兆基創意書院運動會Cosplay
「打孖風」玩贏魷魚遊戲 MJ潘 黎生 天文台搶fo

「相信唔使我講你都見到而家出面情況好惡劣，基本上而家企都企唔穩，雨打落塊面度好似針咁痛，啱啱我對鞋都俾大風吹走咗，我個身要向前傾斜或者紮馬先至可以企得穩…。」

喺Google打潘蔚林三個字，第一個相關結果就係——颱風。本屆香港兆基創意書院運動會，一如以往讓學生繼續玩low cost cosplay，有兩組重演MJ潘呢一幕——09年7月，無綫記者潘蔚林喺尖沙嘴天星碼頭海傍報道颱風「莫拉菲」襲港，風勢勁到將潘嘅頭盔同鞋吹走，人爭啲被吹跌，要好似Michael Jackson咁45度前傾紮馬先企得穩。MJ潘同採訪團隊嘅專業敬業，就連外國人都豎拇指讚好。

疫情關係，運動會仍然未能返番去九龍仔運動場，要繼續留守校園battle，但學生依然落足心機扮鬼扮馬。室內雖然平靜無風，但「MJ潘」個馬步、「路人甲」撐傘，「道具人」猛力fing起件雨褸，營造颱風效果，逼真可愛。

「打孖風」成為最hit扮嘢之選，《魷魚遊戲》都唔夠佢嚟。除有MJ潘，仲有「我嘅訴求就係想返工」嘅黎生；扮黎生嘅學生detail位連黎生喺新聞報道個name card同有線咪牌都整埋。

至於天文台特別為「獅子山」同「圓規」而開嘅記者會就難估啲，可能同cosplayer髮型有關……

#cosplay #香港兆基創意書院 #運動會 #莫拉菲 #打孖風 #潘蔚林 #黎生 #我嘅訴求就係返工 #channelchk