學習謝霆鋒愛國情操
肥媽宣佈棄葡籍入中國籍 ：有保障

「我在香港出生，所以我本來就是一個中國人。其實我已經在申請退掉加拿大國籍了。」香港出世，自小隨家人移民擁加拿大籍嘅中國藝人謝霆鋒，日前在央視節目《藍羽會客室》發表愛國宣言。但估唔到，連肥媽都話仿效謝霆鋒，放棄葡萄牙籍。

在一片「限籍令」傳聞下，謝霆鋒係首位愛國藝人企出嚟宣佈「申請緊」放棄加籍。網民一致叫好，其中網民杜先生更形容他是「優秀的藝人，是全球中國人的典範！」「放棄外國護照！一個都不能少！」呼籲大家學習霆鋒好榜樣，一起放棄外國護照，以身為中國人而驕傲。

所謂「限籍令」，盛傳係國家廣電總局指明，部份擁外國國籍藝人將難以再於內地登台。而根據國際法第9條規定，自願加入或者取得外國國籍的，將自動喪失中國國籍。

但有網民質疑，即使你取消加籍，只要入番張form，又返番嚟，undo。同埋，謝生點樣可以證明佢已經放棄咗加籍？兩個仔讀緊愛國學校未？咩國籍？點解到40歲咁遲先突然醒起自己係中國人放棄加籍？謎。

然後下一個問題就係：謝霆鋒之後輪到誰？李連杰？孫燕姿？王力宏？趙又廷？定係劉亦菲？根據網上流傳「限籍令」名單，有佢哋個名。

識得揀，你冇理由唔揀。但估唔到連肥媽瑪俐亞都話仿倣謝霆鋒，放棄葡萄牙籍。

肥媽，唔止出力為港府宣傳大灣區，亦身體力行北上發展。佢接受「自由亞洲電台」訪問時就話：「如果真係要返大陸做嘢，咁就啱喎，你返上大陸做嘢，你應該係攞大陸嘅國籍，有乜嘢問題，我睇到霆鋒都cancel加拿大籍，我諗陸續個個都會做，除非你話真係唔想搵呢個錢啦。」

肥媽仲大讚申請中國籍嘅好：「中國籍有保障，你有保險有盛，有勞保，有福利，你住嗰個國家就攞嗰個國家嘅福利㗎啦！」咦，胡杏兒（英籍）、歐陽靖（美籍）、應采兒（美籍）都可以考慮下喎！

#謝霆鋒 #加籍 #肥媽 #限籍令 #愛國藝人 #中國籍 #channelchk