記正能量」宣佈封咪唔拍片
指遭藍營無差別抹黑、砌生豬肉

再見啦，華記！兩年間已經上傳咗1,654條片嘅藍營KOL「華記正能量」（楊官華），深夜突然出片宣佈暫時封咪，仲話係因為畀人「日日抹黑」、「每一句說話都大造文章」，所以決定停止拍片，又話「江湖險、人心更險，政治非常兇險大家小心！」但華記都同觀眾留低一句「江湖再見」，話「有國安法天下太平，當社會再有需要我的時候！我必挺身而出！」。

相信令華記退出嘅主要原因，都離唔開佢成立「反對林鄭連任大聯盟」後被圍攻。華記係片頭已經好勞氣咁講，自己喺片入面嘅每一句說話同玩笑都會被放大，例如噚晚佢只係「講笑」話支持劉德華做特首，就畀人「好認真咁又鬧一餐」，形容大家連佢嘅一句笑話都容不下。華記仲話，佢萬萬始料不及成立「反對林鄭連任大聯盟」後會被當成「漢奸」。他指自己「忠肝義膽」，但「換返嚟嘅呢就係俾自己陣營嘅人恩將仇報、過橋抽板、無差別抹黑」、亦未料到「自己嘅藍營人士調轉槍頭、反轉豬肚就係屎」、「砌我生豬肉」。華記仲強調自己唔係麻煩製造者，而係愛國愛港人士，被抹黑為漢奸己經係佢嘅「底線」，呼籲大家唔好再「內鬥」。華記話佢未來會專注打理佢同中國政府合作嘅新能源項目，得閒Share吓啲正能量嘢、或者為「冤案挺身而出」。

華記喺片尾話，「我求其講句嘢都上新聞版嘅，我真係好驚！」，其實華記今年都真係因為唔同事件上新聞㗎～返到八月，係元朗擺721街站嘅華記，同一名行過嘅老翁傾談，期間老翁語出驚人話「我有份打！」，之後就被指參與暴動而被捕。華記事後於網上曾多次向老翁道歉，但已被另一藍營KOL「珍惜群組」李璧而割蓆，當時華記指二人理念不同。而到上星期，華記被發現設立「反對林鄭連任大聯盟」，被藍營質疑「反林鄭政府」，更被陳淨心指佢後台係建制派議員何君堯，成立聯盟係另有目的，而華記最終喺周日（31日）撤回大聯盟。

#channelchk #華記正能量 #華記 #楊官華 #反對林鄭連任大聯盟 #Youtuber

退休警屯門爭車位毆斃漢 被控誤殺須還柙
華記斥案件被政治化 透露死者撐警

警方早前就屯門泊車爭執命案拘捕一對夫婦，他們分別為退休警員及警署洗衣店老闆，合共被控一項誤殺罪，於今（1日）早提堂。法官批准女被告李桂芳（58歲）以現金20萬元保釋，男被告鄺德榮（57歲）則須還柙候判，案件押至明年1月26日再訊。而曾宣佈「封咪」的YouTuber華記正能量，就於周二（31日）發佈的新片中透露，案中死者「撐警」，與他擁有很多共同朋友，更曾出席過他的街站。

案中死者為貨Van司機陳國樑（55歲），有傳媒曾引述消息指他疑有心臟病紀錄；惟華記正能量就於影片中稱，死者太太透過朋友聯絡上他，澄清陳其實「從來沒有心臟病」。華記又自稱大概了解案件的來龍去脈，但因憂慮干犯「妨礙司法公正」，所以不能透露太多，「但係有車Cam就影到晒嘅，件事發生咩事就好清楚」。

華記續斥有人將案件「政治化」，接着就透露死者立場撐警、家屬亦是愛國人士，去年曾到他「支持23條」的街站簽名支持，又展示死者當時到街站留影的相片。華記形容案中的退休警員為「Trouble Maker」，傳聞他當時是被人「革扯」，但華記認為情況不足為奇，「例如有三萬幾個黃絲，緊係有幾個係好人㗎～」、「咁有三萬幾個警察，梗有幾個係警魔㗎」。

華記於片尾再發放「正能量」，指知道死者的8歲兒子「好傷心、情緒有啲問題」，太太亦面臨情緒崩漬，為協助他們渡過難關，會將華記Patreon12月的月費收入捐給家屬，以解他們的「燃眉之急」。

#channelchk #華記 #華記正能量 #屯門 #兆康 #誤殺 #退休警 #警員