BY2 Yumi捲「蕾宏婚變」後驚傳服藥自殺 要洗胃急救
張惠妹疑為「戲院緋聞女友」 與李靚蕾同場睇戲 尷尬收場

王力宏被前妻李靚蕾呢場「蕾宏婚變」餘波未了！被指與王力宏出軌嘅BY2成員Yumi，有傳佢服藥自殺，要送院急救。

疑為Yumi友人喺微博發帖稱：「Yumi吞藥輕生在醫院洗胃急救！@王力宏 你最清楚Yumi根本沒有介入你一地雞毛的婚姻！！！如果她真的出什麼事情，我絕不原諒！！！！ 」帖文附有幾張相片，其中一張見一名女子背向鏡頭，疑係Yumi坐喺輪椅上；另有一張係藥單，日期寫上12月22日，病人姓名亦與Yumi相同；同埋寫有「急診危重科」嘅單據。

Yumi捲入王力宏離婚風波後，BY2工作室微表示已報警遭誹謗，但「蕾神」在Yumi微博留言反擊：「請把警察聯繫方式給我，我提供證據。」Yumi翌日（19日）就發長文澄清，指自己與王力宏2012年拍拖，強調係王力宏「結婚前正式交往的女友」，又指兩人早已互刪微信好友。但「蕾神」再出擊，上載疑似是Yumi裸照及2015年的聊天紀錄反擊，Yumi之後就再無回應。

另一邊廂，「蕾神」5,000字爆料其中一段提到「記得有一次你約我看電影，我們坐在前面，散場時發現你當時的緋聞女友就坐在影廳的最後面，我們一起看了同場電影」。有台灣傳媒報道指呢位「緋聞女友」係當時王力宏女友張惠妹（阿妹），發生時間係2004年。

報道指，阿妹當晚得知王力宏帶一位美國返嚟嘅「女性友人」去睇戲，阿妹為表明自己係「正印」，便同好友到戲院。當日佢哋睇嘅係周星馳導演嘅《功夫》，阿妹坐喺王力宏同李靚蕾後幾排位子，電影散場後，阿妹急步衝向王力宏方向，一班人就喺影院門口巧遇，王力宏當時相當尷尬。

對於阿妹被捲入王力宏離婚風波，張惠妹經理人回應指：「快20年前的事我不想打擾問阿妹了，更不想拿這種未經求證道聽塗說的陳年往事，對人落井下石，夠了吧……。」

#channelchk #李靚蕾 #蕾神 #王力宏 #Yumi #BY2 #張惠妹