半山浸到港島東 柴灣「食水深」 環翠停車場又浸

古有九龍塘水舞間，今有港島東有水都威尼斯。

「獅子山」來襲，香港多區水浸，特別係港島，灣仔滙豐分行水浸，半山馬己仙峽道變「馬己仙峽河」，馬路被黃泥水淹浸，奇景係啲車仲行緊，博命想離開馬己仙峽河。由於水位太高，於是就變咗玩「滑浪飛船」咁，只係今次衝浪係搵命博，半山嚟㗎！

港島另一個水都，位於柴灣環翠。又係嗰個多災多難嘅停車場——C區停車場，A同B好彩冇事。噢，杏花邨車主其實不孤單。

紅黑紅紅黑，水浸就係咁簡單。柴灣道（長命斜）變成瀑布咁，由興民邨一路爆到慈幼；坐巴士沿路就只見到大大小小瀑布同噴泉仔。環翠邨C 區停車場當然（又）水浸，水深及小腿；環翠商場外對出迴旋處亦水浸。居民表示不意外。年經嚟。

暴雨中，就係靠熱心市民。有人冒雨撐傘，推一個車仔，沿街道彎腰清理積水內嘅垃圾，疏通渠口。可以想像有幾辛苦。

Google一下。2014年，環翠邨停車場經過黑雨洗禮，C區又水浸。場內至少40部車一齊沖涼，水深及半條車胎；16年，一場黑雨，柴灣變黃泥「沖」，青年廣場對出路面出現「激流」，洪水湧入商場。環翠C區停車場嘅車又被迫浸浴。

當時嘅區議員認為，水源主要來自大潭道引水道，引水道常有雜物阻塞，但冇人定時清理，雜物由引水道帶落峰華邨大水渠，令水渠淤塞，大水湧出路面。其實唔止區議員咁講，居民都熟晒地理。環翠邨C區停車場喺正迴旋處隔離，「根本就係成個柴灣嘅最低點，仲要再落低一層，邊有得救？」

環翠前區議員吳卓燁曾與領展及渠務署代表會面，講番水浸問題。領展係有做嘢，例如停車場水泵數目增至3部，清潔員加強清理渠道淤塞，但好快又塞番…

#獅子山 #柴灣 #環翠邨 #環翠邨停車場 #柴灣道 #慈幼 #馬己仙峽道 #滑浪飛船 #黑雨 #紅雨 #channelchk