👉楚原2018年獲金像獎感言全文

（評審）將一個終身成就獎，
獎畀一個終身冇乜成就嘅楚原，
你哋即係監生迫我講句受之有愧啫？
我的確係受之有愧。

回首半生青衫人老；
喺漫長嘅人生中，有開心嘅時候，
但係困難嘅日子亦都不少。
人生大概都係「失意倍多如意少」。

（執導1973年上映之《七十二家房客》）
我破咗香港賣座紀錄，
老闆（邵逸夫）即刻同我簽張新合同，
人工加咗10倍。
人人都話，我係香港最幸福嘅導演。

10幾年後，我嘅戲唔賣錢嘞。
拍完幾部「仆街片」呢，
就想拍《天龍八部》。
開鏡前一日，（老闆娘）方逸華小姐
出嚟撕咗張通告唔畀拍，
入到寫字樓，第一句就問我：
「邊個畀你拍《天龍八部》㗎？
蝕咗本，你有得賠咩？」
最後兩句就係話：
「楚原，你根本唔懂電影藝術！
你根本唔識拍電影！」
嗰時人人都說，
我係邵氏公司最難堪嘅導演。

但係「人生」呢兩個字呢，
就係「歡聲」同「淚影」4個字砌成，
冇乜奇怪吖？
任何人，無論你噚日幾風光，
亦無論你噚日幾失意，
聽日天光嘅時候，
你一樣要起身做番一個人，
繼續生活落去，
因為明天總比昨天好，
呢個就係人生！

唔講你唔知道呀，
人生原來同打麻雀一樣㗎咋，
有東南西北風㗎；
你打到北風嘅時候呢，
又係另外一個人生嘞。

如果你好似我咁，老到冇得撈嘞，
記得後生淨番個錢呀。
老到好似我咁，
連終身成就獎呢個老人牌都攞埋嘞，
咁你就應該……應該咩呀？
應該「管他天下千萬事，
閒來輕笑兩三聲」！

到老嘅時候，無論外面發生咩事，
「管他喜怒哀樂，管他恩怨情仇」，
全部都當係菩提明鏡；
笑吓，就算㗎嘞。
古今多少事都付笑談中。

最後，我送畀大家，
我喜歡嘅幾句說話：
「當你回首往事時，
不因碌碌無為而悔恨，
不為虛度年華而羞恥。」
咁你就可以好驕傲咁同自己講：
「你，無負此生！」
多謝！

#楚原 #導演 #方逸華 #電影 #金像獎 #票房 #TVB #天龍八部 #movie #港產片 #film #邵氏 #邵逸夫 #runrunshaw #channelchk