鬧市晚空疑現UFO！ 唐安麒拉低車窗影真啲 天文台：可能是航拍機

名人唐安麒噚晚（5日）喺facebook post咗一張疑似UFO嘅相，隨即引起網民喺留言熱烈討論！不過天文台就話冇收到有關UFO嘅報告，同埋話有可能只係航拍機引起嘅視覺效果。

繼「唐安麒宇宙飲食」之後，噚晚Angel好似又同外太空拉近咗距離！當時約夜晚8點幾，唐安麒喺灣仔馬師道上面，望見東面近信和廣場嘅高空，好似有一架疑似UFO嘅飛行物體。本身唐安麒話佢未拉低車窗嘅時候已經影咗一張相，不過「好像有點反光，所以我就搖下玻璃再拍」，結果都係見到有飛行物體。

有相信UFO存在嘅網民都留言話「唔想掃大家既興緻」，但就覺得係「手機鏡頭既反光所做成」。另外又有人覺得唔係航拍機，加上對比大廈嘅高度，認為飛行物體「一定畀（比）巴士大架」。

天文台今日（6日）覆返Channel絲，就話噚晚冇收到有關UFO嘅報告，同埋話張相有可能係航拍機引起嘅視覺效果。又話以影像透視法嚟理解，如果有航拍機喺大廈旁邊，漸漸飛到去大廈同埋唐安麒中間，視覺上就可能會似係個物體急速飛到樓頂咁喎。

其實一直以嚟都有陰謀論，話多國政府都聯手掩飾UFO同埋外星人嘅存在。真相係點，Channel絲都同大家都唔知架喇，不過都可以一齊研究吓呢張相係咪真係只係航拍機！

#channelchk #UFO #不明飛行物體 #飛碟 #銅鑼灣 #灣仔 #唐安麒 #AngelTong #天文台 #外星人 #外太空 #陰謀論