跳唱女王七仙羽「乜七師傅都話骨」
譚仔上市入手100萬股

啲人成日講，樂壇欠七師傅七仙羽（7cfu）一個膠袋。其實7cfu先至唔care。

7cfu幫譚仔賣個廣告，譚仔仲上埋市。cfu最新力作，係為Pricerite實惠唸經RAP打救，話要保你一家和睦。

條片唔長，2分22秒，鍾意條片嘅人會覺得時間太快，追字幕嘅人會覺得時間過得仲快。你顧得欣賞跳唱女王嘅舞姿，又顧唔切聽歌詞。一條兩分鐘片起碼睇3次。

唔記得講，今次廣告MV填詞跳唱監製混音由7cfu一手包辦，仲分飾售貨員、rapper、唸經師傅、排舞師同舞蹈員。就連廣告創意總監都係佢。cfu你嘅覆蓋範圍都幾廣。

「老豆老母 家姐細佬
俾氣你受 粗口問候
怨氣積聚 關係倒退
越住越頹一家互隊
嗌交理由 空間唔夠
一家七口 難以聚首
師傅今勻 天使下凡
打救凡間 變出空間」
……呢啲碎料。

「衣櫃 書枱 電視櫃
下層配乜七師傅都話骨」

聽到呢度，Channel絲大膽假設係無打錯歌詞嘅……

7cfu同Channel絲講，成個廣告冇乜點NG，因為喺舖頭拍，要爭分奪秒：「面對鏡頭要唱要跳同埋可以記晒咁多嘢，都幾難，所以要練好多。不過我唔論拍電視拍電影拍廣告都好少NG，我都係跳下唱下，冇人教，一面對鏡頭自己諗做啲乜嘢動作。」鏡仔都冇cfu你咁勁。

「譚仔國際」上市集資，cfu都話有興趣，諗住買100萬股。「我會睇吓市場嘅反應點樣，如果好好嘅話我會買多啲。」

cfu話對譚仔咁有信心，因為譚仔行緊運呀！「所以佢啲廣告好受歡迎，佢又搵啱人選。當旺嘅公司，佢搵嘅人選都係啲比較旺嘅人，所以幸運嘅人會同幸運嘅人一齊，生意就會越嚟越好。」又啱喎！譚仔同譚仔三哥兩個譚仔阿姐，分別由7cfu同花姐飾演，一個天使下凡一個係至高無上監製。7cfu仲話，個廣告一出街，業績提升咗30%，全線生意都好好。

有神快拜！

#七仙羽 #七師傅 #實惠 #譚仔 #譚仔上市 #channelchk

＝＝＝＝＝＝＝＝＝＝=＝＝＝＝
🔥出氣師登場！「谷鬼氣、搵我哋」🔥
如果大家有咩疑難「谷鬼氣」，不妨搵我哋「出氣師」，等我哋幫手出返口氣！
出氣WhatsApp： https://wa.me/85263544742

譚詠麟疑「偷食粉絲」引抽水大戰
譚仔覆PokeGuide惡搞：湯底配米線先係世一

71歲歌王譚詠麟疑偷食粉絲一事，除咗搞到眾說紛紜，仲搞到全城抽水抽到「SuperDry」添呀！先有網民改歌「我直入微博 你背面極強壯」、餐廳出「愛呈陷阱套餐」，網媒 Pokeguide 亦都整咗張「譚伯上海粉絲」海報惡搞譚仔雲南米線 ，話出咩「臭茜鹹豬手配操上海粉絲」喎，加$20仲可以追加「悲傷牛肉麵」，加$300就可以換購埋Kimochi波鞋⋯⋯連埋句「譚伯對食粉絲的一份堅持」，真係吸濕大笨象都唔夠佢抽啊～

好多網民都喺個post到tag返譚仔，而被惡搞嘅譚仔今日就出返個post「導人向善」，話米線可以日日食，但「粉絲就唔可以亂咁食」。譚仔話，佢哋嘅湯底配米線先係世一，但就唔會出豬手，可以試咗牛柏葉先，叫大家無波鞋可以換住「譚仔遮遮」先，不過就點都「遮唔到醜」～

抽水嘅其實仲有 Pricerite實惠 同 新巴城巴 NWFB and Citybus，實惠除咗叫大家「食粉絲要食得精明啲」，仲趁機宣傳佢哋唔知悲唔悲傷嘅牛肉麵；而新巴城巴就惡搞咗對出晒名嘅「K」字波鞋，將佢哋改咗做eShop嘅產品，仲話「城巴新巴及小編對此證實了這個消息」。

食粉絲搞到咁大件事，譚校長今次真係「PokeGuide」啦～唔知PokeGuide會唔會喺佢地個App到加埋偷食逃生路線呢？失德藝人名單，呢次「麟到你了」！

#channelchk #譚仔 #PokeGuide #譚詠麟 #實惠 #新巴城巴 #悲傷牛肉麵