俾頭髮食咗嘅女仔
神秘女港鐵車廂吹頭 乘客啞忍

人類已經無法阻止奇人異士喺港鐵做奇怪嘢。由開枱打牌、成罐石油氣推上車搭9個站、到扮小龍女瞓吊床——最新係喺港鐵車廂內吹頭。表面上佢係一個風筒，事實上佢真係一個風筒，好嘈，無線，估計風力麻麻，否則點會吹成兩分鐘都仲係吹頭頂。

有網民今日上載呢條想和你去海洋公園吹吹風短片，片長兩分鐘，事發路段為港島南線（下一站海洋公園）。片中吹頭女身份、樣貌、年齡俱不詳，因為兩分鐘裡面佢都好巧妙咁用唔算長嘅頭髮完整cover成個「臉蛋」，手上無多餘飾物，得一條估計係橡筋嘅帶。條片冇咩可補充，就係吹頭。

當然車廂內有其他乘客，女子左邊係一個短髮中女，右邊靠玻璃係戴帽男子。兩人都神情專注睇電話，男嘅仲戴住ear phone。

正如大家所見，中間個女仔咁吹吹吹吹，幾乎吹埋Channel絲個元神出嚟，但左青龍右白虎都係毫無反應。直至1分23秒，男人終於有反應，但佢唔係望吹頭女，而係游目四周，可能搵緊人求救。5秒之後，短髮女可能收到感應，忍唔住望向咗吹頭女。打量3秒左右，放棄。

不寧靜嘅空間，風筒聲繼續於車廂內張牙舞爪，同有線「豪俾你」嘅免費新聞報道鬥嘈，仲有港鐵永不止息嘅廣播。交響樂咁。

究竟呢條片，係一個靜音風筒廣告、耳機廣告，定係人性測試嚟？

#港鐵 #打牌 #風筒 #吹頭 #港鐵站吹頭 #channelchk