劍神193張家朗 原來識ERROR 193郭嘉駿
首回應古惑仔造型：有時擺pose怕醜

奧運金牌的名氣，加上韓星級的外貌、1米93的完美身高，令世一劍神張家朗 Edgar Cheung Ka Long 近期多了一份兼職──法國高級時裝品牌Dior硬照模特兒。但對比2017年Sony Hong Kong宣傳片的沉穩認真、2018年衞生署衞生防護中心 Centre for Health Protection, DH宣傳片的可愛，2021年DIOR硬照的MK古惑仔造型，卻被外界狠批時裝災難。張家朗昨（17日）為此度首開腔剖白，坦言擺pose會怕醜，拍攝前曾請教熟手的隊友。

為香港奪得首面奧運男子花劍金牌的劍擊好手張家朗，早前出戰東京奧運後，隨即轉往內地隔離，備戰全運會，可惜因腳傷臨時退賽，回港休養，至前日才首度出席公開活動。對於網民期待身高193的他與ERROR 193郭嘉駿合作，張家朗直言自己都認識193：「（合作）我冇乜所謂，但而家嘅Focus都擺返喺腳傷，想盡快好返，始終嚟緊12月就有比賽，對於運動員嚟講，比賽先係最重要，不過有機會，都會出嚟同大家見吓面。」

蠟筆小新式箱頭筆粗眉、MK感覺金屬頸鏈，配以頭髮jel到飛起的長臉，張家朗以古惑仔造型拍攝DIOR硬照廣告，被指貌似馬浚偉和許志安，令不少人批評髮型師和造型師玩嘢。他昨以品牌大使身份，現身DIOR分店，首當其衝是回應硬照風波。「我覺得似唔似（馬浚偉和許志安）？我又冇諗過呢個問題，我自己覺得（影得）OK嘅，我都係做返自己。」

花劍世一，但硬照模特兒卻是初哥；張家朗不諱言在拍攝前，曾請教經常出席時尚品牌活動的隊友崔浩然（Nicholas）：「問吓佢點做，同埋我哋有時都會一齊傾吓fashion。」家朗亦自認性格內向，不擅長面對鏡頭，「可能有時擺啲甫士，我都會有啲怕醜，但係熱咗身之後，就好咗好多！」接拍DIOR後，還會嘗試兼任演員？「有機會又唔影響訓練，我都會想試吓。人一世、物一世，有啲嘢可以試吓，對我嚟講，都係一個好嘅經歷！」

#張家朗 #劍擊 #花劍 #DIOR #ERROR #郭嘉駿 #DenisKwok #崔浩然 #時裝 #模特兒 #蠟筆小新 #MK #頸鏈 #髮jel #jel頭 #古惑仔 #MK #髮型 #造型 #馬浚偉 #許志安 #粗眉

《造星》揀人咩準則？193騎呢rap照入40強
Edan Alton演出不獲評判歡心 齊墮復活區

近期ViuTV《造星IV》嘅評判同導師，不停被圍插foul錯人，又俾人挑剔話唔識揀星。大家對於佢哋揀人嘅準則，出現咗好多個黑人問號。原來宇宙天團ERROR顏值擔當嘅「193」郭嘉駿，當年喺《造星I》99強跌落復活區，驚險復活先打入55強。Channel絲睇番當時三爺點樣再下一城晉身40強，又有另一番滋味。

嗰陣唱歌又唔係出色、做戲跳舞都唔係好掂嘅三爺，喺55強憑住爆笑舞步，配襯埋LMF神曲《大懶堂》，成功獲得評判清一色6盞藍燈，入圍40強。嗰陣6個評判，亦都係40強嘅2班導師，鬥快撳燈揀卒入自己嗰隊。其中側田話，193呢款參賽者，觀眾「一係好鍾意佢，一係好唔鍾意佢」；Eric Kwok亦覺得三爺「好有character，我會記得佢」；火火嘅評價最直白：「（193）靚仔玩騎呢，有得做喎！」雖然三爺喺40強止步，但最終以男團ERROR成功出道。

至於而家係人氣歌手兼演員、亦係人氣男團MIRROR成員嘅Edan呂爵安，喺55強自彈自唱《想回到那一天》，但跌落復活區。同樣係MIRROR成員嘅Alton王智德，喺55強以《木偶襲地球》為題嘅歌舞表演，當時都得唔到評判歡心，要跌落復活區。好彩兩人之後都被撈番，繼續比賽。雖然Alton喺30強止步，而Edan只係拎第8名，但佢哋之後以男團MIRROR成功出道。

值得一提嘅係，令三爺成功晉級嘅幕後功臣，係PA Himtos。他本身鍾意跳舞，當時義務幫55強嘅三爺特訓同排舞。當知道33得咗、晉級40強，Himtos當堂感動流涕，而家佢已經升職做導演，仲幫過《造星III》入面跳中國舞嘅Dilys黎蘊芝排舞，令Dilys成功晉級𠻹。

究竟歷年來4屆《造星》係睇啲咩去揀人嘅呢？有character？唱歌好？跳得？入戲？Channel絲都搲晒頭，唔知你哋點睇呢？

#channelchk #造星 #郭嘉駿 #LMF #大懶堂 #側田 #EricKwok #Himtos #ViuTV #全民造星 #ERROR #Dilys #黎蘊芝 #火火 #DenisKwok #郭偉亮 #EdanLui #呂爵安 #MIRROR #AltonWong #王智德 #排舞