梅姐姨甥相隔廿年終現身
睇《梅艷芳》感觸落淚：媽咪，姨姨，我永遠以你們為榮

電影《梅艷芳》講述梅姐傳奇一生，但現實的她，相較戲中着墨的地方，為人是更加重情重義。在胞姊梅愛芳於2000年病逝後，梅姐打算按約定好好照料一對分別7歲及5歲的姨甥，但隨著他們跟隨姊夫潘立德搬離香港後，雙方失去聯絡。如今相隔逾廿載，有報道稱梅姐姨甥潘文皓終於現身，更在網上發文指至少入場看了兩次《梅艷芳》。除了流了無數次淚，文皓更想告訴母親和姨姨：「我永遠以你們為榮。」

身處加拿大的他，於電影裏盡見母親與姨姨的姊妹情深，文皓在文中向二人盡訴多年來的心中情，「媽咪，雖然你唔可以喺呢度睇住我同細佬長大，但係我知道你喺天上一直有看顧住我哋……」、「姨姨，你將你嘅生命奉獻咗畀舞台、畀音樂同埋你啲歌迷，無論你喺邊度都好，我都希望你可以感覺到滿滿的幸福，因為到今時今日仍然有好多人愛着你、懷念着你。」

錯過的光陰一去不返，雖然文皓只能透過回憶與姨姨相認，但他承諾會積極樂觀生活，不輕言放棄、好好長大，以回報她及媽媽。

#channelchk #梅艷芳 #梅愛芳 #Anita #潘文皓 #潘立德

梅啟明俾人串「遺產KOL」嬲嬲豬 否認不事生產
潘小文電台節目揭梅姐與姨甥失散之謎

梅艷芳胞兄梅啟明入稟控告投資《梅艷芳》的安樂電影公司侵犯商標，事件除咗搞到滿城風雨，就連梅媽都話要同佢割席。梅啟明連日嚟被網民串佢係「遺產KOL」，佢喺接受TVB訪問嘅時候就話好嬲、好不甘有呢個稱號，又否認自己不事生產，話「我做嘢要向全世界交代？」。

雖然梅啟明咁講，但資深傳媒人潘小文就喺《D100娛限奶媽》到爆料，話梅媽曾經同梅啟明同住，但對方就好少返屋企，連胞妹梅愛芳（Ann姐）過身，佢都無現身。到梅姐離世後，佢就突然蒲頭，梅媽都話佢出現係因為覺得會有錢分。直到梅啟明知道佢一蚊都分唔到，就覺得係梅姐欠佢太多，一直出招「追數」。梅媽又話，好彩梅姐將遺產交俾基金託管，因為如果唔係咁做，梅啟明會駛晒啲錢。

至於梅姐與姨甥嘅失散之謎，潘小文就引述梅媽嘅一番說話解畫。事源當年Ann姐丈夫潘立德一度誤會梅姐同梅媽唔肯出手幫患重病嘅Ann姐，所以喺Ann姐過身之後嬲到帶住兩個仔移居加拿大。梅媽話，其實兩個外孫原本有佢嘅電話，去到加拿大之後都打過畀佢，但就俾Ann姐嘅奶奶發現，仲丟埋梅媽電話號碼，自此雙方失去聯絡。

#channelchk #梅艷芳 #Anita #梅啟明 #梅愛芳 #梅媽 #Ann姐 #遺產KOL