冇嘟碼「殘廁醫」 不滿訪問聚焦洪門宴疫慌醜聞
朱偉星反屈商台教公眾不守法 斥張敬軒騷才播毒

身為家庭醫學專科醫生的朱偉星，日前在化驗所殘廁，為港台普通話台DJ兼妻子楊子矜採樣檢測時，懷疑樣本被身上殘餘的科興滅活疫苗病毒污染，導致假陽性，令灣仔洪門宴逾百人錯送隔離營，包括多名高官、議員和他自己。

由於洪門宴疫慌醜聞再有新進展，商台時事節目《在晴朗的一天出發》今早（10日）直播訪問朱時，亦聚焦談論此事。惟當晚違規沒掃瞄安心出行赴宴的朱偉星，竟突然跳掣發難，反屈商台教公眾不守法，又斥歌手張敬軒的紅館騷才播毒。

【訪問節錄】
🌞晴朗主持 🔵朱偉星

🌞：條例定咗，我哋都要跟㗎啦。
🔵：哦！你哋咁守法㗎？
🌞：吓？你唔係㗎？
🔵：唔係呀、唔係呀。er……er……er……我唔係好知道嗄，商台好似過去2年都係……都係好鼓勵大家唔係……唔係咁守法㗎嘛。
🌞：你想講咩先？你講清楚啲，都幾大指控嚟喎，呀朱先生。
🔵：嗄……er……我自我我我覺得，如果你覺得唔值得講，我哋咪唔好講囉。
🌞：唔係，因為你已經講咗出口，我哋想問清楚係咩意思。
🔵：……er（清喉嚨聲），我係從來冇接受過商台訪問嘅，嗄；我亦都停止咗（清喉嚨聲）聽商台好長時間嘞，嗄。因為商台……就算我有時坐喺的士聽，我覺得你哋散播嘅，全部都係仇恨言論囉。
🌞：例如呢？
🔵：而家你哋做緊嘅……
🌞：請舉例。
🔵：你都係散播緊仇恨言論。
🌞：請舉例。
🔵：嗄……唔係睇事囉。
🌞：請舉例。
🔵：我唔講啦，太多啦。
🌞：如果太多，應該好易舉嘅啫。
🔵：直情係有少少厭煩嘅。咁我覺得，可能……可能……可能我錯咗，應承呢個訪問。
🌞：吓？（忍笑）
🔵：大家可能真係……真係都唔係好……好……好……好啱……好啱大家諗嘢方法，因為我聽到（清喉嚨聲）……我覺得好可惜嘅就係，喺今日，你哋都仲係喺度，搵呢樣嘢，唔係睇一個更加重要一樣嘢。
🌞：吓？全港媒體都係睇緊呢個Party（洪門宴）喎
🌞：你睇吓今日報章；譬如《明報》，192人名單外 生日宴多1人中招。其實新聞都仍然講緊呢件事。
🔵：……係……嗄……咁……咁……哈……好有趣呀吓……咁張敬軒嗰單又唔講？
🌞：張敬軒演唱會個問題喺邊度？
🔵：我唔知喎……嗄……其實我睇到佢有機會（疫情）爆出去（轉話題）

#朱偉星 #商台 #張敬軒 #安心出行 #洪為民 #channelchk