李嘉欣突心跳加速呼吸困難險死
送ICU搶救2日「執返條命」

上月尾為ViuTV《全民造星IV》決賽任評判、現年51歲、人稱大美人嘅李嘉欣，今日突然自爆死過翻生經歷，喺ICU搶救咗兩日，好彩最後「執返條命！」佢感謝醫護團隊無微不至照顧，又稱令家人疲於奔命同擔心「實在對不起」，仲提大家「好好照顧自己的身體」。出院無耐都記掛住大家，Channel絲都祝福大美人早日康後呀！

李嘉欣喺Ig出post報平安，上載咗留院相片，見到佢瞓喺病床上插住鼻喉，雙手又插滿喉管，臉色蒼白，雖然望住鏡頭微笑，但仍難掩倦容。

李嘉欣之後又透過工作人員回覆傳媒，感謝大家關心，同再向家人、媽咪道歉之外，仲透露咗入院原因。佢話事發今個星期二凌晨，「我忽然感到心跳加速，同時覺得有呼吸不到的感覺，加上腳步浮浮，於是立即聯絡相熟醫生，結果醫生要我立即到醫院，抵達醫院後，我立即被送入ICU搶救。可幸的是，我全程保持清醒，醫生還告訴我，如果我再遲點搶救，『呢個世界差少少就無咗李嘉欣』，在ICU搶救了兩日，終於可以返回病房，現在已經回家休息了！」

最後，李嘉欣好感慨咁話「人的身體就是這樣，一個器官影響一個器官，今次血壓急降，令肝臟、腎臟、心臟、肺等各個重要器官都受影響。」所以佢今次想藉自己親身經歷提醒所有人，「一定要好好愛護自己的身體，關心自己的身體，沒有任何東西比健康重要，活著就是勝利，遇到任何事都要保持正能量，祝願大家身體健康。」

#channelchk #李嘉欣 #ICU #入院