真係靚到仆街！尖嘴叔掛住𥄫短裙美女
俾石壆躀低撞跌燈箱 被讚有手尾扶返正

呢個世界人人都鍾意靚嘢，有時行街𥄫吓靚仔靚女都係無可厚非，但就千祈唔好好似片中呢位男士咁、𥄫女𥄫到差啲出事呀～

網上近日流傳一條車cam片，事發地點位於尖沙嘴金馬倫道往加拿芬道方向，近福僑大廈門口。片中只見一個着藍色衫嘅男人一路過馬路、一路望住一位著T恤短裙嘅女士，結果唔小心俾行人路嘅石壆躀低，成個人向前仆咗幾步，仲撞跌埋放喺大廈門口嘅廣告箱，睇到車cam片主都「嘩」咗一聲。不過呢位男士都有樣嘢值得大家一讚，就係成件事雖然有啲尷尬，但佢都無就咁走咗去搵窿捐，而係好有手尾咁執返起、扶返正個廣告箱。

或者，香港人真係好鍾意睇人「仆街」；段片一放上網就引嚟熱議，仲吸咗好多個「哈哈笑」reaction。有人留言話「笑到不停Loop」、「睇咗好多次」、「雖然柒咗，不過仲好有公德心咁執返起個牌」，但亦都有網民好精警咁話「條女真係索到仆街」。

而睇返個廣告箱同大廈資料，其實應該係宣傳緊樓上一間按摩店。雖然嗰位男士錯過咗一棵樹，但「塞翁失馬，焉知非福」，唔知佢最尾有無上樓尋覓吓另一個森林呢？

#channelchk #𥄫女 #尖沙嘴 #福僑大廈 #車cam #短裙 #金馬倫道 #仆街 #加拿芬道 #廣告燈箱 #招牌