瘀爆！寶馬涉違法闖石澳沙灘 卻被困召拖車
疑拔鐵柱擅進 辯稱不小心 倘罪成可囚14天

上周四（28日）一架寶馬被發現擅闖石澳泳灘，車軚深陷沙中，無法開動。網上流傳2張相片，顯示司機當時站在車旁，雙手叉腰，狀甚無奈，而車頭前亦留下一條明顯軚痕。當晚深夜11時許，警方接獲報案指，一輛私家車疑擅自移開通道的鐵柱，駛入石澳沙灘。警方到場調查，20多歲的司機當時報稱不小心駛入，警員登記司機資料及向其作口頭警告後，司機自行召來拖車將車拖走。

根據第132E章《泳灘規例》，除非獲得署長書面准許，否則任何人不得將任何車輛帶到到泳灘上，一旦罪成可被判罰第一級罰款（即$1至$2000元）及監禁14日。

Channel師提提大家，11月6日起就係獅子座流星雨嘅活躍期，11月17日更加係高峯期，相信唔少人都會襯天氣涼咗選擇到郊外觀星，大家記得千祈唔好學相中司機呀，如果唔係其他人就由睇星變瞬間看柒頭㗎啦～

#channlchk #石澳 #石澳泳灘 #車軚 #泳灘規例 #沙灘 #流星雨

爆紅柴犬meme Doge16歲生日
網民祝長壽健康 讚「網上最可愛狗狗」

近年Memes熱爆全球，好多表情搞怪嘅動物都變成萬能Key，其中最受歡迎嘅，一定走唔甩呢隻柴犬Doge！唔講都唔知，原來Doge本犬今日16歲生日，大家快啲去祝佢生日快樂啦！( Twitter/IG : kabosumama )

Channel絲幫大家介紹返，Doge原名かぼす（Kabosu），係一隻嚟自日本嘅柴犬，你哋唔好睇啲人Key到佢咁大隻，其實佢係女仔嚟㗎～かぼす曾經被遺棄，直到2010年俾主人佐藤收養，先有而家嘅幸福生活，仲有幾隻貓陪佢一齊玩添。好多網民都同かぼす講生日快樂，仲趁呢個機會多謝佢帶咗好多歡樂俾全世界，希望佢繼續健健康康。

講返Doge嘅背景，呢張相其實喺2010年影，計返當年Doge應該5歲左右，而張圖就去到2013年先開始爆紅，仲變成人人都識嘅meme。而近年加密貨幣興起，2013年發行嘅Dogecoin，即係大家叫嘅狗狗幣，都係以呢張meme嚟命名㗎，Tesla CEO、世界首富Elon Musk仲話過佢係「The Dogefather」添。唔止呀，主人佐藤幾個月前仲將Doge Meme以NFT形式喺線上拍賣，最終以1696.9 ETH（即近5,800萬港元）成交，收益撥歸多個慈善團體，再幫Doge寫下meme歷史嘅一頁。
#channlchk #meme #Doge #Kabosu #かぼす #迷因 #Dogecoin #狗狗幣 #NFT